¹ Ndizvo, hama dzakacheneswa, vanoashirawo kudaidzwa kwomudenga, reurirai ndiye Jesu, Mupostori noMupristi Mukuru wokutenda kwedu. ² Ena waigondeka kwaari uwo wakamuemesa, kudaiwo ndiMosi waigondeka mumhatso yaMwari yeshe. ³ Ngokuti Jesu wakaerengwa kuita unofanira kureremedzwa kupinda Mosi, kudai ngouwo wakaaka mhatso unoreremedzwa kupinda mhatso yemene. ⁴ Ngokuti mhatso yeshe inoakiwa ngemunhu, asi uwo wakaaka zveshe ndiMwari. ⁵ Ngekumweni, Mosi waigondeka mumhatso yaMwari yeshe kudai ngomuranda, kuti aite chapupu cheizvo zvaaizoreketa panguva yaiteera. ⁶ Asi Kristu waigondeka padera pemhatso yaMwari kudai seMwana, nesu tiri mhatso yake kudai techibatisisa pakushinga kwedu negonda retinodzikudza ndiro mukugonda kwedu. ⁷ Ndizvo, kudai ngezvaanoreketa Mweya Wakachena, “Nyamashi, kudai mwechizwa izwi rake, ⁸ “Musakonzesa mwoyo yenyu kudai ngenguva yokumukirana, kudai ngezuva rokuedzwa mushango. ⁹ Izwi zvakaitika Paakandiedza madzibaba enyu echindinesa, akaona mushando yangu makore makumi marongomuna. ¹⁰ Ndizvo ndakanyangadzwa ngerudzi urwu, ndikati, ‘Vanogara vechipauka mumwoyo yavo navo avazi kuzia njira dzangu.’ ¹¹ Kudai ngezvendakapika muushungu hwangu kuti, ‘Avazopoteri mukudzorora kwangu. ¹² Ngwarai, hama, kuti kusazoapo naumwe wenyu unemwoyo wakashata usikatendi, unofuratira kubva kuna Mwari unopona. ¹³ Asi gwinyisanai umwe ngaumwe wenyu mazuva eshe kuchadaidzwa kuti, “Nyamashi,” kuti kusazoapo naumwe wenyu unokonzeswa ngokuchengedzerwa kwekushaisha. ¹⁴ Ngokuti isusu takaitwa vanokoanisirana naKristu, kudai techibatisisa kuamba kwokugonda kwedu metsa pakutanga. ¹⁵ Nge izvo kuchazwi: “Nyamashi, kudai mwechizwa izwi rake, musakonzesa mwoyo yenyu kudai ngenguva yekumukirana. ¹⁶ Ndiani avo vakazwa, vakamumukira? Andivopi veshe here vakabudiswa Egipite ndiMosi? ¹⁷ Ndianizve vaakanyangadzirwa makore makumi marongomuna? Andivopi avo vakashaisha here, miiri yavo yakawira mushango? ¹⁸ Wakapikazve kunaani kuti avazopoteri mukudzorora kwake, kudai kusiri kwavari avo vainga vasikayaei? ¹⁹ Ndizvo tinoona kuti avasaikona kupoteramwo, ngekuti vainga vasikatendi.