¹ Bzitamala ibzi pakhana madyerero ya Ayuda, apo Yesu adayenda ku Yerusalemu. ² Tsapano mu Yerusalemu pafupi na mpita wa litsito la mabira pana mchera, ndiwo mu chiseweredwe chachi mchi Heberi ambati Betesda, apo una nsodzi zishanu zakupsumphira bwino. ³ Wanthu azinji wakudwala, azimola, wakupunduka, ayai wakujejera bziwalo akhadagonesewa popo. Bzakunemba bzakale bziribe ndime 4 iyi yakumbati, ⁴ Nakuti mnjero wa Mbuya adayenda kukabvundula madzi nthawe zina apo aliyense wakupita momo madziyo yakanati kudemba adalimba nthenda iriyense ndiyo akhadwala. ⁵ Munthu wina akhali popo omwe akhadadwala kwa magole makumi matatu na masere. ⁶ Pomwe Yesu adamuona atagonesewa popo, nakuzindikira kuti akhadakhalisa popo, adati kuna iye, "Kodi ukufuna kulimba?" ⁷ Wakudwalayo adatawira, "Mbuya, ndiribe aliyense wakundipisa mnthawalemu madzi yangabvunduliwa. Ningabwera, wina atsogole kutchithima na nsikadazi." ⁸ Yesu adati kuna iye, "Lamuka, takula mphasa yako, ufambe." ⁹ Kamfulumize munthuyo adalimbisiwa, achitakula mphasa yache mkufamba. Tsapano nsiku yoyo ikhali ya Sabudu. ¹⁰ Tsapano Ayuda adati kuna ndiye adalimbisiwayo, "Ni Sabudu apo ukubvumiziwa lini kutakula mphasa yakoyi." ¹¹ Iye adatawira, "Omwe wandilimbisayo wanditi, 'Takula mphasa yako ufambe.'" ¹² Iwo adamubvunza iye, "Ni munthunyi umweyo adakuuza kuti, 'Itakule ufambe'?" ¹³ Tsono, munthu adalimbisiwayo alibe kudziwa kuti akhali mbani thangwe Yesu zjai akhadayenda kale kachete chete, thangwe pakhana thimu pambutopo. ¹⁴ Kinangoka, Yesu adagumana naye iye mkachisi achiti kuna iye,"Ona, zjai walimba! Nampodi kuphonya pomwe, pala kuti chinango chakuposa popa chingadzakuchitikire." ¹⁵ Munthuyo adayenda kukawauza Ayuda wale kuti akhali Yesu adamulimbisa ule. ¹⁶ Tsapano thangwera bzinthu bzobzi Ayuda adaboneresa Yesu, thangwe adachita bzobzi pa Sabudu. ¹⁷ Yesu adawatawira, "Baba wangu akuphata basa pakali pano, na ine, pomwe, ndikuphata basa." ¹⁸ Thangwera bzobzi, Ayuda zjai adakumbuka bzakumupha iye thangwe alibe kupsa Sabata yokha, soma pomwe adaguma Mulungu kuti ni Babache, zjai kubzindendemeza yekha na Mulungu. ¹⁹ Yesu adawatawira, "Indetu, indetu, Mwana angachite lini chinthu chayekha, kupambula bzokhabzo achiona Baba akuchita, nakuti chirichense akuchita Baba, Mwanambo ambachita ndendende. ²⁰ Nakuti Baba ambakonda Mwana apo ambamuonesa chirichense ndicho iwo ambachita, apo amdzamuonesa mabasa makulu kuposa yoya kuti ate mumdzadabwa. ²¹ Thangwe ninga ndimo Baba ambalamusira anyamuya achiwapa moyo, m'bzibodzi bodzimbo Mwana ambapa moyo kuna aliyense animfunayo. ²² Nakuti Baba ambayeruza lini aliyense soma adapa chiyeruzo chense kuna Mwana ²³ pala kuti aliyense akamulemekeze Mwanayo ninga ndimo ambalemekezera Baba. Omwe ambalemekeza lini Mwanayo ambalemekeza linimbo Baba omwe adamutuma. ²⁴ Indetu, indetu, iye wakubva mafala yangu na kukhulupirira iye omwe adandituma ana moyo wakusaya kumala apo amdzatongewa lini mulandu, soma wapambana kuchoka kuimfa kuyenda ku moyo. ²⁵ Idetu, indetu, ndikulewa kuna imwe nthawe ikubwera, apo iripo ndiyo wakufa amdzabva mafala ya Mwana wa Mulungu, apo omwe amdzabvayo amdzakhala na moyo. ²⁶ Nakuti ninga ba ana moyo mwa iye kha, ndendendembo adapa kuna Mwana moyo kukhala mwa iye yekha, ²⁷ apo Baba amupa mphamvu zakutonga thangwe ni Mwana wa Munthu. ²⁸ Nampodi kudabwa na bzobzi, nakuti iripo nthawe ikubwera yakuti aliyense ndiye ali mu nthutu amdzabva mafala yache ²⁹ achidzabula: omwe wachita bwino ku mmukiro wakumoyo, apo wakuchita bzakuipa ku mmukiro wa kukatongiwa. ³⁰ Ningachite lini chinthu pa ine ndekha. Pomwe ninibva, nimtonga, apo matongedwe yangu ngakulungama thangwe ndikupsaga lini bzakufuna bzangu bzandekha soma bzakufuna bza iye omwe adandituma. ³¹ Penu nimchita umboni bwa ine ndekha, umboni bwangubo bumdzakhala lini bwa chadidi. ³² Pana winango omwe ambachitira ine umboni, apo nimdziwa kuti umboni ambachitira inebo m'bwa chadidi. ³³ Mudatumiza kuna Yohani, apo wachitira umboni chadidi. ³⁴ Soma umboni ndibo ndatambira m'bwakuchoka lini kuna munthu. Ndikusewera ibzi kuti mukapulumusiwe. ³⁵ Yohani akhali kandiyero yakugaka na kubvunika, apo mukufuna kusekera na kubvunika kwache mkanthawe kakuchepa. ³⁶ Chensenecho umboni ndibo ndinabo m'bukulu kuposa bwa Yohani, nakuti mabasa ndiyo Baba andipa kuyakwanirisa, ni mabasa yokha yokhayo ndiyo nimbachita, uchitire umboni bza ine kuti ³⁷ Baba ndiye andituma. Baba omwe adanditumayo wachitira pomwe yekha umboni bza ine. Mukanati kubva kale mafala yache ayai kumuona maonekedwe yache neye nthawe inangombo. ³⁸ Imwe mulibe mafala yache yakutsalira mwa imwe, nakuti mukukhulupirira lini mwa iye omwe adatumiwa. ³⁹ apo mafala mabodzi bodziyo yambachitira umboni bza ine, apo mukufuna lini kubwera kuna ine kuti mukhale na moyo. ⁴¹ Nimbatambira lini ulemerero kuchoka kuna wanthu, ⁴² soma ndikudziwa kuti mulibe chikondi cha kwa Mulungu mwa imwe mwekha. ⁴³ Ndabwera mu dzina la Baba, apo mukunditambira lini. Winango angadati abwere mudzina lache chailo, apa mungadamutambira. ⁴⁴ Mungakhulupirire tani, imwe omwe mumbabvuma ulemerero bwakuchoka kuna wina na mwayache soma mukupsaga lini ulemerero bwakuchoka kuna Mulungu yekhayo? ⁴⁵ Nampodi kukumbuka kuti nimdzakulewerani kuna Baba. Wakudzakulewerani ni Mose, omwe mwaiye mwamuthemba. ⁴⁶ Penudi mudamkhulupirira Mose, mungadakhulupirira pomwe ine, thangwe iye adanemba bza ine. ⁴⁷ Penu mungakhulupirire lini bzakunemba bzache, mungakhulupirire tani mafala yangu?"