¹ Tsapano pomwe Yesu adadziwa kuti Afarisi akhadabva kuti iye akhatenga na kubatiza wakupfunza azinji kuposa Yohani ² (napo kuti iye Yesu akhabatiza lini, soma wakupfunza wache ndiwo), ³ adachoka mu Yudeya mkubwerera pomwe mmambuyo ku Galileya. ⁴ Soma bzikhali bzakufunika kuna iye kudzera ku Samariya. ⁵ Ndiye adabwera mu mzinda wa Samariya, wakuchemeriwa Sika, pafupi na mbuto ndiyo Yakobo akhadapasa mwanache Yosefe. ⁶ Mchera wa Yakobo ukhali kumweko. Yesu akhadaneta na ulendo bwache ndiye adakhala pafupi na mcherayo. Zikhathamangira nyhawe zitanthatu. ⁷ Mkazi wa ku Samariya adabwera kudzatunga madzi, apo Yesu adati kuna iye, "Ndipasembo madzi ndimwe." ⁸ Nakuti wakupfunza wache akhadayenda mumzinda kukagula chakudya. ⁹ Ndiye mkazi wa ku Samariya ule adati kuna iye, "Bzakhala tani kuti imwe, pakukhala mu Yuda, mkukumbira ine, mkazi waku Samariya, chinthu kuti mumwe?" Nakuti Ayuda alibe basa na Asamariya. ¹⁰ Yesu adatawira achiti kuna iye, "Ungadadziwa mphatso ya Mulungu, nakuti mbani akusewera, nawe, 'Ndipase chakumwa,' ungadamubvunza, apo angadakupasa madzi ya Moyo." ¹¹ Mkaziyo adati kuna iye,"Mbuya, mulibe m'golo apo mcherayu pomwe ngwakuzika. Madzi ya moyoyo tsono yali ku? ¹² Ndimwe lini mkulu, neye tenepo,kuposa baba wathu Yakobo, omwe adatipa mcherayu iye achimwambo mwemu, ninga akhachitira wanache na bzifuwo bzache?" ¹³ Yesu adatawira achiti kuna iye, "Aliyense wakumwa mumchera uyu amdzabva pomwe nyota, ¹⁴ soma ndiye animwa madzi ndiyo nimmupa ine amdzabva lini pomwe nyota. Mmalo mwache, madzi ndiyo nimdzamupa yamdzakhala lowe wa madzi kuna iye, kufumphukira ku moyo wakusaya kumala." ¹⁵ Mkaziyo adati kuna iye, "Mbuya, ndipeni madzi yamweyo kuti nampodi ndidzakhale na nyota na kuti nampodi nimbadzabwere pomwe pano kudzatunga madzi." ¹⁶ Yesu adati kuna iye, "Ndoko, ukachemere bayako, apo mukabwere pomwe kuno." ¹⁷ Mkaziyo adatawira achiti kuna iye, "Ndiribe mwamuna." Yesu adatawira, "Walewa bwino,' ¹⁸ thangwe wakhala nawo kale amuna ashanu, apo ndiye uli naye panoyo ni bayako lini. Bzomwe walewabzi mchadidi." ¹⁹ Mkaziyo adati kuna iye, "Mbuya, ndikuona kuti ndimwe mneneri. ²⁰ Azibabathu akhanamatira pa phiri iri, soma mumbati Yerusalemu ndiyo mbuto yakukanamatira." ²¹ Yesu adati kuna iye,"Khulupirira ine, mkaziwe, kuti nthawe ikubwera ndiyo mumdzanamata Baba sikuti paphiripa ayai mu Yerusalemu. ²² Mumbanamata ndibzo mum'bzidziwa lini. Timbanamata ndiye tikumudziwa, nakuti chipulumuso chimchokera kuna Ayuda. ²³ Soma, nthawe ikubwera, mwakuti tsapano yafika, pomwe wakunamata bzachadidi amdzanamata Baba mu mzimu na mchadidi, nakuti Baba akupsaga wanthu ninga amwewo kukhala wakunamata wache. ²⁴ Mulungu ni Mzimu, apo wanthu wakunamata iye amunamate mu mzimu na mchadidi." ²⁵ Mkaziyo adati kuna iye, "Ndikudziwa kuti Mesiya akubwera (ule wakuchemeriwa Mkhirisitu) Angabwera, amdzatifokotozera bzensene." ²⁶ Yesu adati kuna iye, Ndine letu umweyo, ndikusewera nawe panone." ²⁷ Pakamphindi kamweko wakupfunza wache adabwerera. Tsapano akhadabwa thangweranyi iye akhalewalewa na mkazi, soma palibe adati, "Mukuchita chani?" ayai "Thangweranyi mukulewalewa naye?" ²⁸ Tsapano mkaziyo adamusiira mtsuko wamadzi, achibwerera mumzinda, Achikati kuna wanthu, ²⁹ "Bwerani, mudzaone mwamuna omwe wandifokotozera bzense bzomwe ndakhala ndikuchita. Umweyu angakhale lini Mkhirisitu ule, si tenepo?" ³⁰ Iwo adachoka mumzindamo achibweradi kuna iye. ³¹ Panthawe yoyo, wakupfunza wache akhamukumbira iye, kulewa kuti, "Rabbi, dyani." ³² Soma iye adati kuna iwo, "Ndina chakudya kuti ndidye chakuti mumchidziwa lini." ³³ Ndiye wakupfunza wale adati kuna wina na mwayache, "Palibe ndiye wawabweresera chakudya kuti adye, alipo?" ³⁴ Yesu adati kuna iwo, "Chakudya changu mkuchita chifuniro cha iye ndiye adandituma na kumaliza basa lache. ³⁵ Kodi mumbati lini, 'Pakana miyezi minayi kinangoka bzakukolola bzifike'? Ndikulewa kuna imwe, nyang'anani muone mminda, thangwe bzakhuma kale pala kukolola! ³⁶ Iye omwe akukolola ambatambira malipiro achigwezeka bzipatso pala moyo wakusaya kumala, kuti iye. wakufesa na iye wakukolola asekerere pabobdzi. ³⁹ Asamariya azinji mumzindamo adamukhulupirira thangwera kulewa kwa mkaziyo omwe adachitira umboni, "Adandiuza chirichense chomwe ndachita." ⁴⁰ Tsapano pomwe Asamariya adabwera kuna iye, adamukumbira kuti akhale nawo, apo adakhala popo nsiku ziwiri. ⁴¹ Azinji adakhulupirira thangwera mafala ya iye. ⁴² Iwo adati kuna mkaziyo, "Tikukhululupirira lini pomwe thangwera kuti udalewa bzire, soma thangwera kuti ife tabva tekha, apo tikudziwa kuti uyudi ni Mpulumusi wadziko lapansi." ⁴³ Patapita nsiku ziwirizo, adanyamuka kuchoka pamwepo kuyenda ku Galileya. ⁴⁴ Nakuti Yesu mwenekachiro adalewa kuti mneneri ambalemekeziwa lini mphimpha zakwawo. ⁴⁵ Pomwe adabwera mu Galileya, wanthu waku Galileya adamutambira. Akhadaona kale bzomwe iye adachita mu Yerusalemu pa madyerero, nakuti iwo akhadayendambo ku madyereroyo. ⁴⁶ Tsapano adabwera pomwe ku Kana mu Galileya, kule ndiko adasandusa madzi vinyu. Pakhana mkulu waboma omwe mwanache mamuna akhadwala ku Kaperenawo. ⁴⁷ Pomwe adabva kuti Yesu wachoka ku Yudeya wabwera ku Galileya, adayenda kuna Yesuko kukamukumbira kuti apolike kunyansi akalimbise mwanache, omwe akhadasala pang'ono kusaika. ⁴⁸ Kinangoka Yesu adati kuna iye, "Pokha pokha utome waona bzizindikiro na bzakudabwisa, ndiye kuti ungakhulupirire. ⁴⁹ "Mkulu ule adati kuna iye, "Mbuya, polikani letu mwanangu akanati kusaikapa." ⁵⁰ Yesu adati kuna iye, "Ndoko. Mwanako zjai walimba." Munthuyo adakhulupirira mafala ndiyo Yesu adamuuza, apo adayenda. ⁵¹ mwe akhayenda kupolika, akapolo wache adagumana naye, mkumuuza kuti mwanacheyo walimba. ⁵² Tsono iye adabvunza nthawe ndiyo adayamba kulimba. Iwo adamutawira kuti, "Dzulo pa nthawe zinomwe manungo yadamuchoka." ⁵³ Kinangoka babachewa adazindikira kuti ikhalidi nthawe yoyo ndiyo Yesu adati kuna iye, "Mwanako walimba." Tsapano iye na banja lache lensene adakhulupirira. ⁵⁴ Ichi chikhali chizindikiro chachiwiri ndicho Yesu adachita atabula mu Yudeya kuyenda ku Galileya.