1 Bzitamala ibzi Yesu adayambuka ng'ambu ina ya Nyanza ya Galileya, yakuchemeriwa pomwe kuti Nyanza ya Tiberiyo. 2 Thimu lizinji likhamutewera thangwe adaona bzakudabwisa ndibzo iye akhachita kuna atenda. 3 Yesu adakwira paphiri achikakhala pansi na wakupfunza wache popo. 4 (Tsapano Pasaka, madyerero ya Ayuda, yakhali pafupi.) 5 Pomwe Yesu adajiguma achiona thimu lizinji likubwera kuna iye, adati kuna Filipi, "Umkagula kuponi mikate kuti amwewa adye?" 6 (Soma Yesu adasewera bzobzi kufuna kumuyezera Filipi, thangwe akhadziwa kuti iye ndiye amchita.) 7 Filipi adamutawira iye, "Dinari madzana mawiri kugula mikate ingakwane lini kuti aliyense atambire neye pankiti pankiti pokha." 8 M'bodzi wa wakupfunza, Andireya, m'bale wache wa Simoni Petulo, adati kuna Yesu, 9 "Pana mnyamata m'bodzi pano omwe ana mikate zishanu ya tirigu wa barere na nsomba ziwiri, soma zozi mchiyani kuna azinjiwa tere?" 10 Yesu adati, "Akhazikeni pansi wanthuwa." Tsapano pakhana upsa buzinji pambutopo. Apo amunawo adakhala pansi, pafupi fupi bzulu bzishanu kuwanda kwao. 11 Kinangoka Yesu adatenga pawu zire apo atapereka kutenda, adazigawanisa kuna akhadakhala pansi wale. Adachita bzibodzi bodzi na nsomba zire, mwakuwanda ndimo adafunira. 12 Pomwe wanthu adakhuta, iye adati kuna wakupfunzira wache, "Khongobzani mvululu zakusalazi, kuti nampodi patayike chinthu." 13 Ndiye adazikhongobza zichidzala bzitundu khumi na bziwri bza mvululu zakuchoka mu mikate mishanu ya barere zakusiiwa na omwe akhadadya. 14 Kinangoka, pomwe wanthu adaona chakudabwisa ichi ndicho iye adachita, adati, "Mchadidi uyu ni mneneri omwe amkubwera mdziko lapansi. 15 Pomwe Yesu adazindikira kuti iwo akhadasala pang'ono kudzamuphata mwa kungingimiza kuti amuikhe ufumu, adathawira pomwe kuphiri yekha. 16 Pomwe maulo yadakwana, wakupfunza wache adapolika kuyenda ku nyanza. 17 Adapakira mwadiya, achiyenda napanyanza ku Kaperenawo. Kukhadadoka nthawe yoyi, apo Yesu akhanati kubwerera kuna iwo. 18 Chonzi cha mphamvu chikhakuntha apo nyanzayo ikhagwedezeka. 19 Atachapa ma sitadiya makumi mawiri na mashanu ayai makumi matatu, adaona Yesu akufamba pa nyanzapo kumbabwera kufupi na mwadiyayo, apo iwo adabva mantha. 20 Soma iye adati kuna iwo, "Ndine! Nampodi kubva mantha." 21 Kinangoka adabvuma kumutambira mmwadiyamo, apo kamkulumize mwadiyayo udafika ng'ambu ndiyo iwo akhayenda. 22 Mangwana yache, thimu ndilo likhadaima ng'ambu ire lidaona kuti pakhalibe mwadiya wina kupambula umweyo, nakudziwa pomwe kuti Yesu akhalibe kupakiriratu na wakupfunza wachewo soma kuti wakupfunzira wachewo akhadatoma kupakira okha. 23 Tsapano, pakhana mimwadiya inango yakuchoka ku Tiberiyo kufupi na kumbuto ndiko akhadadya mikate ire Mbuya atapereka kutenda. 24 Pomwe thimu lidazindikira kuti neye Yesu ayai wakupfunza wache wense pakhalibe, lidapakira mwadiya lokha mkuyenda ku Kaperenawo kukapsaga Yesu. 25 Atakamugumana ng'ambu inango ya nyanzayo, adati kuna iye, "Rabbi, mudabwera liti kuno?" 26 Yesu adawatawira, kulewa kuti, "Indetu, indetu mukundipsagapa ine, sikuti thangwera mudaona bzakudabwisa, soma mudadya nawo mikate ire muchikhuta. 27 Nampodi kubonera na chakudya chakumala, soma bonerani na chakudya chakukhalisa kukufikizani ku moyo wakusaya kumala omwe Mwana wa Munthu amdzakupani, nakuti Mulungu Baba waikha chizindikiro pa iye." 28 Kinangoka iwo adati kuna iye, "Tichite chani, pala kuti tiphate basa la Mulungu?" 29 Yesu adatawira achiti kuna iwo, "Iri ni basa la Mulungu: Kuti mukhulupirire iye omwe wamutuma." 30 Ndiye adati kuna iye, "Mchizindikiro chanyi tsono ndicho munichita, pala kuti tione na kukukhulupirirani? Munichita chani? 31 Makolo yathu yadadya mana mchipululu, ninga ndimo bzidanembewera, 'Iye akhawapa mikate kuchoka kudzaulu kuti adye.'" 32 Kinangoka Yesu adawatawira, "Indetu, indetu, ni Mose lini ndiye akhakupani mikate kuchokera kudzaulu, soma ni Babangu ndiye akukupani mikate chaiyo kuchoka kudzaulu. 33 Thangwe mkate wa Mulungu ngule umbagwa kuchoka kudzaulu uchipereka moyo kudziko lapansi." 34 Ndiye adati kuna iye, "Mbuya, mbatipani mkate umweyu nthawe zense." 35 Yesu adati kuna iwo, "Ndine mkate wamoyo; iye wakubwera kuna ine amdzabva lini njala, na wakukhulupirira ine amdzabva lini nyota. 36 Soma ndidakuuzani kuti chadidi mwandiona ine, apo mukukhulupirira lini. 37 Aliyense ndiye Baba amndipasira kubwera kuna ine nimdzamutaya lini kunja. 38 Nakuti ndabuluka kuchoka kudzaulu, sikuti kudzachita bzakufuna bzandekha, soma bzakufuna bza iye omwe adandituma. 39 Uku mkufuna kwa iye omwe adandituma, kuti nampodi nditaye neye m'bodzi omwe wandipasira, soma amdzawalamusa pansiku ya chimaliziro. 40 Nakuti uku mukufuna kwa Babangu, kuti aliyense wakuona Mwana mkumukhulupirira adzakhale na moyo wakusaya kumala apo nimdzamulamusa pansiku yachimaliziro." 41 Kinangoka Ayuda adang'ung'udza bza iye thangwera adati, "Ndine mkate omwe wabuluka kudzaulu." 42 Iwo adati, "Ngumweyu lini Yesu Mwana wa Yosefe, omwe Babache na mayi wache tikuwadziwawa? Bzikukhala tani tsono kulewa, 'Ndabuluka kudzaulu'?" 43 Yesu adatawira achiti kuna iwo "Lekani kung'ung'udza mwekha. 44 Palibe angabwere kuna ine pokha pokha Baba omwe adandituma kumufendeza, apo nimdzamumukisa pansiku ya chimaliziro. 45 Bzidanembiwa mwa aneneri, 'Aliyense amdzapfunzisiwa na Mulungu.' Aliyense ndiye wabva na kupfunza kuchoka kuna Baba ambabwera kuna ine. 46 Sikuti kuti aliyense waona Baba, kupambula iye omwe ngwakuchokera kuna Mulungu---ndiye waona Baba. 47 Indetu, indetu, iye omwe ambakhulupirira ana moyo wakusaya kumala. 48 Ndine mkate wamoyo. 49 Abereki wanu adadya mana mchipululu, apo adafa. 50 Uyu ni mkate wakubuluka kuchokera kudzaulu, pala kuti munthu adye wina wa iwo kuti nampodi afe. 51 Ndine mkate wamoyo omwe udabuluka kuchoka kudzaulu. Penu wina anidya wina wa mkateyu, amdzakhala kunthawe za nthawe. Mkate ndiwo nimdzaperekayo ni thupi langu kuti ukhale moyo wapadziko lapansi." 52 Pamwepo Ayuda zjai adakalipa achiyambiratu kung'ung'udza, kulewa kuti, "Munthu umweyu angatipe tani thupi lache kuti tidye?" 53 Ndiye Yesu adati kuna iwo, "Indetu, indetu, penu munidya lini thupi la Mwana wa Munthu na kumwa mulopa wache, mumdzakhala lini na moyo mwaimwe mwekha. 54 Omwe anidya thupi langu na kumwa mulopa wangu ana moyo wakusaya kumala, apo nimdzamulamusa pansiku yakumalizira. 55 Thangwe thupi langu mchakudya chachadidi, apo mulopa wangu ni chakumwa chachadidi. 56 Iye wakudya thupi langu na kumwa mulopa wangu am'khaliratu mwaine, na ine mwa iye. 57 Ninga Baba wamoyo adandituma ine, apo inembo ndina moyo thangwera Baba, ndendende wakundidya ine, amdzakhalambo thangwera ine. 58 Uyu ni mkate ndiwo wabuluka kuchoka kudzaulu, sikuti ninga udadya makolo achifawo neye. Iye wakudya mkate uyu amdzakhala ku nthawe za nthawe." 59 Soma Yesu bzobzi adasewerera mu sunagoge pomwe akhapfunzisa mu Caperenawo. 60 Kinangoka wakupfunza wache azinji omwe adabva ibzi adati, "Mafalaya ngakunesa; Mbani angayabvese?" 61 Yesu, thangwe adadziwa mwa iye yekha kuti wakupfunza wache akhang'ung'udza nayo, adati kuna iwo, "Yakuipirani kani? 62 Tsono tani muchiona Mwana wa Munthu akuyenda pomwe kudzaulu ndiko akhali pakutoma? 63 Ni Mzimu ndiwo umbapasa moyo; thupi limbathandiza lini chinthu. Mafala ndiyo ndasewera kuna imwe ndiyo Mzimu, apo ndiyo moyo. 64 Ndiye pana wina wa imwe omwe mumbakhulupirira lini." Thangwe Yesu adazindikira kuyambira pakutoma kuti akhali aponi omwe amdzakhulupirira lini na ndiye amdzamupereka iye. Iye adati, 65 "Nithangwera chochi ndidakuuzani kuti palibe angathe kubwera kuna ine pokha pokha chitapasiwa kuna iye na Babangu." 66 Thangwera ichi, wakupfunza wache azinji adabwerera mmambuyo apo alibe kufamba naye pomwe. 67 Ndiye Yesu adati kuna khumi na awiri wale, "Imwe mukufunambo lini kuchoka, mumfuna?" 68 Simoni Petulo adamutawira iye, "Mbuya, mkwambani ndiko tingayende? Muna mafala ya kumoyo wakusaya kumala, apo takhulupirira mpaka kufika pakudziwa kuti ndimwe Wakuchena wa 69 Mulungu." 70 Yesu adati kuna iwo, "Ndiribe kuchita kukusankhulani, khumi na awirimwe, apo zjai m'bodzi wa imwe ni mdyerekezi?" 71 Tsapano iye adasewera bza Yudasi mwana wa Simoni Isikariyoti, thangwe akhali iye, m'bodzi wa khumi na awiri wale, wakumpereka Yesu.