¹ "Mtima wanu nampodi ubonere. Mumbakhulupirira Mulungu; khulupirirani pomwe ine. ² Mnyumba ya Babangu muna masubi mazinji. Bzingadakhala mtenepoyo lini, ningadakuuzani, nakuti ndikuyenda kukakukonzerani imwe mbuto. ³ Ningayenda kukakukonzerani mbuto, nimdzabwera pomwe apo nimdzakutambirani imwe kwa ine ndekha, pala kuti ndiko ndiri ineko mukakhalembo. ⁴ Mukudziwa njira ya ndiko ndikuyenda." ⁵ Tomaji adati kuna Yesu, "Mbuya, tikudziwa lini ndiko mukuyenda; tingaidziwe tani njira?" ⁶ Yesu adati kuna iye, "Ndine njira, chadidi, na moyo; palibe ambabwera kuna Baba seye kudzera mwa ine. ⁷ Mungadandidziwa ine, mungadadziwa pomwe Babangu. Kuyambira lero ate mtsogolo mwamuzindikira iye apo mwamuona iye." ⁸ Filipi adati kuna Yesu, "Mbuya, tioneseni Babayo, apo bzimtikwana ife." ⁹ Yesu adati kuna iye, "Ndakhala nawe kwanthawe itali tenepayu apo ukundidziwa lini basi, Filipi? Omwe waona ine waona Baba. Ungalewe tani kuti, 'Tioneseni Baba'? ¹⁰ Umbakhulupirira lini kuti ndiri mwa Baba apo Baba ali mwa ine? Mafala ndiyo nimbalewa kuna imwe nimbalewa lini kuchoka mu mphamvu yangu yokha, soma Baba wakukhala mwa ine akuphata basa lache. ¹¹ Ndikhulupirireni kuti ndiri mwa Baba, na Baba ali mwa ine, ayai neye khulupirirani thangwera mabasa yokhaya. ¹² Indetu, indetu, ndikulewa kuna imwe, iye wakukhulupirira mwa ine amdzachita mabasa ndiyo nimbachita, apo amdzachita mabasa makulu kuposa yoya thangwe ine zjai ndikuyenda kuna Baba. ¹³ Chirichense ndicho mumkumbira mdzina langu, nimdzachichita pala kuti Baba atambire ulemerero mwa Mwana. ¹⁴ Penu mumndikumbira chirichense mdzina langu, nimdzachichita. ¹⁵ Penu mumbandikonda koyani bzitongi bzangu, ¹⁶ apo nimdzapemphera kuna Baba, apo amdzakupani Wakukunyamalizani winango wakuti mumdzakhala naye kunthawe zense--- ¹⁷ Mzimu wa chadidi. Dziko lapansi lingamutambire lini thangwe limbamuona lini ayai kumudziwa, nakuti ambakhala namwe apo amdzakhala namwe. ¹⁸ Nimdzakusiyani lini ninga wamasiye; nimdzabwerera pomwe kuna imwe. ¹⁹ Katsala kanthawe pang'ono apo dziko lapansi limdzandiona lini pomwe. Thangwe ndina moyo, mumdzakhalambo na moyo. ²⁰ Pansiku yoyo mumdzadziwa kuti ndiri mwa Baba, nakuti muli mwa ine, nakuti ine ndiri mwa imwe. ²¹ Iye omwe ana bzitongi bzangu achibzikoya ndiye omwe ambandikonda, apo iye omwe ambandikonda amdzakondewa na Babangu, apo nimdzamukonda ndichidzabzionesera ndekha kuna iye." ²² Yudasi (sikuti Isikariyoti) adati kuna Yesu, "Mbuya, thangweranyi bziri tenepo kuti mumdzabzionesera mwekha kuna ife sikuti kudziko?" ²³ Yesu adatawira achiti kuna iye, "Penu wina amndikonda ine, amdzakoya mafala yangu. Babangu amdzamukonda, apo timdzabwera kuna iye tichidzamanga muyi wanthu na iye. ²⁴ Iye omwe ambandikonda lini ambakoya lini mafala yangu. Mafala ndiyo mumbabvaya yambachokera lini kuna ine soma kuna Baba omwe adandituma ine. ²⁵ Ndalewa ibzi kuna imwe, pomwe ndikukhala namwe. ²⁶ Tsono, Wakunyamalizayo---Mzimu Wakuchena omwe Baba amdzautuma mdzina langu---umdzakupfunzisani chirichense uchidzakukumbusani chirichense ndicho ndidalewa kuna imwe. ²⁷ Ndikukusiirani mtendere; ndikukupani mtendere wangu. Ndikukupani lini ninga ndimo dziko lapansi limbaperekera. Mtima wanu nampodi ubonere, apo nampodi kugopa. ²⁸ Mudabva kuti ndidakuuzani, 'ndikuyenda, apo nimdzabwera pomwe kuna imwe.' Penu mukhandikonda, mungadasekera thangwe ndikuyenda kuna Baba, nakuti Baba mbaakulumbo kuposa ndimo ndiriri ine. ²⁹ Tsapano ndakuuzani letu bzikanati kuchitika pala kuti, bzingachitika, mudzakhulupirire. ³⁰ Nimdzasewera lini namwe pomwe bzizinji, nakuti mtongi wadziko lapansi lino akubwera. Iye alibe mphamvu pa ine, ³¹ soma kuti dziko lapansi lidziwe kuti nimbakonda Baba, nimbachita ninga ndimo Baba adanditongera ine. Mbatiye lilamuke tiyende kuchoka pano."