¹ Tsapano pomwe Yesu akhapita, adaona munthu zimola kuchokera pachibadwire chache. ² Wakupfunza wache adamubvunza iye, "Rabbi, mbani adaphonya, ngumweyu ayai abereki wache, pala kuti abadwe zimola?" ³ Yesu adatawira, "Alibe kuphonya ngumweyu, ayai abereki wache, soma pala kuti mabasa ya Mulungu yazimbulike mwa iye. ⁴ Bzimfunika tiphatiretu mabasa ya iye omwe adandituma kukadachenapa. Usiku bukubwera bomwe palibe angakwanise kuphata basa. ⁵ Pomwe ndiri padziko lapansi pano, ndine kubvunika kwa dziko lapansiri." ⁶ Yesu atasewera bzobzi, adapswipira pansi, mkumunya tumatope na matayo, achipalanga matopeyo pamaso yache. ⁷ Iye adati kuna iye, "Ndoko ukasambe muthawale la Siloamu" (lomwe ndiye kuti "Kutumiwa"). Ndiye munthuyo adayendadi kukasamba, achibwerera zjai akuona. ⁸ Kinangoka anansi wache wa munthuyo na omwe akhambamuona kale ninga nyakukumbira akhambati, "Ngumweyu lini munthu akhambakhala pansi mkumbakumbira ule?" ⁹ Winango adati, "Ndiye inde." Winango adati, "Neye, soma ali ninga iye." Soma iye adati, "Ndine." ¹⁰ Iwo adati kuna iye, "Tsono maso yakoya yadapenya tani?" ¹¹ Iye adatawira, "Munthu wakuchemeriwa Yesu adamumya tumatope achipalanga pa maso yanguya achiti kuna ine, 'Ndoko ku Siloamu ukasambe.' Ndiye ndidayendadi kukasamba, apo ndidatambira kupenya kwangu." ¹² Iwo adati kuna iye, "Iye ali kuponi?" Adatawira, "Ndikudziwa lini." ¹³ Iwo adabweresa munthu akhali zimolayo kuna Afarisi. ¹⁴ Tsapano ikhali nsiku ya Sabudu pomwe Yesu adamumya tumatope achifungula maso yacheyo. ¹⁵ Tsono Afarisi adamubvunza pomwe ndimo adatambirira kuona kwacheko. Iye adati kuna iwo, "Adaikha tumatope pamaso yanguya, ndidakasamba, apo zjai tsapano ndikuona." ¹⁶ Afarisi winango adati, "Munthu umweyu alibe kuchoka kuna Mulungu thangwe ambakoya lini Sabata." Winango adati, "Bzikutheka tani munthu wakuti ngwakuphonya kuchita bzizindikiro bzobzi?" Ndiye pakhana mgawikano paiwo okha okha. ¹⁷ Tsono adamubvunza pomwe zimolayo, "Ulikuti tani bza iye, nakuti adafungula maso yako?" Zimolayo adati, "Ni mneneri." ¹⁸ Tsapano Ayuda alibe kukhulupirira basi bzaiye kuti akhali zimola apo watambira kuona kwache ate kuchita kuchemeresa abereki waiye adatambira kuona kwacheyo. ¹⁹ Iwo adabvunza aberekiwo, "Nimwananu uyu omwe mulikuti akhadabadwa zimolayu? Bzakhala tani tsono kuti tsapano zjai akuona?" ²⁰ Ndiye abereki wache wale adawatawira, "Tikudziwa kuti uyu ni mwanathu apo akhadabadwadi zimola. ²¹ Pala kuti bzakhala tani kuti tsapano awone, tikudziwa lini, na ndiye adamufungula maso yacheyo, tikumudziwa lini pomwe. Mubvunzeni, nimkuluwense umweyu. Angalewelewe yekha." ²² Abereki wachewo adasewera bzobzi, thangwe akhana mantha na Ayuda. Nakuti Ayuda akhadapangana kale kuti penu winango anitawiriza kuti umweyu ni Mkhirisitu, animuthusa kunja kwa sunagoge. ²³ Thangwera bzobzi, abereki wache adati, "Nimkuluwense umweyu, mubvunzeni." ²⁴ Tsapano kachiwiri adamuchemera pomwe munthu akhali zimola ule achiti kuna iye, "Pereka ulemerero kuna Mulungu. Tikudziwa kuti munthu umweyu ana bzakuphonya." ²⁵ Ndiye munthu ule adatawira, "Ndikudziwa lini kuti ana bzakuphonya. Chinthu chibodzi ndicho ndikudziwa: Ndikhali zimola, apo tsapano zjai ndikuona." ²⁶ Ndiye iwo adati kuna iye, "Adachita chani kuna iwe? Maso yakoya adayafungula tani?" ²⁷ Iye adatawira, "Ndakuuzani kale, apo mulibe kutetekera! Thangweranyi mukufuna kubva pomwe? Mukufunambo lini kukhala wakupfunzira wache, mumfuna?" ²⁸ Iwo adamulalatira achiti, "Ndiwe wakupfunza wache, soma ife ndife wakupfunza wa Mose. ²⁹ Tikudziwa kuti Mulungu walewalewa kuna Mose, soma tikudziwa lini kuti munthu uyu wachokera kuponi." ³⁰ Munthuyo adatawira achiti kuna iwo, "Ichi mchakudabwisa, kuti mulikudziwa lini kuti ngwakuponi, chensecho adafungula maso yangu. ³¹ Tikudziwa kuti Mulungu ambatetekera lini wanthu wakuphonya, soma penu wina aninamata Mulungu mkuchita bzakufuna bzache, ambamutetekera umweyo. ³² Chiyambireni cha dziko lapansi bzikanatimbo kubveka kuti wina adafungula kale maso ya munthu wakubadwa zimola. ³³ Angadakhala munthu umweyu ngwakuchokera lini kuna Mulungu, angadachita lini chinthu." ³⁴ Iwo adatawira achiti kuna iye, "Udabadwira mu bzakuphonya chaimo, ndiye ukutipfunzisa?" Kinangoka adamuthusa panja. ³⁵ Yesu adabva kuti iwo adamuthusa iye panja pa sunagoge. Adakamugumana iye achiti, "Umbakhulupirira Mwana wa Munthu?" ³⁶ Adatawira a chiti, "Iye mbani, Mbuya, kuti ndimukhulupirire?" ³⁷ Yesu adati kuna iye, "Si wamuona, apo ndiye letu akusewera kuna iweyu." ³⁸ Munthuyo adati, "Mbuya, nimbakhulupirira," apo adamunamata iye. ³⁹ Yesu adati, "Padziko lapansi ndidabwerera kudzayeruza kuti wakutaza kuona awone nakuti wakuona akhale azimola." ⁴⁰ Afarisi winango omwe akhana iye adabva bzobzi achimubvunza iye, "Apa ife ndifembo azimola?" ⁴¹ Yesu adati kuna iwo, "Mungadakhala azimola, mungadakhala mulibe chakuphonya, soma tsapano mumbati, 'Timbaona,' soma bzakuphonya bzanu bzikalipo."