¹ Yesu atalewa bzobzi, adajiguma maso yache kudzaulu mkulewa kuti, "Baba, nthawe yakwana, lemekezani Mwana wanu kuti Mwanayo adzakulemekezeni--- ² ninga ndimo mudamupasira utongi bwathupi pala kuti apereke moyo wakusaya kumala kuna aliyense omwe mwamupa iye. ³ Uyu ni moyo wakusaya kumala: Mulungu yekhayo wachadidi, na iye ndiye mudamutuma Yesu Mkhirisitu. ⁴ Ine ndidalemekeza imwe padziko lapansi. Ndamaliza basa ndilo mwandipa kuti ndiphate. ⁵ Tsapano, Baba, lemekezani ine na imwe mwekha na ulemerero ndibo ndikhali nabo na imwe likanati kukhala dziko lapansi. ⁶ Ndidalionesera dzina lanu kuna wanthu omwe mudandipa kudziko lapansi. Iwo akhali wanu, apo mudawapa kuna ine, apo akoya mafala yanu. ⁷ Tsapano akudziwa kuti chirich ense mudandipa ine mchakuchokera kuna imwe, ⁸ thangwe ndawapa mafala yensene ndiyo mudandipa ine. Ayatambira achizindikira chadidi kuti ndidachokera kuna imwe, apo akhulupirira kuti imwe mudanditumadi ine. ⁹ Nimbawapempherera iwo. Nimbapempherera lini dziko lapansi soma iwo omwe mwandipa, nakuti mbanu. ¹⁰ Bzaine bziribzense m'bzanu, apo bzanu m'bzangu, apo ndadalisika mwa iwo. ¹¹ Ndiri lini pomwe mdziko lapansi, soma wanthuwa ali mdziko lapansi, apo ndikubwera kuna imwe. Baba Wakuchena, akoyeni mdzina lanu lomwe mwandipa kuti akakhale abodzi, ninga tiririmbo abodzi. ¹² Pomwe ndikhali nawo, ndidawatchenkha mdzina lanu, ndicho mwandipa. Ndidawalindira, apo palibe neye m'bodzi ndiye adadzongeka, kupambula mwana wa chionongeko, kuti manemba yakwanirisiwe. ¹³ Tsapano ndikubwera kuna imwe, soma ndikulewa bzinthu ibzi kudziko lapansi kuti akhale na chisekerero changu chakukwanirisiwa mwa iwo. ¹⁴ Ndawapa iwo mafala yanu, apo dziko lawawenga thangwe iwo mbadziko lini lapansi, ninga ine ndiririmbo lini wadziko lapansi. ¹⁵ Ndikukukumbirani lini kuti muwachose padziko lapansi, soma kuti imwe muwatchenkhe iwo kuna wakuipayo. ¹⁶ Iwo ali lini wadziko lapansi, ninga inembo ndiriri lini wadziko lapansi. ¹⁷ Pambulani iwo muchadidi. Mafala yanuya ndiyo chadidi. ¹⁸ Ninga ndimo mudanditumira kudziko lapansi, ndendendembo ndawatuma kudziko lapansi. ¹⁹ Thangwera iwo ine ndabzipambula ndekha, kuti iwombo abzipambule okha mchadidi. ²⁰ Ndikupempherera lini pala okhawa neye, soma pomwe na ndiwo amdzandikhulupirira ine kudzera mmafala ²¹ kuti wensene akhale abodzi, ninga ndimo imwe, Baba, muliri mwa ine, apo ine ndiriri mwa imwe. Mbaakhalembo mwa ife iwo kuti dziko lapansi likhulupirire kuti mwachita kundituma. ²² Ulemerero ndibo mudandipa, ndawapa iwo, pala kuti akhale abodzi, ninga ndimo tiririmbo abodzi: ²³ Ine mwa iwo, na imwe mwa ine---kuti akabweresewe ku ubodzi bwachaiboibo, pala kuti dziko lapansi lidziwe kuti mudachita kundituma, na kuti mwawakonda ninga ndimo mudakondera ine. ²⁴ Baba, ndikufuna omwe imwe mwandipa ambakhale na inepano pomwe ine ndiri, na kuona ulemerero bwangu, ulemerero mudandipabu thangwe mudandikonda yakanati kukhazikiwa maziko yadziko lapansi. ²⁵ Baba wachilungamo, dziko lapansi liribe kukudziwani, so ine ndikukudziwani; soma amwewa akudziwa kuti mudachita kundituma. ²⁶ Ndidachitisa dzina lanu kudziwika kuna amwewa, apo nimdzachitisa kuti alidziwe basi pala kuti chikondi mudakonda nacho ine chikhale mwa iwo, apo ine nimdzakhala mwa iwo."