¹ Tsapano pakhana Mfarisi dzina lache Nicodemo, mkulu wa Ayuda. ² Munthu uyu adabwera kuna Yesu usiku achidzati kuna iye, "Rabbi, tikudziwa kuti ndimwe m'pfunzisi wakuchoka kuna Mulungu, thangwe palibe angachite bzizindikiro ndibzo mumbachitabzi pokha pokha Mulungu achikhala ali naye." ³ Yesu adamutawira, "lndetu, indetu, pokha pokha wina achibadwa pomwe ndiye angaone ufumu bwa Mulungu." ⁴ Nicodemo adati kuna iye, "Munthu angabadwe tani pomwe uko iye wakula kale? Angakapite lini pomwe kachiwiri mchiberekero cha mayi wache mkubadwa, angathe?" ⁵ Yesu adamutawira, "Indetu, Indetu, pokha pokha wina achibadwa pomwe na madzi na Mzimu, ndiye angakapite mu ufumu bwa Mulungu, ⁶ Iye wakubadwa kuthupi ni thupi, apo iye wakubadwa mwa Mzimu ni mzimu. ⁷ Nampodi kudabwa kuti ndakuuza kuti, 'Ukabadwe pomwe.' ⁸ Chonzi chimbayenda ndiko chimfuna, mumbachibva kuunga kwache, soma mumbadziwa lini ndiko chikuchokera ayai ndiko chikuyenda. Mtenepoyombo na munthu wakubadwa mwa Mzimu." ⁹ Nicodemo adatawira achiti kuna iye, "Bzobzi bzingakhale tani?" ¹⁰ Yesu adatawira achiti kuna iye, "Mesa ndiwe m'pfunzisi wa Isaraeri iwepo, tsono ukubvesesa lini tani bzobzi? ¹¹ Indetu, indetu, ndikulewa kuna iwe, timbasewera ndibzo tim'bzidziwa, tichimbachitira umboni ndibzo tabziona. Soma umbalamba kubvuma umboni bwathu. ¹² Ningati ndikukuuza bzinthu bza padziko lapansi pano ukukhulupirira lini, unikhulupirira tani ndichikuuza bzinthu bza kudzaulu? ¹³ Palibe ndiye adakwira kale kudzaulu kupambula iye omwe adabuluka kuchoka kudzauluko---Mwana wa Munthu. ¹⁴ Ninga ndimo Mose adadzusira mdzaulu nyoka mchipululu mule, mchibodzibodzi ndimo Mwana wa Munthu amdzadzusiwira mdzaulu, ¹⁵ pala kuti wensene wakukhulupirira iye akhale nawo Moyo wakusaya kumala. ¹⁶ Nakuti Mulungu adakonda dziko lapansi, natenepo adapereka Mwanache wakubadwa yekha, kuti aliyense wakukhulupirira iye nampodi atayike soma akhale nawo moyo wakusaya kumala. ¹⁷ Nakuti Mulungu alibe kutuma Mwanache kuti adzayeruze dziko lapansi, soma kudzapulumusa dziko lapansi kudzera mwa iye. ¹⁸ Wakukhulupirira mwa iye amdzayeruziwa lini, soma iye wakusaya kukhulupirira wayeruziwa kale thangwe alibe kukhulupirira mdzina la Mwana yekhayo wa Mulungu. ¹⁹ Iri ni thangwe la kudzayeruzira: kubvunika kwafika padziko lapansi, apo wanthu adakonda mdima kusiyana na kubvunika thangwe bzakuchita bzawo bzikhali bzakuipa. ²⁰ Thangwe aliyense wakuchita chakuipa ambawengana na kubvunika, apo ambabwera lini padecha, pala kuti bzakuchita bzache nampodi bzionekere. ²¹ Soma, iye wakuchita bzachadidi ambabwera padecha pala kuti bzionekere kuna wense kuti bzakuchita bzache bzachitika mwa Mulungu." ²² Bzitapita ibzi, Yesu na wakupfunzira wache adayenda kudziko la Yudeya. Kumweko adakhala kwa kanthawe achibatiza. ²³ Tsapano Yohani akhabatizambo ku Anoni kufupi na Salimu thangwe kukhana madzi mazinji kumweko. Wanthu akhabwera kuna iye apo akhadzabatiziwa, ²⁴ nakuti Yohani akhanati kuthusiwa kale mkaoko. ²⁵ Tsapano padayambika mkangano pakati pa wakupfunzira wa Yohani na m'Yuda thangwera msinda wakufula. ²⁶ Iwo adayenda kuna Yohani achikati kuna iye, "Rabbi, omwe akhana imwe ng'ambu ya Mkulo wa Yolodano, omwe mudamuchitira umboni ule zjai, nyang'anani, akumbabatiza, apo wensene zjai akumbayenda kuna iye." ²⁷ Yohani adatawira, "Munthu angatambire lini chirichense pokha pokha chitapasiwa kuna iye kuchoka kudzaulu. ²⁸ Imwe mwekha mungachitire umboni kuti ndidalewa kuti, 'Ndine lini Mkhirisitu,' soma mmalo mwache, 'Ndatondo kutumiziwa mwakutsogola.' ²⁹ Muloodwi ambakhala wache was mulooli. Tsapano mwayache wa mulooli, omwe ambayima achimubva iye, ambasekera kwene kwene thangwera mafala ya mulooli. Ichi, tsono, mchisekerero changu chakukwana. ³⁰ Iye akakule, soma ine ndikachepe. ³¹ Iye wakuchoka kudzaulu ngwakuposa wense. Iye wakuchoka padziko lapansi ngwa dziko lapansi basi apo ambasewerambo bza padziko lapansi. Iye wakuchokera kudzaulu ngwakuposa wense. ³² Ambachitira umboni ndibzo waona na kubva, soma palibe ambabvuma umboni bwache. ³³ Iye omwe watambira umboni bwache adaikha chizindikiro chache kuti Mulungu ngwa chadidi. ³⁴ Nakuti wakutumiwa na Mulungu ambasewera mafala ya Mulungu. Nakuti ambapasa lini Mzimu na mphimo. ³⁵ Baba ambakonda Mwana apo wapereka bzinthu bzense mmanja mwache. ³⁶ Iye wakukhulupirira Mwana ana moyo wakusaya kumala, soma wakusaya kubvera Mwanayo amdzaona lini moyo, soma ukali bwa Mulungu bumkhala pa iye."