1 Yesu adayenda ku phiri la Azitona. 2 Machibesebese adabwera pomwe ku kachisi, apo wanthu wensene adabwerambo; iye adakhala pansi achiwapfunzisa. 3 Anembi na Afarisi adabweresa mkazi wakuphatiwa akuchita chigololo. Iwo adamuikha pakati. 4 Kinangoka iwo adati kuna iye, "Mpfunzisi, mkazi uyu waphatiwa akuchita chigololo. 5 Tsapano pachitongi, Mose adatitonga kumbaboma minyala wanthu wakutenepayu; munilewa tani bza iye?" 6 Adasewera bzobzi pala kunyang'ana thangwe lakumuzengera mulandu, soma Yesu adakotama mkunemba pansi na chala chache. 7 Pomwe iwo adapitiriza kumbamubvunza mabvunzo, iye adaima achiti kuna iwo, "Omwe mwa imwepa alibe chakuphonya, akhale wakutoma kumuboma na mwala." 8 Adakotama pomwe, mkunemba pansi na chala chache. 9 Pomwe adabva bzobzi, adachoka m'bodzi m'bodzi, wakutoma akhali akulu letu. Pakumaliza Yesu adasala yekha, na mkazi omwe akhali pakati ule. 10 Yesu adaima achiti kuna iye, "Mkaziwe, wakukutonga milandu wako wale ali kuponi?" 11 Iye adati, "Palibe, Mbuya." Yesu adati, "Ine ndikukuzengambo lini mulandu. Ndoko nampodi kukaphonya pomwe."] 12 Yesu adasewera pomwe kuna iwo, kulewa kuti, "Ndine kubvunika kwa dziko lapansi; iye wakutewera ine amdzafamba lini mum'dima soma amdzakhala na kibvunika kwa moyo." 13 Afarisi adati kuna iye, "Mumbabzichitira umboni mwekha; umboni bwanubu m'bwachadidi lini." 14 Yesu adatawira achiti kuna iwo, "Napo ndichibzichitira ndekha umboni, umboni bwangubo m'bwachadidi. Ndikudziwa ndiko. ndidachokera na ndiko ndikuyenda, soma imwepo mukudziwa lini ndiko ndidachokera ayai ndiko ndikuyenda. 15 Mumbatonga kutengera kuthupi; ine nimbatonga lini munthu. 16 Chensecho ndichiti nditonge, kutonga kwangu mkwachadidi thangwe ndiri lini ndekha, soma ndina Baba omwe adandituma. 17 Inde, apo muchitongi chanu. mudanemba kuti umboni bwa wanthu awiri m'bwachadidi. 18 Ndine iye omwe nimbabzichitira ndekha umboni, app Baba omwe adandituma ambachitirambo umboni bza ine." 19 Iwo adati kuna iye, "Babanuwo ali kuponi?" Yesu adatawira, "Mukundidziwa lini ine ayai Babangu; mungadandidziwa ine, mungadadziwa pomwe Babanguwo," 20 Adasewera mafala yoya mnyumba ya thenthe la kobiri pomwe akhapfunzisa mkachisi, apo palibe adamumanga thangwe nthawe yache ikhanati kukwana. 21 Tsono iye adalewa pomwe kuna iwo, "Ndikuyenda; Mumdzandipsaga ine apo nimdzafera mu bzakuphonya bzanu. Ndiko ndikuyenda ineko mungakubwere lini." 22 Ayuda adati, "Kodi amdzabzipha yekha kani? Nithangwerache ambati, 'Ndiko ndikuyenda ine mungakubwere lini'?" 23 Yesu adati kuna iwo, Ndine wakuchokera kudzaulu. Imwe ndimwe wadziko lapansi lino; ine ndine lini wadziko lapansi lino. 24 Nithangwerache, ndikulewa kuna imwe kuti mumdzafera mubzakuphonya bwanu. Nakuti penu munikhulupirira lini kuti NDINEDI, mumdzafa mu bzakuphonya bzanu." 25 Iwo tsono adati kuna iye. "Imwepo ndimwe mbani?" Yesu adati kuna iwo, "Ndibzo ndakhala ndikulewa kuna imwe kuyambira pakutoma. 26 Ndina bzizinji bzakusewera na kutonga bza imwe. Tsono, omwe adandituma ineyo ngwachadidi; apo bzinthu ndibzo ndidabva kuchoka kuna iye, bzinthu bzobzo nimbabzilewa kudziko lapansi. 27 Iwo alibe kubvesesa kuti iye akhalewa bza Baba kuna iwo. 28 Yesu adati, "Mungadzakwiza Mwana wa Munthu, ndiye mumdzadziwa kuti INE NDINE, nakuti nimbachita lini bzandekha. Ninga ndimo Baba adandipfunzisira, nimbasewerabzi. 29 Iye omwe adandituma ine alinande, apo alibe kundisiya ndekha, thangwe nthawe zense nimbachita bzakumudekera iye." 30 Pomwe Yesu akhalewalewa bzobzi, azinji adamukhulupirira iye. 31 Yesu adati kuna Ayuda omwe adakhulupirira iye, "Mungakhazikika mu mafala yanguya, kinangoka munikhala wakupfunza wangu wachadidi wale; 32 apo chadidi chimdzakutsudzulani." 33 Iwo adamutawira iye, "Ndife dzinza la Abulahamu apo tikanati kale kukhala akapolo wa wina aliyense; mungalewe tani kuti, 'Mumdzatsudzuliwa'?" 34 Yesu adawatawira iwo, "Indetu, indetu, ndikulewa kuna imwe, aliyense wakuchita. chakuphonya ni kapolo wa chakuphonyacho. 35 Kapolo ambakhala lini mnyumba ate muyaya; mwana ambakhala ate muyaya. 36 Nithangwerache, penu Mwana amkutsudzulani, mum'dzakhala wakutsudzuliwa bzachadidi bzire. 37 Ndikudziwa kuti ndimwe wadzinza la Abulahamu; mukupsaga kundiphapa thangwe mafala yangu yalibe mbuto mwa imwe. 38 Ndikulewa ndibzo ndaona na Babangu, apo mumbachitambo ndibzo mudabva kuna babanu." 39 Iwo adatawira achiti kuna iye, "Babathu ni Abulahamu." Yesu adati kuna iwo, "Mungadakhala ndimwe wanache wa Abulahamu, mungadambachita mabasa ya Abulahamu. 40 Chensenecho, mukupsaga kupha ine, munthu wakuti ndidakuuzani chadidi ndicho ndidabva kuchokera kuna Mulungu. Abulahamu alibe kuchita bzobzi. 41 Mumbachita mabasa ya babanu." Iwo adati kuna iye, "Tiribe kubadwira mchigololo; Tina Babathu m'bodzi: Mulungu." 42 Yesu adati kuna iwo, "Angadakhala Mulungu ni Babanudi, mungadandikonda ine, thangwe ndidachokera kuna Mulungu apo ndiri pano; nakuti ndiribe kubwera bzandekha, soma adachita kundituma. 43 Thangweranyi mumbabvesesa lini mafala yangu? Thangwera kuti mumbayabva lini mafala yanguya. 44 Ndimwe wa Babanu, mdyerekezi, apo mumbafuna kumbachita bza babanuyo. Akhali wakupha kuyambira pakutoma apo ambaima lini pa chadidi thangwe mwaiye mulibe chadidi. Angasewera chakunama, ambasewwera chakuchoka mchilengedwe chache thangwe ngwakunama na babawo wa bzakunama. 45 Chensecho, thangwera kuti nimbasewera bzachadidi, mumbandikhulupirira lini. 46 Mbani waimwe ambandigaza pa bzakuphonya? Nimbasewera bzachadidi, thangweranyi tsono mumbandikhulupirira lini? 47 Iye omwe ngwa Mulungu ambabva mafala ya Mulungu; kusaya kumbayabvaku thangwe ndimwe lini wa Mulungu." 48 Ayuda adatawira achiti kuna iye, "Timbalewa lini chadidi ife kuti ndimwe waku Samariya apo muna chiwanda?" 49 Yesu adatawira, "Ndiribe chiwanda, soma nimbalemekeza Babangu, apo imwe mkumbandipepusa. 50 Mumbapsaga lini ulemerero; alipo m'bodzi nyakubutewera na kubutonga. 51 Indetu, indetu, ndikulewa kuna imwe, penu wina anikoya mafala yangu, amdzaona lini imfa." 52 Ayuda adati kuna iye, "Tsapano tikudziwa kuti muna chiwanda. Abulahamu na aneneri adasaika, soma mumbati, 'Penu wina anikoya mafala yangu, amdzalawidza lini imfa.' 53 Kodi ndimwe lini mkulu kuposa Abulahamu adasaika ule? Aneneri adasaika pomwe. Imwepo mumbabzitenga kuti ndimwe mbani?" 54 Yesu adatawira, "Penu ine nim'bzilemekeza ndekha ulemerero bwangu m'bwapezi; ni Babangu ndiye ambandilemekeza---omwe mumbalewa bza iye kuti ni Mulungu wanu. 55 Imwe mumbamudziwa lini iye, soma ine nimbamudziwa. Ningadati, 'Nimbamudziwa lini,' ningadandendemera namwe, nyakunama. Tsono, nimbamudziwa nakukoya mafala yache. 56 Babanu Abulahamu adadekedwa kuona ntsiku yangu; iye adayiona apo akhali wakudekedwa." 57 Ayuda adati kuna iye, "Mukanati kufikiza magole makumi machanu, ndiye mudamuona Abulahamu imwepo?" 58 Yesu adati kuna iwo, " Indetu, indetu, ndikulewa kuna imwe, akanati kukhala Abulahamu mkuti, INE NDIRIPO." 59 Kinangoka iwo adalokota minyala kuti amubome iye, soma Yesu adabzibisa yekha achibula mkachisimo.