¹ الیفر کی تیسری تقریر تب الیفر تیمانی نے خطاب کر کے کہا کہ ۔ ² کیا آدمی خُدا کو فائدہ پُہنچا سکتا ہے؟ بے شک دانش مند اپنے ہی لئے فائدہ پاتا ہے۔ ³ اگر تُو نیک ہو تو کیا قادرِ مُطلِق کو اُس سے کُچھ فائدہ ہے یا اگر تُو اپنی راہوں کو پاک کرے تو اُس کے لئے کُچھ نفع ہے؟ ⁴ کیا وہ تیری خُدا ترسی کے سبب سے تُجھے ملامت کرتا ہے یا تُجھے عدالت میں لاتا ہے؟ ⁵ کیا تیری شرارت بڑی نہیں۔ اَور تیری بَدی بے حد نہیں؟ ⁶ کیونکہ تُو نے اپنے بھائی سے ناحَق رہن لِیا ہے۔ اَور ننگَوں سے کپڑے چھِین لئے ہیں۔ ⁷ تُو نے پیاسے کو پانی نہیں پلایا۔ اَور بُھوکے سے اپنی روٹی روک رکھّی ہے۔ ⁸ جو آدمی قَوی بازُو والا ہے زمین اُس کے قبضے میں ہوتی ہے۔ اَور عِزّت دار شخص اُس میں بستا ہے۔ ⁹ تُو نے بیواؤں کو خالی ہاتھ بھیج دِیا ہے اَور یِتیموں کے بازُو توڑ دیئے ہیں۔ ¹⁰ اِس وجہ سے تیری چاروں طرف پھندے ہَیں۔ اَور ناگہانی خوف تُجھے دُکھ دیتا ہے۔ ¹¹ اَور نُور ایسی تارِیکی ہو گیا جسےتُو دیکھ نہیں سکتا۔ اَور پانی کا سیلاب تُجھے چھُپا لیتا ہے۔ ¹² کیا خُدا آسمان پر بُلند نہیں اَور بُلند سِتاروں پر نظر نہیں کرتا۔ ¹³ اَور تُو کہتا ہے کہ خُدا کیا جانتا ہے؟۔ کیا وہ کُہر کے پیچھے سے اِنصاف کر سکتا ہے؟ ¹⁴ بادل اُس کےلئے پردہ ہے اَور وہ دیکھ نہیں سکتا۔ اَور وہ افلاک کے گُنبد پر چلتا ہے۔ ¹⁵ کیا تُو اُسی پُرانی راہ پر چلتا رہے گا۔ جس پر شریر لوگ چلتے رہے ہَیں؟۔ ¹⁶ جو اپنے وقت سے پہلے ہی کاٹ دیئے گئے۔ جب سیلاب اُن کی بُنیادوں پر بہہ گیا۔ ¹⁷ جِنہوں نے خُدا سے کہا"ہمارے پاس سے چلا جا"اَور کہ "قادرِ مُطلِق ہمارا کیا کر سکتا ہے"؟ ¹⁸ تو بھی اُس نے اُن کے گھروں کو اچھّی اچھّی چیزوں سے بھر دِیا۔ اَور شریروں کی مشورت اُس سے دُور ہی رہی۔ ¹⁹ صادِق دیکھیں گے اَور خُوش ہوں گے اَور مَعصُوم اُس پر ہنسی کرے گا۔ ²⁰ "دیکھ ہمارے مُخالِف کاٹے گئے ہَیں۔ بلکہ اُن کے بَقیے کو آگ کھاگئی ہے"۔ ²¹ پس اُس کے نزدِیک رہ اَور نیکی کر۔ اِس طرح کرنے سے تُو اچھّی اچھّی چیزیں پائے گا۔ ²² اُس کے مُنہ کی شریعت کو قبُول کر۔ اَور اُس کی باتوں کو اپنے دِل میں رکھّ۔ ²³ کیونکہ اگر تُو قادرِ مُطلِق کی طرف پھِرے تو تُو بحال کیا جائے گا۔ اَور تُو بَدی کو اپنے خَیمےسے دُور کر دے گا۔ ²⁴ تب گرد کی طرح تیرے پاس سونا ہوگا اَور وادیوں کے پتّھروں کی طرح اوفؔیر کا سونا۔ ²⁵ اَور قادرِ مُطلِق تیرا سونا اَور چاندی کا ذخیرہ ہوگا۔ ²⁶ اُس وقت قادرِ مُطلِق میں تیری خوشی ہو گی۔ اَور تُو خُدا کی طرف اپنا مُنہ اُٹھائے گا۔ ²⁷ اَور تُو اُس سے دُعا کرے گا اَور وہ سُن لے گا۔ اَور تُو اپنی مَنتّیں ادا کرے گا۔ ²⁸ اَور جس بات کا تُو اِرادہ کرے وہ تیرے لئے پورا ہو جائے گا۔اَور تیری راہوں پر روشنی چمکے گی۔ ²⁹ کیونکہ جو پست ہُؤا وہ بُلنَد کِیا جائے گا اَور جو حلیم تھا وہ بچایا جائے گا۔ ³⁰ اَور وہ بے گُناہ کو نجات دے گا۔ وہ تیرے ہاتھوں کی پاکیزگی کے باعِث نجات پائے گا۔