¹ Ndizvo ngatiangire kuenda mberi mukuperera, techisiya sure zvidzidziso zvekutanga zvaKristu, tisikaradzikizve dzeyo rokutendeuka kubva kumushando yakafa nekugonda kuna Mwari, ² nokuchidzidziso chokubhabhatidzwa nekuiswa nyara nechokumuka kwevakafa nechokutongwa kwemhera nariini. ³ Neizvi tinozozviita, kudai Mwari echitendera. ⁴ Ngokuti azviitiki kuvapetudzazve kuti vatendeuke avo vakambojekiswa nekuraira chipo chemudenga, vaashira chikoaniswa muMweya Wakachena, ⁵ vakaraira unaku weizwi raMwari nemasimba enguva inouya, ⁶ kudai vechipauka kuhwirira sure, azvingaitiki kuvatenderudzazve, ngokuti vanokohomerazve Mwana waMwari vechimunyadisa pamhene. ⁷ Ngokuti nyika inomwirira mvura inonaya kazhinji padera payo, kudai yechimera miriwo inofanira avo vayakarimirwa, inoashira chifumiso chinobva kuna Mwari. ⁸ Asi kudai yechibereka minzwa nemakato, inoita isina shwiro yaapasinde pekutukwa, magumisiro ayo kupishkwa. ⁹ Kunyazwi tinoreketa kudai, vanodikanwa, tinegonda rezviro zvakapinda kunaka ndimwi, zviro zveruponeso. ¹⁰ Ngokuti Mwari aasiri wokusikaruramapi; aazoriyarwi mushando wenyu nerudo rwemwakaonisa ngendaa yezita rake mukushandira vakacheneswa, kudai ngezvemuchavashandira nazvino. ¹¹ Nesu tinodisisa kuti umwe ngaumwe wenyu aonise kutsamwirira kwakadaro kunokugonda kwakaperera metsa pakugumisira. ¹² Kuti musaita nungo, asi vatedzeri veavo vanogara nhaka yezvigondiso kubudikidza ngekugonda nekushingirira. ¹³ Ngokuti apo Mwari paakaita chigondiso kuna Abrahama, wakapika ndiye pachake, ngokuti painga pasina mukuru wokuti apike ndiye. ¹⁴ Ena wakati: “Ngegwinyiso ndinozomupfumisa nekumuwanza.” ¹⁵ Ngokudaro Abrahama echishingirira mukusshinga wakahanira chigondiso. ¹⁶ Ngegwinyiso vanhu vanopika ngomukuru wakavapinda pachavo, nemhiko inogwinyisa inopedza hasha dzeshe. ¹⁷ Ngenjira imweyo, apo Mwari, paakada kunasa kuonisa kwavari avo vanogara nhaka yechigondiso, icho chine chiemo chisikatsandudzwi biningidzo racho, wakachigwinyisa ngemhiko. ¹⁸ Kuti kubudikidza ngezviro zviiri zvisikashanduki, mwezviri amungaitiki kuti Mwari anyepe, isusu tione kugwinyiswa kwakagwinya, isusu takatiza kubatisisa gonda rakaiswa pamberi pedu. ¹⁹ Tinaro gonda iri kuita chitsimiso chomweya, rine gwinyiso rakatsima rinopotera muneicho chiri mukati mwejira rechisitiro, ²⁰ umwo Jesu mutungamiriri wakapoteramwo pekutanga ngendaa yedu, apo aitwa mupristi mukuru mhera nariini kudai ngeurongwa werudzi rwaMerekhizedheki.