¹ "Ndine mpesa wachadidi, apo Babangu ni mwenekachiro munda. ² Ambakhwaula mtawi uliwense mwa ine ndiwo umbabala lini bzipatso, apo ambatengula mtawi uliwense omwe umbabala bzipatso bzizinji. ³ Ndimwe wakuchena kale thangwera mafala ndiyo ndasewera kuna imwe. ⁴ Khalani mwa ine, na ine mwa imwe. Ninga mtawi ungabale lini chipatso paokha pokha pokha utakhala mumpesa, ndiye mungathe lini, pokha pokha mungakhala mwa ine. ⁵ Ndine mpesa, imwe ndimwe mitawi. Iye wakukhala mwa ine na inembo mwa iye, ambabala bzipatso bzizinji, nakuti seye ine mungachite lini chinthu. ⁶ Penu wina anikhala lini mwa ine, ambatayiwa ninga mitawi achiuma, apo iwo ambakusa mitawiyo mkuyithusa pamoto, apo imbatenthiwa. ⁷ Penu munikhala mwa ine, apo mafala yangu mkukhala mwa imwe, kumbirani ndicho mumfunacho, apo chimdzachitiwa pala imwe. ⁸ Babangu ambatambira ulemu tenepayu, kuti mumbabala bzipatso bzizinji na kuzindikirika kuti ndimwe wakupfunzira wangudi. ⁹ Nakuti Baba andikonda, ine ndakukondanimbo. Khalani mchikondi changu. ¹⁰ Mungakoya bzitongi bzangu, mumdzakhala mchikondi changu, ninga ndimo ndakoyera bzitongi bza Babangu ndichikhaliratu mchikondi chache. ¹¹ Ndalewalewa ibzi kuna imwe kuti kusekera kwangu kukhale mwa imwe nakuti kusekerera kwanu pomwe kukhale kwakudzala. ¹² Ichi mchitongi changu, kuti mukondane wina na mwayache ninga ndimo ndakukonderani. ¹³ Palibe ana chikondi chikulu kuposa ichi---kuti wina kutaya moyo wache pala anzache. ¹⁴ Ndimwe anzangu penu munichita bzinthu ibzi ndibzo nimkutongani. ¹⁵ Nimbakuchemerani lini pomwe akapolo wangu, thangwe kapolo ambadziwa lini ndibzo mbuyache akuchita. Ndakuchemerani kuti anzangu, thangwe chirichense ndicho ndidabva kuna Babangu ndakuzindikirisani. ¹⁶ Mulibe kundisankhula ine, soma ndidakusankhulani na kukuikhani pala kuti muyende mukabale chipatso, nakuti chipatso chanucho chisalire. lbzi bziri tenepo pala kuti chirichense munikumbira Babacho mdzina langu, adzakupeni. ¹⁷ Bzinthu ibzi ndikukutongani, pala kuti mukondane wina na mwayache. ¹⁸ Penu dziko lapansi limbakuwengani, dziwani kuti lidatoma kuwenga ine likanati kuwenga imwepo. ¹⁹ Muchikhala mukhali wadziko lapansi, dziko lapansi lingadakuwengani lini imwe pakukhala wache wailo. Soma thangwe ndimwe lini wadziko lapansi pomwe nakuti ndidakusankhulani kubula mdziko lapansi, nithangwerache dziko lapansi limbakuwenganipa. ²⁰ Kumbukirani mafala ndiyo ndidakuuzani, 'Kapolo ambakula lini kuposa mbuyache.' Penu adaboneresa ine, imwe amdzakuboneresanimbo; penu adakoya mafala yangu, yanu amdzayakoyambo. ²¹ Iwo amdzachita bzensenebzi kuna imwe thangwera dzina langu, nakuti ambamudziwa lini iye ndiye adandituma. ²² Ningadakhala ndiribe kubwera kudzalewalewa nawo, angadakhala alibe chakuphonya, soma tsapano alibe chakuwiningula na chakuphonya chawo. ²³ Iye wakundiwenga wawenga pomwe Baba. ²⁴ Ningadakhala ndiribe kuchita basa lakuti palibe adalichita pakati pawo, akhadakhala alibe chakuphonya, soma tsapano awona ine na kundiwengeratu na Babangu kubodzi. ²⁵ Soma uku mkukwanirisa mafala ndiyo yadanembiwa mchitongi, 'Adandiwenga ine seye thangwe.' ²⁶ Nyakunyamaliza angabwera---omwe nimdzamutumiza kuchoka kuna Baba, ndiwo, Mzimu wachadidi, omwe umbabula kuchoka mwa Baba---Iye amdzachitita umboni bza ine. ²⁷ Imwe pomwe bzimfunika muchitire umboni, thangwe mwakhala nande kuyambira pakutoma.