¹ Kutasala nsiku zitanthatu kufika Pasaka, Yesu adabwera ku Betania, ndiko Lazaro akhali, omwe Yesu adamulamusa kuna anyamuya. ² Ndiye iwo adamukonzera chakudya pala kulalira koko, apo Malita ndiye akhachikonza, soma Lazaro akhali m'bodzi wawanthu wakuyadzamira pamezapo na Yesu. ³ Kinangoka Mariya adatenga javero ya mafuta yakuumira na kununchira kwene kwene, mkuyapalanga nzayo za Yesu, mkupukusa nzayo zachezo na tsisi lache. Nyumbayo idadzala na kununchira kwa mafutayo. ⁴ Yudasi Isikariyoti, m'bodzi wa wakupfunzira wache, wakudzampereka iye, adati, ⁵ Thangweranyi mafutaya yalibe kugulisiwa dinari madzana matatu mkugawira wakusaya?" ⁶ Tsapano iye adasewera tenepopo, sikuti akhabvera nsisi wakusayawo, soma thangwera akhali mbava. Akhana chola chakuikhira kobiri ndiye angadaba chakuikhiwa momocho. ⁷ Yesu adati, "Mulekeni akoye ndibzo anabzobzo pala nsiku yangu yakudzafuchiriwa. ⁸ Mumdzakhala nawo basi wakusayawo. Soma ine mumdzakhala lini nande pomwe." ⁹ Tsapano thimu lizinji la Ayuda lidadziwa kuti Yesu akhali koko, ndiye iwo adabwera, sikuti pala Yesu yekha, soma kudzaona pomwe Lazaro, omwe Yesu adamulamusa kuna anyamuya. ¹⁰ Akulu wa ansembe adapangana kuti zjai aphere kubodzi na Lazaro; ¹¹ nakuti ni thangwera iye kuti Ayuda azinji atembenuke mkukhulupirira Yesu. ¹² Mangwana yacheyo wanthu azinji adabwera ku madyereroyo. Pomwe iwo adabva kuti Yesu akhabwera ku Yerusalemu, ¹³ adakhwaula mitawi ya kanjedza achiyenda kakamuchingamira alikukuwa "Hosanna! Wakudalisika ndiye wakubwera mdzina la Mbuya, Mfumu ya Isaraeri." ¹⁴ Yesu adagumana kamphulu kabulu achikapakira popo; ninga kudanembewira, ¹⁵ "Nampodi kugopa, mkazi waku Ziyoni; ona, Mfumu yako ikubwera, itakhala pa kamphulu ka bulu." ¹⁶ Wakupfunza wache alibe kubvesesa ibzi pakutoma; soma pomwe Yesu adatambira ulemerero, adakumbukira kuti ibzi bzikhadanembiwa bza iye pomwe nakuti iwo akhadachita ibzi kuna iye. ¹⁷ Tsapano thimulo lidachitira umboni kuti likhadakhala naye nthawe ndizo iye adachemera Lazaro kubula kunja kwa nthutu achimulamusa kuna anyamuya. ¹⁸ Ndipopa pomwe kuti thimu liyende kukamuchingamira, thangwe adabva kuti iye akhadachita chizindikirochi. ¹⁹ Afarisi tsono adati okhaokha, "Nyang'anani, mungachite lini chinthu chabwino; onani, dziko lapansi lamutewera zjai." ²⁰ Tsapano Aherene winango akhali wina mwaiwo kukwira kuyenda kukanamata pa madyereroyo. ²¹ Awa adayenda kuna Filipi, omwe akhali waku Betisaida mu Galileya, achimukumbira iye, kulewa kuti, "Mbuya, tikufuna kuonambo Yesu." ²² Filipi adayenda kukauza Andireya; Andireya adayenda na Filipi, achikamuuza Yesu. ²³ Yesu adawatawira iwo achiti, "Nthawe yakwana kuti Mwana wa Munthu atambire ulemerero. ²⁴ Indetu, indetu, ndikulewa kuna imwe, penu mbeu ya tirigu inigwa padziko lapansi neye kufa, imbakhala basi yokha; soma penu inifa, imdzabala chipatso chambiri. ²⁵ Wakukonda moyo wache amdzautaya; soma iye wakuwenga moyo wache mdziko lino lapansi amdzaukoyera kumoyo wakusaya kumala. ²⁶ Penu wina anitumikira ine, mulekeni anditewere; apo ndiko ndiri ine, kumwekombo kapolo wanguyo amdzakukhala. Penu wina amnditumikira ine, Baba amdzamuchitira ulemu. ²⁷ Tsapano moyo wangu wabonera apo ndilewe chani? 'Baba, ndipulumuseni ine nthawe iyi'? Soma na thangwe loli ndafika kunthawe ino. ²⁸ Baba, lemekezani dzina lanu." Kinangoka mafala yadabwera kuchoka kudzaulu yachiti, "Ndalilemekeza apo nimdzalilemekeza pomwe." ²⁹ Kinangoka thimu ndilo likhadaima pafupi lidabva achiti kudagunda mpheni. Winango adati, "Mnjero adalewalewa naye." ³⁰ Yesu adatawira achiti, "Mafalaya yalibe kubwerera ine, soma pala imwe. ³¹ Tsapano ni chitongero cha dziko lino lapansi: Tsapano mtongi wadziko lino lapansi amdzathusiwa kunja. ³² Ningadzatakuliwa kuchoka padziko lapansi, nimdzapfuwa aliyense kuna ine ndekha. ³³ Iye adalewalewa ichi kulatiza ni imfa moda wanyi ndiyo iye amdzafa nayo. ³⁴ Thimulo lidamutawira iye, "Tabva kuchokera mchitongi kuti Mkhirisitu amdzakhala muyaya. Munilewa tani, 'Mwana wa Munthu akufunika kudzusiwa'? Mwana wa Munthu umweyu mbani?" ³⁵ Yesu kinangoka adati kuna iwo, "Kubvunika kumdzakhala namwe kwa kanthawe pamkiti. Fambani letu pomwe mukana kubvunikaku, pala kuti m'dima nampodi ukupinzuleni. Iye wakufamba mum'dima ambadziwa lini ndiko akuyenda. ³⁶ Pomwe muna kubvunika, khulupirirani kubvunikako pala kuti mukhale wana wa kubvunika." Yesu adalewa ibzi apo kinangoka zjai mkunyamuka apo mkubzibisa kuna iwo. ³⁷ Napo kuti Yesu akhadachita bzizindikiro bzizinji pamaso pawo, soma alibe kumukhulupirira basi ³⁸ pala kuti mafala ya Yesaya mneneri yakwanirisiwe, yomwe adati: "Mbuya, mbani wakhulupirira kulalikira kwathu, apo mkwambani ndiko boko la Mulungu lazimbuliwa?" ³⁹ Nathangwe iri angadakhulupirira lini, thangwe Yesaya akhadalewa pomwe, ⁴⁰ "Iye wapsipiza maso yao, na kulimbisa mitima yao, pala kuti na maso yao awone achibvesa na mitima yao, na kutembenuka, apo ine ningadawalimbisa iwo." ⁴¹ Yesaya adalewa ibzi thangwe adaona ulemerero bwa Yesu achilewalewa naye. ⁴² Soma kupambula bzobzo, azinji mwa atongi adakhulupirira basi Yesu; soma thangwera Afarisi, iwo alibe kutawira kugopa kuwalambiza msunagoge. ⁴³ Iwo kazinji akhakonda ulemerero bwakuchoka kuna wanthu kusiyana na bwa kwa Mulungu. ⁴⁴ Yesu adakuwa achiti, "Iye wakukhulupirira ine, sikuti wakhulupirira ine ndekha soma wakhulupirira pomwe ndiye adandituma, ⁴⁵ apo iye wakuona ine waona iye omwe adandituma. ⁴⁶ Ndabwera ninga kubvunika pa dziko lapansi, pala kuti omwe anikhulupirira ine nampodi atsalire mum'dima. ⁴⁷ Penu wina anibva mafala yangu soma neye kuyakoya, nimmutonga lini; nakuti ndiribe kubwera kudzatonga dziko lapansi, soma kudzalipulumusa. ⁴⁸ Iye wakulamba ine na omwe anisaya kutambira mafala yangu, ana m'bodzi wakumutonga. Dziko lapansi ndalewali limdzamutonga pansiku yakumaliza. ⁴⁹ Nakuti ndiribe kusewera bzandekha, soma ni Baba ndiwo adandituma, omwe adandipa chitongi chakuti ndisewere chani. ⁵⁰ Ndikudziwa kuti chitongi chache ni moyo wamuyaya, pala kuti bzomwe nilewa---ningambo ndibzo Baba asewera kuna ine, nimsewera ndendende tenepoyo letu."