¹ Tsapano munthu winango dzina lache Lazalo akhadwala. Akhali wa ku Betania, muyi wa Mariya na nana wache Malita. ² Akhali Mariya omwe adadzoza Mbuya na mafuta yakununchira bwino achipukusa nzayo zache na tsisi lache, omwe mano wache Lazaro akhadwala. ³ Azinanawa kinangoka adatumiwa kuna Yesu, kukalewa, "Mbuya, onani, mumbamkonda ule akudwala." ⁴ Pomwe Yesu adabva bzobzi, adati, "Matendayo ngakuimfa lini soma nga ulemerero bwa Mulungu kuti Mwana wa Mulungu akatambire nayo ulemerero." ⁵ Tsapano Yesu akhakonda Malita na nana wacheyo na Lazaro. ⁶ Tsapano pomwe iye adabva kuti Lazaro akudwala, Yesu adayamba kubakakhala nsiku pomwe ziwiri pambuto akhalipo. ⁷ Kinangoka bzitamala ibzi, adati kuna wakupfunzira, "Mbatiye pomwe ku Yudeya." ⁸ Wakupfunza wale adati kuna iye, "Rabbi, pakalipano Ayuda akuyezera yezera kufuna kukubomani na minyala, ndiye mukubwerera pomwe mmambuyo kumweko?" ⁹ Yesu adatawira, "Kodi si pana nthawe khumi na ziwiri zakutoya kwa masikati? Penu wina anifamba masikati, amdzakhukhumudwa lini, thangwe ambaona na kutoya kwa dziko lino lapansi. ¹⁰ Tsono, penu anifamba usiku, amdzakhukhumudwa thangwe kutoya kuli lini mwaiye." ¹¹ Iye adasewera bzobzi, apo atamala bzimwebzi, adati kuna iwo, "Mwayathu Lazaro wagona, soma ndikuyenda pala kuti ndikamulamuse pa kugona pachepo." ¹² Wakupfunzawo tsono adati kuna iye, "Mbuya, penu wagona, amkalimba." ¹³ Tsapano Yesu akhadasewera bza imfa yache, soma iwo akhakumbuka kuti akhalewa bza kugona kwa kupuma. ¹⁴ Kinangoka Yesu adalewa kuna iwo padecha, "Lazaro wasaika. ¹⁵ Ndine wakudekedwa thangwera imwe, nakuti ndikhali lini koko pala mukhulupirire. Mbatiye kuna iye." ¹⁶ Tomaji, wakuchemeriwa Didimo, adati kuna wakupfunzira anzache, Mbatiyembo pala kuti tikafe naye pabodzi Yesu." ¹⁷ Pomwe Yesu adabwera, adagumana kuti Lazaro zjai akhadafuchiriwa kale mnthenje patapita kale nsiku zinayi. ¹⁸ Tsapano Betania akhali kufupi na kufupi na Yerusalemu, pafupifupi mastadiya khumi na machanu. ¹⁹ Ayuda azinji akhadabwera kuna Malita na Mariya, kudzaponda masamba bza mano wawoyo. ²⁰ Kinangoka Malita pomwe adabva kuti Yesu akhabwera, adayenda kukamuchingamira, soma Mariya akhadakhala mnyumba. ²¹ Malita kinangoka adati kuna Yesu, "Mbuya, Mungadakhala mukhali pano, mano wangu angadasaika lini. ²² Napo tsapano lino, ndikudziwa kuti chirichense muchikumbira kuna Mulungu, amdzakupani." ²³ Yesu adati kuna iye, "Mano wako anilamuka pomwe." ²⁴ Malita adati kuna iye, "Ndikudziwa kuti amdzalamuka pomwe mu mmukiro pansiku yakumaliza." ²⁵ Yesu adati kuna iye, "Ndine mmukiro na moyo; iye wakukhulupirira ine, napo achisaika, amdzakhala pomwe na moyo; ²⁶ apo aliyense wakukhala na moyo achikhulupirira mwa ine amdzasaika lini. Kodi ukukhulupirira ichi?" ²⁷ Iye adati kuna iye, "Inde, Mbuya, ndikukhulupirira kuti ndimwe Mkhirisitu, Mwana wa Mulungu, omwe akubwera kudziko lapansi." ²⁸ Pomwe adalewa ibzi, iye adayenda achikachemerera nana wacheyo Mariya pamphepete. Iye adati, "Mpfunzisi ali muno apo akukuchemera." ²⁹ Pomwe iye adabva bzobzi, adalamuka kamkulumize achiyenda kuna iye. ³⁰ Tsapano Yesuyo akhanati kufikiratu mmuyimo soma akhali pambuto pomwe adagumana na Malita pale. ³¹ Tsono pomwe Ayuda, omwe akhana iye mnyumbamo kumuponda masamba, adaona Mariya kulamuka kamkulumize kubula panja, adamutewera, kukumbuka kuti akhayenda kuthenje kukalira koko. ³² Pomwe Mariya adabwera pambuto ndipo pakhana Yesupo mkumuona, adagwa pansi panzayo zache achiti kuna iye, "Mbuya, Mungadakhala mukhali pano, mano wangu angadasaika lini." ³³ Pomwe Yesu adamuona iye kulira, na Ayuda adabwera nayewo kumbalira pomwe, adakhudzika maninge mumtima mwache achibonera; ³⁴ iye adati, "Mwamuikha kuponi?" Iwo adati kuna iye, "Mbuya, bwerani mudzaone." ³⁵ Yesu adalira. ³⁶ Kinangoka Ayuda adati, "Onani ndimo akhamukondera Lazaro!" ³⁷ Soma wina waiwo adati, "Bzingatheke lini kuti munthu umweyu, omwe adafungula maso ya zimola ule, kuchitisa pomwe kuti munthuyu nampodi asaike?" ³⁸ Kinangoka pomwe Yesu, pa kukhudzika mwayekha, adayenda kuthenjeko. Tsapano likhali phanga, apo akhadayedzeka chimwala popo. ³⁹ Yesu adati, "Gwinyani mwalayu." Malita, nana wache wa Lazaro, omwe adasaikayo, adati kuna Yesu, "Mbuya, nthawe zino thupiro zjai likubvunda penu, thangwe wakhala nsiku zinayi atasaika kale." ⁴⁰ Yesu adati kuna iye, "Kodi ndiribe kukuuza kuti, ungakhulupirira, umdzaona ulemerero bwa Mulungu?" ⁴¹ Ndiye adagwinya mwalayo. Yesu adajiguma maso yache achiti, "Baba, ndikukutendani kuti mudandibvera. ⁴² Ndidadziwa kuti mukhandibvera nthawe zense, soma nithangwera thimu lawanthu lomwe laima kundizungulirali ndipopa ndalewa bzobzipa, pala kuti akhulupirire kuti mudachita kundituma." ⁴³ Atamala kusewera bzobzi, adalira na mafala makulu, "Lazaro, bula panja!" ⁴⁴ Munthu wakusaikayo adabula panja; nzayo na maboko yache yakhadamangiwa na nguwo, apo nkhope yache ikhadampsinkhiwa na nguwo. Yesu adati kuna iwo, "Mutsudzuleni ambayende." ⁴⁵ Kinangoka azinji mwa Ayuda omwe adabwera kuna Mariya mkuona bzomwe Yesu adachitabzo, adakhulupirira mwa iye. ⁴⁶ Soma wina wa iwo adayenda kuna Afarisi kukawauza bzinthu ndibzo Yesu adachitabzo. ⁴⁷ Kinangoka akulu wa ansembe na Afarisi adakontcheza wakutonga milandu pabodzi achiti, "Timchita chani popa? Munthu umweyu ambachita bzizindikiro bzizinjitsa. ⁴⁸ Tingamulekerera yekha tenepayu, wensene amdzakhulupirira mwa iye; Aroma amdzabwera kudzatenga mbuto yathuyi na dziko lathuli kubodzi." ⁴⁹ Tsono, munthu wina waiwo, Kayafa, omwe akhali mkulu wa ansembe gole limwero, adati kuna iwo, ⁵⁰ "Mukudziwa lini chinthu imwepo. Mukulewengera lini kuti zjai nkhasa munthu m'bodzi kufera wanthu kusiyana nakuti mtundu wensene udzadzongeke." ⁵¹ Tsapano ibzi sikuti adalewa mwayekha. Soma, pakukhala iye mkulu wansembe gole limero, adabvimira kuti Yesu amfunika kudzafera mtundu wa wanthu; ⁵² apo sikuti pala mtundu okha, soma pala kuti wana wa Mulungu ndiwo amwazikana agwezekiwe pabodzi kukhala m'bodzi. ⁵³ Ndiye kuchokera nsiku yoyo kuyenda mtsogolo adapangana ndimo angaphere Yesu. ⁵⁴ Yesu alibe kufamba pomwe padecha pakati pa Ayuda, soma adanyamuka kuchoka popo kuyenda mdziko lakufupi na chipululu mumzinda wakuchemeriwa Eferemu. Kumweko iye adakakhala na wakupfunzira. ⁵⁵ Tsapano Pasaka ya Ayuda ikhali pafupi, apo azinji adakwira kuyenda ku Yerusalemu kuchoka mdzikomo Pasaka ikanati kuyamba kuti akabzichenese. ⁵⁶ Iwo akhapsaga Yesu, achimbasewera wina na mwayache ataima mkachisi, "Mukukumbukambo tani? Mkuti iye amdzanwera lini ku madyerero?" ⁵⁷ Tsapano mkulu wa ansembe na Afarisi akhadapereka chitongi chakuti penu wina anidziwa ndiko Yesu ali, alewe pala kuti iwo akamuphate.