¹ Bzitamala inzi, Yesu adazunga mu Galileya, thangwe akhafuna lini kuyenda ku Yudeya nakuti Ayuda akhamupsaga kuti amuphe. ² Tsapano madyerero ya misasa ya Ayuda yakhali pafupi. ³ Abale wache tsono adati kuna iye, "Chokani pano ndokoni ku Yudeya, pala kuti wakupfunza wanu akaonembo mabasa mumbachitaya. ⁴ Palibe ambachita chinthu mwakubisa angakhala akupsaga kuti adziwike padecha. Penu mumbachita bzobzi, bzionesereni kudziko lapansi." ⁵ Nakuti neye abale wache alibe kumukhulupirira iye. ⁶ Yesu mnthangwerache adati kuna iwo, "Nthawe yangu ikanati kufika, soma nthawe yanu njakufikafika kale nthawe zense. ⁷ Dziko lapansi lingakuwengeni lini, soma limbawenga ine thangwe nimbalichitira umboni kuti mabasa yache ngakuipa. ⁸ Mumbakwira kuyenda ku madyerero; Ine ndikumbayenda lini kumadyerero thangwe nthawe yangu ikanati kukwanirisiwa." ⁹ Atamala kulewa bzobzi kuna iwo, iye adakhala mu Galileya. ¹⁰ Soma pomwe abale wache akhadakwira kuyenda ku madyerero, kinangoka iye adakwirambo, sikuti mwakuonekera soma mwakubisala. ¹¹ Ayuda akhamupsaga pa madyereropo achiti, "Iye ali kuponi?" ¹² Pakhana bzakuuzana bzizinji pathimupo kumbaguna bza iye. Winango adati, "Ni munthu wabwino." Winango adati, "Neye, ambasocheresa wanthu azinji." ¹³ Chensenecho palibe adasewera padecha kuguma iye thangwera kugopa Ayuda. ¹⁴ Pomwe madyerero yadafika pakati, Yesu adakwira kuyenda mkachisi mkukayamba kupfunzisa. ¹⁵ Kinangoka Ayuda adadabwa, mkulewa kuti. "Munthu umweyu ambadziwa tani bzizinji tenepayu? Kupfunza akanati," ¹⁶ Yesu adawatawira achiti, "Bzakupfunzisa bzangubzi m'bzaine lini, soma m'bza iye omwe adandituma. ¹⁷ Penu wina anikhumba kuchita bzakufuna bzache, amdzazindikira bza chipfunzisochi, kuti mchakuchokera kuna Mulungu, ayai nimbatondo kusewera bzangu bzandekha. ¹⁸ Omwe ambasewwera bzache bzayekha ambapsaga ulemerero bwache bzayekha, soma ndiye akupsaga ulemerero bwa omwe adamutuma, munthu umweyo ngwachadidi, apo mwaiye mulibe chakusaya kulungama. ¹⁹ Kodi Mose alibe kukupani chitongi? Soma palibe neye. m'bodzi waimwe ndiye ambachikoya. Mthangweranyi mukupsaga kufuna kundipha?" ²⁰ Thimu lire lidatawira, "Muna chiwanda imwe. Mbani akupsaga a kukuphaniyo?" ²¹ Yesu adatawira achiti kuna iwo, "Ndidachita basa libodzi, apo mwensene mudadabwa nalo. ²² Mose adakupani mgwatidwe (sikuti udachoka kuna Mose, soma kuna makolo), nsiku ya Sabudu mumbagwata munthu. ²³ Penu munthu anitambira mngwatidwe pa Sabudu mkuti chitongi cha Mose chiribe kupsewa, thangweranyi mukukalipa na ine thangwe ndidalimbisiratu bwino bwino munthuyo pa Sabudu? ²⁴ Nampodi kutonga kutengera maonekedwe, soma tongani mwachilungamo." ²⁵ Wanthu winango wa iwo wakuchokera ku Yerusalemu adati, "Ngumweyu lini akumupsaga kuti amuphe ule? ²⁶ Onani, akusewera padecha, apo akumuuza lini chinthu. Bzingakhale lini kuti akulu akuluwa akudziwadi kuti umweyu ni Mkhirisitu, mtenepo lini? ²⁷ Soma tikudziwa ndiko iyeyu akuchokera. Soma Mkhirisitu pakudzabwera, palibe ndiye amdzadziwa ndiko amdzachokera." ²⁸ Kinangoka Yesu adakuwa mkachisi, "Ine mumbandidziwa na ndiko nimbachokera kubodzi. Ndiribe kubwera bzandekha, soma iye omwe adandituma ngwachadidi, apo mumbandidziwa lini. ²⁹ Ine nimbamudziwa thangwe nimbachokera mwa iye apo adachita kundituma." ³⁰ Iwo akhayezera yezera kuti amumange, soma palibe adaikha manja pa iye thangwe nthawe yache ikhanati kufika. ³¹ Soma azinji pathimu lire akhamukhulupirira, apo adati, "Mkhirisituyo angabwera, amdzachita bzizindikiro bzizinji kuposa ndibzo wachita uyubzi?" ³² Afarisi adabva thimu lire likusewera kawerewere bzakuguma Yesu, ndiye akulu wa ansembe na Afarisi adatuma anyamata kukamumanga iye. ³³ Tsapano Yesu adati, "Ndikali namwe kwa kanthawe kakuchepa, kinangoka ndiyende kuna iye omwe adandituma. ³⁴ Mum'dzandipsaga soma mum'dzandigumana lini; komwe niyendako, mum'dzakwanisa lini kubwera." ³⁵ Ayuda tsono adati okha okha, "Munthu umweyu am'dzayenda kuponi ndiko tingadzakwanise lini kumugumana? Kodi am'dzayenda kuna Ahelene wakubalalika wale kukapfunzisa Ahelene? ³⁶ Mafala waseweraya nga chani, 'Mum'dzandipsaga soma mum'dzandigumana lini ine; Ndiko nim'dzayendako, mum'dzakwanisa lini kubwera'?" ³⁷ Tsapano pakumaliza, nsiku ikulu ya madyerero, Yesu adaima achikuwa, kulewa kuti, "Penu wina akubva nyota, abwere kuna ine adzamwe. ³⁸ Iye wakukhulupirira ine, ninga ndimo mafala ya Mulungu yambalewera, mikulo ya madzi ya moyo im'dzayerera kubula mmimba mwache." ³⁹ Soma adalewa ibzi bza Mzimu, wa iwo ndiwo akhakhulupirira iye kuti ati adzatambire; Mzimu ukhanati kuperekiwa thangwe Yesu akhanati kulemekeziwa panthawe yoyo. ⁴⁰ Wanthu winango wa thimulo, pakubva mafalaya, adati, "Uyu ni mneneri." ⁴¹ Winango adati, "Umweyu ni mkhirisitu." Soma winango adati, "Kodi Mkhirisitu ambachokera ku Galileya? ⁴² Manemba yalibe kulewa kuti Mkhirisitu amdzachokera ku dzinza la Davide na ku Beterehemu, muyi ndiwo Davide akhali?" ⁴³ Ndiye padayambika m'gawaniko pa thimulo thangwera iye. ⁴⁴ Winango wa iwo ate angadamumanga iye, soma palibe adaikha manja pa iye. ⁴⁵ Kinangoka anyamata wale adabwerera kuna akulu wa ansembe na Afarisi, omwe adati kuna iwo, "Thangweranyi mulibe kumubweresa?" ⁴⁶ Anyamatawo adatawira, "Palibe adasewera kale tenepayu." ⁴⁷ Ndiye Afarisi adawatawira iwo, "Kani mwanyengezewambo? ⁴⁸ Alipo m'bodzimbo wa akulu ayai Afarisi ndiye adamukhulupirira kale iye? ⁴⁹ Soma thimu ili lomwe likudziwa lini chitongi, ndakutembereriwa." ⁵⁰ Nicodemo (m'bodzi wa Afarisi, omwe adabwera kuna iye mwakuyambirira) adati kuna iwo, ⁵¹ "Kodi chitongi chathu chimbatonga munthu tikanati kubva kuchoka kuna iye na kudziwa bzomwe ambachita?" ⁵² Iwo adatawira achiti kuna iye, "Kani ndiwe m'Galileya pomwe iwepo? Saka sakani muone kuti palibe mneneri ambachoka ku Galileya." ⁵³ [ Kinangoka aliyense adayenda kumuyi kwache.