¹ Ndizvo, kudai ngezvechichipo chigondiso chokupotera mukudzorora kwake, ngatingware kuti kusazoapo naumwe wenyu ungaoneka echikorera kuhanira kwechiri. ² Ngokuti ngegwinyiso mashoko akanaka akauya kwetiri, kudai ngekwavari; asi izwi revakazwa arizi kuvadetsera, ngokuti arizi kubvengedzwa pamwepo nokugonda kwaavo vakarizwa. ³ Ngokuti isusu takatenda tinopotera mukudzorora ukwo, kudai ngezvaakareketa echiti: “Kudai ngezvendakapika muushungu hwangu kuti, ‘Avazopoteri mukuzorora kwangu,’ ” kunyazwi mushando yake yakapedzwa kubvira mukuemeswa kwenyika. ⁴ Ngokuti pandau imweni wakareketa ngendaa yezuwa rechinomwe echiti: “Mwari wakadzorora ngezuva rechinomwe kubva kumushando yake yeshe.” ⁵ Nepandau inozve echiti: “Avazopoteri mukuzorora kwangu''. ⁶ Ndizvo kuchakabeuka kuti vamweni vapoteremwo, naavo vakaashira mashoko akanaka karetu vakakorera kupoteramwo ngokusikayaeia. ⁷ Unoemesazve zuva rimweni rinoti: “Nyamashi,” rechiti kubudikidza ndiDhavhidha ngesure kwomukuwo wakareba kudai, kudai ngezvezvakareketwa kare kuti: “Nyamashi, kudai mwechizwa izwi rake, musakonzesa mwoyo yenyu.” ⁸ Ngokuti kudai Joshua ainga avapa kudzorora, Mwari asaizoreketa ngezuva rimweni sure kweizvo. ⁹ Ndizvo zvino kuzorora kweSabatha revanhu vaMwari kuchiripo. ¹⁰ Ngokuti avo vakapotera mwana raMwari vakazororawo kubva kumushando yavo, kudai ngezvaakaita Mwari kubva kuneyake. ¹¹ Ndizvo ngatitsamwirire kukumbira dzororo iro, kuti kusazoapo naumwe unozowa kubudikidza ngekuteera icho chionero chekusikazwisisa. ¹² Ngokuti izwi raMwari rinopona, rinoshanda, rinopinza kupinda shoti ine upanga huiri, rinobaya kugumira panoparadzana mwoyo nomweya, nhengo nemwongo; rinokona kuzwisisa zvinotendwa nezvinonyerwa mumwoyo. ¹³ Pamberi pake apana chisikwa chakafishika, asi zviro zveshe zviri pamhene nokufukurwa kumadziso ake uwo wetinozodzipingurira kwaari. ¹⁴ Ndizvo, saka zvetinaye mupristi wakapinda kukura, wakapinda ngepakati pematenga, Jesu, Mwana waMwari, ngatibatisise kutenda kwedu. ¹⁵ Ngokuti atina mupristi mukuru usikakoni kutizwira urombo pakurembaremba kwedu, asi tinaye uwo wakaedzwa ngenjira dzeshe kudai tisu, asina kushaisha. ¹⁶ Ndizvo ngatikwedzere ngokushinga kudendemaro renyasha, kuti tiashire nyasha nekuona nyasha dzekutidetsera ngenguwa wekutama.