¹ اَیُّوبؔ کا جواب تب اَیُّوبؔ نے جَواب میں کہا کہ ۔ ² آج بھی میری شِکایت تلخ ہے۔ باوجُود میرے کراہنے کے اُس کا ہاتھ مُجھ پر بھاری ہے۔ ³ کاش کہ مَیں جانتا کہ کہاں اُسے پاؤں اَور مَیں اُس کے تخت تک پُہنچتا۔ ⁴ تو مَیں اپنا دعویٰ اُس کے آگے مُسلسل بیان کرتا اَور اپنا مُنہ دِلائل سے بھر لیتا۔ ⁵ اَور مَیں اُس کے جَواب کے کلموں کو جان لیتا۔ اَور مَیں سمجھتا کہ وہ مُجھ سے کیا کہتا ہے۔ ⁶ کیا وہ اپنی قُدرت کی عظمت میں مُجھ سے لڑتا ۔نہیں۔ بلکہ وہ مُجھ پر مہربانی کرتا۔ ⁷ تب راستباز اُس کے ساتھ بحث کرتا۔ اَور مَیں ہمیشہ کے لئے اپنے مُنصِف کے ہاتھ سے رِہائی پاتا۔ ⁸ لیکن اگر مَیں مشرق کو جاتا ہُوں تو وہ نہیں ہوتا۔ اَور اگر مغرب کو تو اُسے نہیں دیکھتا۔ ⁹ مَیں شِمال میں اُس کی تلاش کرتا ہُوں اور اُسے نہیں پاتا۔ مَیں جنُوب کی طرف جاتا ہُوں اَور وہ مُجھے نظر نہیں آتا۔ ¹⁰ لیکن وہ میری راہ کو جانتا ہے۔ اگر وہ مُجھے آزمائے تو مَیں سونے کی مانند نکلُوں گا۔ ¹¹ میرے قدموں نے اُسی کے نقش کی پیروی کی۔ مَیں نے اُس کی راہ اِختیار کی ہے اَور اُس سے نہیں پھِرا۔ ¹² مَیں نے اُس کے لبوں کے حُکِم کی نافرمانی نہیں کی۔ اَور اُس کے مُنہ کی باتوں کو یاد رکھنا مَیں نے اپنا فرض جانا۔ ¹³ لیکن وہ ایک اِرادے والا ہے ۔ تو کون اُسے واپس لائے گا۔ اَور اگر وہ کُچھ چاہے تو اُسے کر کے رہے گا۔ ¹⁴ جو کُچھ میرے لئے مُقرّر کِیا گیا ہے وہ پُورا کرتا ہے اَور بُہت سی ایسی باتیں اُس کے پاس ہیں۔ ¹⁵ اِ س لئے مَیں اُس کے حضُور خوف زدہ ہوتا ہُوں۔ اَور اُس پر غور کر کے کانپتا ہُوں۔ ¹⁶ کیونکہ خُدا ہی نے میرے دل کو کمزور کر دِیا۔ اَور قادرِمُطلِق ہی نے مُجھے خوف زدہ کِیا۔ ¹⁷ کیونکہ مَیں تارِیکی کے سبب سے ہلاک نہ ہُؤا اَور نہ اُس ظُلمت ہی کے سبب سے جِس سے میرا چہرہ ڈھانپا گیا۔