¹ Ndasewera bzinthu ibzi kuna imwe pala kuti nampodi mubwerere mmambuyo. ² Amdzakuthusani kunja kwa ma sunagoge. Soma nthawe ikubwera yakuti aliyense wakudzakuphaniyo amdzaona ninga akuphatira Mulungu basa. ³ Amdzachita bzinthu bzobzi thangwe akanati kudziwa Baba ayai ine. ⁴ Ndaseweratu ibzi pala kuti nthawe yawo ingafika, mudzakumbukire kuti ndidakuuzani bza bzimwebzi. Ndiribe kukuuzani bzobzi pakutoma, thangwe ndikhalinamwe. ⁵ Soma tsapano ndikuyenda kuna iye omwe adandituma, ⁶ soma palibe waimwe wandibvunza, 'Mukuyenda kuponi?' Soma thangwe ndalewa ibzi kuna imwe, nsisi zadzala mumtima mwanu. ⁷ Soma chadidi ndikukuuzani, zjai bziri nkhasa kuna imwe kuti ndiyende. Thangwe ningasaya kuyenda, Wakukunyamalizani amdzabwera lini kuna imwe, soma ningayenda, nimdzamutumiza kuna imwe. ⁸ Angabwera, Wakunyamaliza amdzabulukira kuti dziko lapansi laipa na bzakuphonya, bza chilungamo, na bza chitongero--- ⁹ bza kuphonya, thangwe iwo ambandikhulupirira lini; ¹⁰ bza chilungamo, thangwe ndikuyenda kuna Baba, apo mumdzandiona lini pomwe; ¹¹ na bza chitongero, thangwe mtongi wadziko lapansi zjai watongewa. ¹² Ndina bzizinji bzakulewa kuna imwe, soma mungabziphatise lini basa pakali pano. ¹³ Soma pomwe Mzimu wa Chadidi, wabwera, umdzakutsogolerani ku bzachadidi bzense, nakuti umdzalewalewa lini bzaokha. Soma umdzasewera chirichense ndicho umdzabva, apo umdzakuuzani bzinthu ndibzo bziri mkubwera. ¹⁴ Umdzandilemekeza ine, thangwe umdzatenga bzangu mkudzakuuzani. ¹⁵ Chirichense ndicho Baba alinacho mcha ine. Nithangwerache, ndidalewa kuti Mzimu umdzatenga bzangu mkudzakuuzani. ¹⁶ Mkanthawe kakuchepa mumdzandiona lini pomwe, apo pangadzapita kanthawe pomwe kakuchepa mumdzandiona." ¹⁷ Kinangoka wakupfunzira wache winango adati kuna wina na mwayache, "Mchiyani akumbalewabzi kuna ife, 'Mkanthawe kakuchepa mumdzandiona lini mkanthawe kakuchepa mumdzandiona,' na, 'Thangwe niyenda kuna Baba'?" ¹⁸ Ndiye iwo adati, "Mchani akumbalewabzi, 'Mkanthawe kakuchepa'? Ife tikudziwa lini bzomwe akulewalewa." ¹⁹ Yesu adaona kuti akhafuna kumubvunza, apo iye adati kuna iwo, "M'bzimwebzi mukubzunzanabzo, chomwe ndikhalewa pakulewa kuti, 'Mkanthawe kakuchepa' apo mumdzandiona lini pomwe, na mkanthawe kakuchepa pomwe apo mumdzandiona'? ²⁰ Indetu, indetu, ndikulewa kuna imwe, mumdzalira na kudandaula, soma dziko lapansi limdzadekedwa. Mumdzabva nsisi, soma nsisi zanuzo zimdzasandulika kusekera. ²¹ Pomwe mkazi akubala ambabva nsisi thangwe nthawe yache yafika, soma angabala mwana, ambakumbukira lini pomwe kubonera kwache kule thangwera kusekera kuti munthu wabadwa mdziko lapansi. ²² Ndiye muna nsisi tsapano, soma nimdzakuonani pomwe, apo mtima wanu umdzasekera, apo palibe amdzatenga chisekerero chanu kuna imwe. ²³ Pansiku yoyo mumdzandibvunza lini chirichense. Indetu, indetu, ndikulewa kuna imwe, ²⁴ ate pano mukanati kukumbira kale chinthu mdzina langu. Kumbirani apo mumdzatambira, pala kuti chisekerero chanu chikwanirisiwe. ²⁵ "Ndalewa bzinthu ibzi kuna imwe mmaphiphiriso, soma nthawe ikubwera kuti nimdzasewera lini pomwe kuna imwe mmaphiphiriso, soma nimdzakuuzani bzakubveka bza Baba. ²⁶ Pansiku yoyo mumdzakumbira mdzina langu apo ndikulewa lini kuna imwe kuti nimdzakupemphererani kuna Baba, ²⁷ nakuti Baba paokha ambakukondani thangwe mwandikonda na thangwe mwakhulupirira kuti ndidachokeradi kuna Mulungu. ²⁸ Ndidachokera kuna Baba, apo ndabwera kudziko lapansi. Ndikuchoka pomwe padziko lapansi apo ndikuyenda kuna Baba." ²⁹ Wakupfunza wache adati, "Onani, tsapano mukusewera letu bzakubveka apo mukuphatisa lini basa kaseweredwe ka maphiphiriso. ³⁰ Tsapano tikudziwa kuti mukudziwa bzinthu bzensene, apo mumfuna lini wina akubvunzeni pomwe mabvunzo. Thangwera bzobzi, tikukhulupiriradi kuti mwachokera kuna Mulungu," ³¹ Yesu adawatawira, "Mukukhulupirira tsapano na? ³² Onani, nthawe ikubwera, inde, apo chadidi yafika, yomwe mumdzabalalikana, aliyense kumuyi kwache, muchidzandisiya ndekha. Soma ndiri lini ndekha thangwe Baba ali nande. ³³ Ndasewera bzinthu ibzi kuna imwe pala kuti mudzakhale na mtendere mwaine. Mdziko lapansi muna masada, soma limbikani mtima, ndagonjesa dziko lapansi."