¹ Tsapano yakhanati kuyamba Madyerero ya Pasaka. Yesu adadziwa kuti nthawe yache yafika yakuchoka padziko lino lapansi kuyenfa kuna Baba. Atakonda wache omwe akhali padziko lapansi, adawakonda kufikiza kumapeto. ² Tsapano Mdyerekezi akhadachikhazikisa kale mumtima mwa Yudasi Isikariyoti mwana wa Simoni, kupereka Yesu. Ndiye pakulalira, ³ akhadamutulira chirichense mmanja mwache nakuti adachoka kuna Mulungu apo akhabwerera pomwe kuna Mulungu---- ⁴ adalamuka pakularirapo achikhundula chakubvala chache chakunja. Kinangoka adatenga mpango achiutsimpha. ⁵ Kinangoka adathira madzi m'basiya achiyamba kutsuka nzayo za wakupfunza wache achimbaumisa na mpango ndiwo akhadautsimpha ule. ⁶ Iye adabwera kuna Simoni Petulo, apo Petulo adati kuna iye, "Mbuya, munisambisa nzayo zanguzi?" ⁷ Yesu adatawira achiti kuna iye, "Bzomwe ndikuchita mukuzindikira lini pakali pano, soma mumdzazindikira bwino patsogolo." ⁸ Petulo adati kuna iye, "Nzayo zanguzi munisambisa lini ndipo." Yesu adamutawira iye, "Penu nimkusambisa lini zjai ulibe pomwe mbali na ine." ⁹ Simoni Petulo adati kuna iye, "Mbuya, nampodi kundisambisa nzayo zokha, soma manja yanguya na msolo wanguyu kubodzi." ¹⁰ Yesu adati kuna iye, "Iye omwe wasamba kale amfunika lini kusamba pomwe, kupambula kutondo kusamba nzayo zache, soma ngwakuchena kwene kwene; mudachena soma sikuti aliyense." ¹¹ (Nakuti Yesu adadziwa mbani ndiye amdzampereka; Iri ni thangwe lache iye adati, " Sikuti mwensene mudachena neye.") ¹² Tsapano pomwe Yesu adasambisa nzayo zawo achitenga bzakubvala bzache mkubvala pomwe, adati kuna iwo, "Kodi mukuzindikira bzomwe ndachitabzi kuna imwe? ¹³ Mukumbandichemera 'mpfunzisi' apo mukumbalewa bwino, thangwe ndinedi. ¹⁴ Penu tsono, Mbuya na M'pfunzisi wasambisa nzayo zanu, musambisanembo nzayo za wina na mwayache. ¹⁵ Nakuti ndakupasani chitewezo pala kuti muchitembo ninga ndimo ndachitiramu kuna imwe. ¹⁶ Indetu, indetu, ndikulewa kuna imwe, kapolo ambakula lini kuposa mbuyache, ayai nyakutumiwa kukula kuposa ndiye adamutumayo. ¹⁷ Penu mukudziwa bzobzi, ndimwe wakudala penu mumbabzichita. ¹⁸ Ndikulewa lini bza mwensemwe; ndikudziwa iwo omwe ndawasankhula---soma ibzi bziri tenepa pala kuti manemba yakwanirisiwe: 'Iye omwe anidya mkate wangu adadzusa katendene wache kutsamiza ine.' ¹⁹ Tsapano ndikukuuzaniletu ichi chikanati kuchitika pala kuti chingachitika, mukhulupirire kuti NDINEDI. ²⁰ Indetu, indetu, ndikulewa kuna imwe, iye ndiye anitambira omwe nimmutuma watambira ine, na iye wakutambira ine watambira ndiye adandituma." ²¹ Pomwe Yesu adasewera ibzi, akhadabonera mumzimu. Iye adachitira umboni achiti, "Indetu, indetu, ndikulewa kuna imwe kuti m'bodzi wa imwe amdzandipereka ine. ²² "Wakupfunzawo adacheukirana, kudabwa bza ndiye akhamulewayo. ²³ M'bodzi wa wakupfunza wachewo omwe Yesu akhamukonda, akhadayadzamira pamezapo kumbali ndiko Yesu akhali. ²⁴ Simoni Petulo adakodola wakupfunza m'bodzi achiti kuna iye, "Abvunzeni mbani akumulewayo." ²⁵ Ndiye iye adayadzamira kumbali kukhana Yesuko achiti kuna iye, "Mbuya, mbani umweyo?" ²⁶ Ndiye Yesu adatawira, "Ni omwe ine nimdzamusaizira msuwa wa mkate ndichimupasa." Ndiye atasaiza msuwa wa mkateyo, adaupereka kuna Yudasi mwana wa Simoni Isikariyoti. ²⁷ Kinangoka pambuyo pache pa msuwayo, Satana adapita mwa iye, ndiye Yesu adati kuna iye, "Bzomwe ukuchitabzi, chita kamkulumize." ²⁸ Tsapano palibe ndiye akhadayadzamira pamezapo omwe adazindikira thangwe ndilo adalewera ibzi kuna iye. ²⁹ Winango adakumbuka kuti, nakuti Yudasi akhana chola cha kobiri, Yesu adati kuna iye, "Gula bwomwe tikufuna pala madyereroya," ayai kuti akapase chinthu kuna wakusaya. ³⁰ Yudasi atatambira mkateyo, adabula panja kamkulumize. Bukhali usiku. ³¹ Yudasi atabula, Yesu adati, "Tsapano Mwana wa Munthu walemekezeka, na Mulungumbo walemekezeka mwa iye. ³² Penu Mulungu walemekezeka mwa iye, Mulungu amdzalemekezambo Mwanayo mwa iye yekha, apo amdzamulemekeza iye tsampanopa. ³³ Wana ang'ono, ndikanamwe kwa kanthawe kakuchepa basi. Mumdzandipsaga, apo ninga ndidalewera kuna Ayuda, 'Ndiko ndikuyendako, mungakubwere lini.' Tsapano ndikulewa pomwe ichi kuna imwe. ³⁴ Ndikukupani chitongi chipsa, kuti mukondane wina na mwayache; ninga ndakukonderani inemu, ndendendembo mukondane wina na mwayache. ³⁵ Thangwera ichi aliyense amdzazindikira kuti ndimwe wakupfunzira wangu, penu munacho chikondano wina na mwayache." ³⁶ Simoni Petulo adati kuna iye, "Mbuya, mukuyenda kuponi?" Yesu adatawira, "Ndiko ndikuyendako, unganditewere lini tsampanopa, soma umdzanditewera bwino. ³⁷ Petulo adati kuna iye, "Mbuya, thangweranyi ningakwanise lini kukutewerani tsampanopa? Nimdzataya moyo wangu thangwera imwepo." ³⁸ Yesu adatawira, "Umdzataya moyo wako thangwera ine? Indetu, indetu, ndikulewa kuna iwe, jongwe anilira lini ukanati kundilamba katatu."