¹ Indetu, indetu, ndikulewa kuna imwe, iye omwe anipita lini na pamsuwo kuyenda mkhola la mabira, soma anichita kukwira na kwinango, munthu umweyo ni mbava,na gandanga. ² Omwe anipita na pamsuwo ni makabusa wa mabira. ³ Wakukhala pamsuwoyo animufungulira. Bira anibva mafala yache, achichemera mabira yacheyo na madzina achiyatsogolera kunja. ⁴ Angayabulisa kunja yacheyo, aniyatsogolera, apo mabirayo. yanimutewera, nakuti yambazindikira mafala yache. ⁵ Yamdzatewera lini mulendo soma mmalo mwache yamdzamuthawa, thangwe yamdziwa lini mafala ya alendo. ⁶ Yesu adasewera fanizoli kuna iwo, soma alibe kuzindikira kuti bzikhali chani bzomwe akhasewerabzi kuna iwo. ⁷ Ndiye Yesu adati pomwe kuna iwo, "Indetu, indetu, ndikulewa kuna imwe, ndine msuwo wa mabira. ⁸ Wense wakubwera patsogolo panguwo ni mbava na magandanga, soma mabira yalibe kuwatetekera. ⁹ Ndine msuwo. Penu aliyense anipita na inepano, amdzapulumusiwa; amdzayenda kunja na mkati kukagumana upsa bwakupsipirira. ¹⁰ Mbava imbabwerera lini bzinango kupambula kuba na kupha na kudzonga. Ine ndabwera kuti adzakhale na moyo na kukhala nawo wakuwanda. ¹¹ Ndine makabusa wabwino. Makabusa wabwino ambataya moyo wache thangwera mabira. ¹² Nyabasa wakupagaliwi ni makabusa lini apo mabirayo ngache lini. Waona mphumphi zikubwera ambasiya mabira mkuthawa, apo mphumphizo zimbazipsokonyola mkuzibalalisa. ¹³ Iye ambathawa thangwe ngwakupagaliwi apo ambatchenkha lini mabira. ¹⁴ Ndine makabusa wabwino, apo nimbazindikira zangu chaizo, apo zangu zimbandizindikira ine. ¹⁵ Baba ambandidziwa, apo inembo nimbawadziwa Babawo, apo nimbapereka moyo wangu thangwera mabira. ¹⁶ Ndina mabira inango ndiyo ngakuchokera lini mkholamu. Nimfunika ndiyabwerese pomwe, ndiye yamdzabva mafala yangu apo pamdzakhala thimu libodzi na makabusa m'bodzi. ¹⁷ Ili ni thangwerache Baba ambandikonda: Nimbapereka moyo wangu pambuto pakuti ningakautenge pomwe. ¹⁸ Palibe ndiye amnditengera, soma nimbapereka ndekha. Ndina mphamvu yakuutaya, na mphamvu yakuutenga pomwe. Ndatambira chitongi ichi kuchoka kuna Babangu." ¹⁹ M'gawaniko udaoneka pomwe pakati pa Ayuda thangwera mafala yoya. ²⁰ Azinji waiwo adati, "Ana chiwanda uyu apo pomwe ni nyamsala. Thangweranyi mumbamutetekera?" ²¹ Winango adati, "Aya ni mafala lini ya munthu wakuphatiwa na chiwanda. Chiwanda chingakwanise kufungula maso ya zimola?" ²² Ndiye ikhali nthawe ya Madyerero ya Kukonza pomwe mu Yerusalemu. Yakhali mainza, ²³ apo Yesu akhafamba famba mkachisi mkhumbi la Solomoni. ²⁴ Ndiye Ayuda adamuzungulira achiti kuna iye, "Ate lini mumdzatiikha ife mwakupenekera basi? Penu ndimwe Mkhirisitudi, tiuzeni padecha." ²⁵ Yesu adatawira kuna iwo, "Ndidakuuzani, soma mukukhulupirira lini. Mabasa ndiyo nimbachita mudzina la Babangu, aya yambachitira umboni bza ine. ²⁶ Chensenecho mumbakhulupirira lini basi thangwe ndimwe lini mabira yangu. ²⁹ Baba wangu, omwe wandipasa iyo kuna ine, nimkulu kuposa winango wensene, apo palibe ndiye angakwanise kuyapsokonyola mmanja mwa Baba. ³⁰ Ine na Baba ndife abodzi." ³¹ Kinangoka Ayuda adalokota pomwe minyala kuti amubome. ³² Yesu adawatawira iwo, "Ndakulatizani mabasa mazinji yabwino kuchoka kuna Baba. Ndiponi mwa mabasa yoya mukufuna kundibomera nalo?" ³³ Ayuda adamutawira iye, "Tikukubomerani lini thangwera basa labwino, soma thangwera makiriyado, thangwe imwe, munthu, zjai mukubziyeseratu Mulungu." ³⁴ Yesu adawatawira, "Bziribe kunembiwa mchitongi chanu, 'Ndidati, "Ndimwe milungu"'? ³⁵ Ningati adawachemera milungu, kuna ndiwo mafala ya Mulungu yadawafikira (apo mafalaya yangapseke lini), ³⁶ mukulewa kuna iye omwe Baba adamupambula achimtumiza mdziko lapansi, 'ukuchita makiriyado zjai,' thangwera ndidasewera kuti, 'ndine Mwana wa Mulungu'? ³⁷ Penu ndikuchita lini mabasa ya Babangu, nampodi kundikhulupirira. ³⁸ Soma penu ndikuyachita, neye muchisaya kundikhulupirira, khulupirirani mabasaya kuti muzindikire na kubvesesa kuti Baba ali mwa ine nakutimbo ine ndiri mwa Baba." ³⁹ Iwo adayezera kumuphata pomwe, soma adaphuzunyuka mmanja mwao. ⁴⁰ Adayenderatu pomwe kuyambuka Yolodano kumbuto ndiko Yohani akhabatizira pakutoma, apo adakhala kumweko. ⁴¹ Wanthu azinji adabwera kuna iye apo iwo adati, "Yohani indedi alibe kuchita bzizindikiro, soma bzensene ndibzo Yohani akhadalewa bza munthu umweyu m'bzachadidi." ⁴² Wanthu azinji zjai adamukhulupirira iye popo.