¹ Yesu atamala kusewera mafalaya, adayenda na wakupfunza wache ku ng'ambu ya Kamkulo ka Kedroni, komwe kukhana munda ndiwo iye na wakupfunza wache adakapita. ² Tsapano Yudasi, omwe akhayenda kukampereka iye, adadziwambo mbutoyo, thangwe Yesu akhamanzamanza kumbakagumana popo na wakupfunza wache. ³ Kinangoka Yudasi atatsogolera thimu la achikunda na anyamata winango wakuchokera kuna akulu wa ansembe na Afarisi, mkuyenda kumweko na makandiyero, bzakubvunikira, na bzida. ⁴ Kinangoka Yesu, omwe adadziwa bzinthu bzense ndibzo bzikhachitika kuna iye, adafendera kutsogolo mkuwabvunza, "Kodi mukupsaga mbani imwepo?" ⁵ Iwo adamutawira, "Yesu waku Nazareti." Yesu adati kuna iwo, "Ndinepano." Yudasi, omwe adampereka iye, akhadaimambo na achikundawo. ⁶ Tsono pomwe adalewa kuna iwo, "Ndinepano," Iwo adafundukira mmambuyo achigwa pansi. ⁷ Kinangoka iye adawabvunza pomwe, "Kodi Mukupsaga mbani imwepo?" Iwo adalewa pomwe, "Yesu waku Nazareti." ⁸ Yesu adatawira, "Ndakuuzani kuti ndine. Ndiye penu mukupsagadi ine, awa ambayende." ⁹ Uku kukhali kukwanirisa bzomwe adalewa: "Pala iwo omwe mwandipasira, ndiribe kutaya neye m'bodzi yekha." ¹⁰ Kinangoka Simoni Petulo ndiye akhana dipa, adalimolola achimenya nalo kapolo wa mkulu wansembe achitsengeratu khutu lache lakumadidi. ¹¹ Tsapano dzina la kapoloyo likhali Malko. Yesu adati kuna Petulo, "Bwezeresa dipa mchakuikhira mwache. Kodi ine nim'wera lini mkombo ndiwo Baba wandipa?" ¹² Ndiye thimu la achikunda na msupayi, na anyamata wa Ayuda, adaphata Yesu achimumanga. Pakutoma ¹³ Adamutsogolera kuna Anasi thangwe akhali mabzala wache wa Kayafa, omwe akhali mkulu wansembe gole limwero. ¹⁴ Tsapano Kayafa ndiye akhadalewa kulangiza Ayuda kuti zjai nkhasa munthu m'bodzi afere wanthu wensene. ¹⁵ Simoni Petulo adatewera Yesu, na wakupfunza pomwe m'bodzi. Tsapano poti wakupfunzayu akhadziwika kuna mkulu wansembeyo, adapita mkati mu mbuto ya mkulu wansembeyo; ¹⁶ soma Petulo akhadaima panja pamsuwo. Ndiye wakupfunza winangoyo omwe akhadziwika kuna mkulu wansembeyo, adabula panja mkukasewera na wakufungula pamsuwo, apo iye adabweresa Petulo momo. ¹⁷ Kinangoka nyabasa wachikazi, wakumbafungula pamsuwo, adati kuna Petulo, "Ndiwe lini m'bodzi pomwe wa wakupfunza wa munthuyu?" Iye adati, "Ndinepano lini." ¹⁸ Tsapano anyabasa na anyamata akhadaima popo, apo akhadakombeza choto cha masimbe, nakuti kukhajejera, apo zjai mkumbaotha. Petulo akhali nawombo popo, ataima popo mkumbaothambo. ¹⁹ Mkulu wa ansembe kinangoka adabvunza Yesu bza wakupfunza wache na chipfunziso chache. ²⁰ Yesu adamutawira, "Ndasewera bzakubveka kudziko lapansi. Ndikhapfunzisa nthawe zensene mmasunagoge nammakachisi ndimo Ayuda akhambabwera pabodzi. Ndiribe kusewera chinthu mwakubisa. ²¹ Mwandibvunziranyi? Bzunzani omwe abva ndibzo ndidalewa. Nyang'anani, wanthuwa akudziwa ndibzo ndidalewa." ²² Pomwe Yesu adalewa ibzi, m'bodzi wa anyamata wakuima popo adamenya Yesu achiti, "Mkulu wansembe ungamutawire terepoyo?" ²³ Yesu adamutawira, 'Penu ndamutawira kuipa, chitira umboni bzakuipako, soma penu mmwabwino, thangweranyi ukundimenya?" ²⁴ Kinangoka Anasi adamutumiza iye ali wakumanga kuna Kayafa mkulu wa ansembe. ²⁵ Tsapano Simoni Petulo akhadaima kumbaotha moto. Wanthu kinangoka adati kuna iye, ²⁶ "Kodi ndiwe lini pomwe m'bodzi wa wakupfunza wache iwepo?" Adagaza achiti, "Ndinepano lini." M'bodzi wa anyabasa wa mkulu wansembe omwe akhali m'bale wache wa ndiye adagwatiwa khutu na Petulo ule, adati, "Ndiribe kukuona mmunda mule naiye iwepo?" ²⁷ Kinangoka Petulo adagaza pomwe; apo kamkulumize chongwe adalira. ²⁸ Kinangoka iwo adatsogolera Yesu kuchoka kuna Kayafa kuyenda kulikulu la boma. Yakhali machibesebese, apo alibe kupita mulikulu la bomalo kuti nampodi apsipiziwe soma kuti akwanise kudya Pasaka. ²⁹ Ndiye Pilato adabula kunja kuna iwo achikati, "Ni thangwe liponi ndilo mukumuzengera mulandu munthuyu?" ³⁰ Iwo adatawira achiti kuna iye, "Angadakhala munthuyu ngwakuphonya lini, tingadamupereka lini kuna imwe." ³¹ Pilato tsono adati kuna iwo, "Mutengeni mwekha, mukamutonge malingana na chitongi chanu." Ayuda adati kuna iye, "Mbzakubvumiziwa lini kupha munthu aliyense ife." ³² Iwo adasewera ibzi pala kuti mafala ya Yesu yakwanirisiwe ndiyo akhadasewera kulatiza ni imfa yanyi ndiyo iye amdzafa nayo. ³³ Kinangoka Pilato adapita pomwe mu likulu labomamo achichemera Yesu apo iye adati kuna iye,"Kodi ndiwe Mfumu ya Ayuda?" ³⁴ Yesu adatawira, "Kodi mukusewereratu mwekha, ayai winango achita kukuuzani bza ine?" ³⁵ Pilato adatawira, "Ndine lini m'Yuda, ndine? Wanthu wanu chaiwo na akulu wa ansembe ndiwo adakuperekani kuna ine. Mudachita chani?" ³⁶ Yesu adatawira, "Ufumu bwangu sikuti m'bwadziko lapansi lino. Bungadakhala ufumu bwangu m'bwadziko lapansi lino, anyamata wangu angadalimbika nkhondo mwakuti ningadaperekiwa lini mmanja mwa Ayuda. Soma ufumu bwangu m'bwapano lini." ³⁷ Pilato kinangoka adati kuna iye, "Ndimwe mfumu tsono?" Yesu adatawira, "Mwalewa ndimwe kuti ndine mfumu. Nithangwe loli ndilo ndikhadabadwira, ni thangwe loli ndilo ndidabwerera padziko lapansi, kudzachitira umboni chadidi. Aliyense wakukhala mwachadidi ambabvesera mafala yangu." ³⁸ Pilato adati kuna iye, "Chadidi ndiye kuti chani?" Pomwe atalewa ibzi, adabula pomwe kunja kuna Ayuda achikati kuna iwo, "Ndikuona lini chakuphonya mwa munthuyu. ³⁹ Soma muna mtemo kuti ndikutsudzulireni munthu m'bodzi pa pasaka. Ndiye mukufuna ndikutsudzulireni Mfumu ya Ayuda?" ⁴⁰ Kinangoka adakuwa pomwe achiti, "Munthu umweyu neye, soma Barabba." Tsapano Barabba akhali gandanga.