¹ Ngokuti mupristi mukuru weshe wakaketwa kubva pakati pevanhu unoemeserwa vanhu kuita zviro zvaMwari, kuti apire zvipo nemidiro ngendaa yezvishaishi. ² Unokona kuzwira urombo kunevasikazii nevanopauka, ngokuti iye emene wakatendenedzwawo ngokurembaremba. ³ nge ndaa iyi, unofanira kuti apire midiro ngendaa yezvishaishi zvake, kudai ngezvaanopira ngendaa yevanhu. ⁴ Akuna munhu unodzitorera kureremedzwa uku, asi unotora kwega apo anodaidzwa ndiMwari, kudai ndiAroni. ⁵ Ndizvo Kristuwo aazi kudzikudza ngekuita mupristi mukuru, asi wakaemeswa ngeuwo wakati kwaari: “Ndiwe Mwana wangu, inini nyamashi ndakubara''. ⁶ Kudai ngezvakanyorhwazve kundau imweni kuti: “Iwewe uri mupristi mhera nariini kudai ngourongwa hworudzi rwaMerekhizedheki.” ⁷ Ngemazuva ekupona kwake munyama, Jesu wakakumbira mikumbiro nekupota, ngokuchema kukuru nemusodzi, kwaari umwe uwo waikona kumuponesa kubva murufu, naye wakazwika ngendaa yokumutya Mwari. ⁸ Kunyazwi wainga Mwana, asi wakadzidza kuzwisisa kubudikidza ngeizvo zvaakatambudzika ndizvo; ⁹ Apo aitwa wakaperera, wakaita muambi wekuponeswa kusikaperi kwavari veshe vanomzkwa. ¹⁰ Apo aemeswa ndiMwari kuita mupristi mukuru kudai ngokuteererana kworudzi rwaMerekhizedheki. ¹¹ Ngendaa yeizvi tinazvo zvakawanda zvokuronza zvakakonza kududzira, kudai ngezvemwaita vanhu vasikachakoni kuzwisisa. ¹² Ngekuti kunyazwi ngouyu mukuwo mwaifanira kuita vadzidzisi, zvino imwimwi munodazve kuti umweni amudzidzise zvidzidziso zvekutanga zvemazwi aMwari. Imwimwi mwatoita vanofanira kupuwa mukaka, haiwa kudya kwakagwinya. ¹³ Ngekuti munhu weshe unomwa mukaka aazwisisi izwi rokururama, ngokuti mwana mudoko. ¹⁴ Asi kudya kwakagwinya ngokwevakuru, ngokuti avo mipinimidzo yavo yakadzidziswa ngekuita kuketwa zvakanaka kubva panezvakashata.