¹ Patapita nsiku zitatu, kukhana msinda wa maloozi ku Cana na ku Galileya, apo mai wache wa Yesu akhali nawo popo. ² Yesu na wakupfunza wache adachemeriwa nawo ku malooziko. ³ Pomwe vinyu akhagawidwa, mayi wa Yesu adati kuna iye, "Alibe vinyu awa." ⁴ Yesu adati kuna iye, "Mkaziwe, msabwanyi ukubwera kuna ine? Nthawe yangu ikanati kukhana." ⁵ Mayi wache adati kuna wakutumikira, "Chirichense amkuuzanicho, mbachitani." ⁶ Tsapano pakhana mathenthe matanthatu yakuikhira madzi yakukonzewa na minyala yakuphatizira Ayuda pamisinda ya kufula, lirirense lakutalika maboko mawiri ayai matatu. ⁷ Yesu adati kuna iwo, "Dzazani mathentheya na madzi." Apo adayadzaza ate pamulomo. ⁸ Tsapano iye adauza wakutumikira, "Bulisani inangoya panja mukapase mkulu wakugawa bzinthu." Apo adachitadi tenepoyo. ⁹ Mkulu wakugawa ule adalawidza madziyo yomwe yakhadasanduka vinyu, soma alibe kudziwa komwe adachokera (soma wakutumikira omwe adakatunga madzi wale adadziwa). Kinangoka adachemera nyakuloolayo ¹⁰ achiti kuna iye, "Munthu aliyense ambatoma kupereka vinyu wakukoma kinangoka wakusaya kukoma wanthu angamala kuledzera. Soma iwe wakoya vinyu wakutapira ate nthawe zino." ¹¹ Chizindikiro chakutoma Yesu adachitira ku Cana waku Galileya, apo adazimbula ulemerero bwache, apo wakupfunza wache adamukhulupirira iye. ¹² Bzitamala ibzi, mayi wache, abale wache na wakupfunza wache adayenda kunyansi ku Caperenawo achikakhala koko nsiku zakuchepa. ¹³ Tsapano pasaka ya Ayuda idafendera, apo Yesu adayenda ate ku Yerusalemu. ¹⁴ Adakagumana wakugulisa ng'ombe zapakalosa na mabira na nkhangaiwa mkachisi, na akasinthesinthe atakhala momo. ¹⁵ Apo adawatchanga na mnchamu wabzingwe achiwafulusira panja wense kubula mkachisimo, kuphatanidza na mabira na ng'ombe kubodzi. Adambweza kobiri zangwingwingwi za akasinthesinthe achigunkhuliza meza zawo. ¹⁶ Kuna wakugulisa nkhangaiwa iye adati, " Chosani ibzi muno. Lekani kusandusa nyumba ya Baba wangu kukhala mbuto ya msika." ¹⁷ Wakupfunza wache adakumbukira bzomwe bzidanembiwa, "Kamfulumize kanu kamdzandidya ine." ¹⁸ Kinangoka Ayuda adatawira achiti kuna iye, "Mumtionesa chizindikiro chanyi, nakuti mukuchita ibzi?" ¹⁹ Yesu adatawira, Gwesani kachisiyu, apo nsiku zitatu ndiuyimise." ²⁰ Kinangoka Ayuda adati, "Kachisi umweyu adamangiwa magole makumi manayi na matanthatu, apo mungauyimise nsiku zitatu?" ²¹ Soma, akhalewa bza kachisi wathupi lache. ²² Atalamusiwa kuna wakusaika, wakupfunza wache adakumbukira kuti iye adasewera bzobzi, apo adakhulupirira manemba na mafalaya ndiyo Yesu akhadasewera. ²³ Tsapano pomwe iye akhali mu Yerusalemu pamsinda wa pasaka, azinji adakhulupirira mdzina lache pomwe adaona chizindikiro ndicho iye adachita. ²⁴ Soma Yesu alibe kuwakhulupirira iwo thangwe akhawadziwa wensene, ²⁵ thangwe alibe kufuna wina kuti achitire umboni kuna iye bza munthu, thangwe akhadziwa ndibzo bzikhali mwa munthu.