¹ Kinangoka Pilato adatenga Yesu achimutchanga. ² Achikunda adapakasa kankhata kaminga. Adakabvazika pamsolo pa Yesu achimubvazika chakubvala chifwira. ³ Iwo adabwera kuna iye achiti, "Tikuoneni, Mfumu ya Ayuda!" apo adamumenya. ⁴ Kinangoka Pilato adayenda pomwe panja achikati kuna iwo, "Onani, ndikumubweresa panja pano kuna imwe pala mudziwe kuti ndiribe kugumana thangwe mwa iye. ⁵ Ndiye Yesu adabula panja, atabvala nkhata yaminga na chakubvala chifwira. Pilato adati kuna iwo, "Nyang'anani, munthuyu!" ⁶ Nthawe ndizo akulu wa ansembe na anyamata wao adaona Yesu, adakuwa achiti, "Mmanikeni, mmanikeni!" Pilato adati kuna iwo, "Mtengeni mwekha mukammanike, thangwe ine ndikugumana lini thangwe mwa iye." ⁷ Ayuda adamutawira iye, "Tina chitongi, ndiye malingana na chitongicho afe thangwe akhabziyezezera kuti ni Mwana wa Mulungu." ⁸ Pomwe Pilato adabva mafalaya, adaphatiwa na mantha, ⁹ achipita pomwe mu likulu la bomalo achiti kuna Yesu, "Mumbachokera kuponi?" Soma Yesu alibe kumutawira?" ¹⁰ Kinangoka Pilato adati kuna iye, "Munilewalewa lini na ine kodi? Mukudziwa lini kuti ndina mphamvu yakukutsudzulani, na mphamvu ya kukumanikani?" ¹¹ Yesu adamutawira, "Mungadakhala mulibe mphamvu pa ine imwe mungadakhala mulibe kuchita kupasiwa kuchoka kudzaulu. Nithangwerache, iye omwe adandipereka kuna imwe ana pikado ikulu," ¹² Nakutawira koku, Pilato adayezera kumutsudzula, soma Ayuda adakuwa kulewa kuti, "Penu munimutsudzula umweyu, ndimwe lini mwayache wa Kaesara. Aliyense wakubziikha yekha mfumu ambasewera bzakugazana na Kaesara." ¹³ Pomwe Pilato adabva mafalaya, adabulisa Yesu panja achikhala pakadera yakutongera milandu pambuto pakuchemeriwa "Mbuto yaminyala," soma mchiseweredwe chachi Heberi "Gabata." ¹⁴ Tsapano ikhali nsiku yakukonzekera Pasaka, pafupifupi nthawe zitanthatu. Pilato adati kuna Ayuda, "Onani, Mfumu yanu!" ¹⁵ Iwo adakuwa, "Mbaachoke, Mbaachoke; mmanikeni!" Pilato adati kuna iwo, "Ndimanike Mfumu yanuyi?" Akulu wa ansembe adatawira, "Tiribe mfumu ife soma Kaesara." ¹⁶ Kinangoka Pilato adapereka Yesu kuna iwo kuti amumanike. ¹⁷ Kinangoka iwo adamtenga Yesu, achibula naye panja, atabzitakulira yekha mtanda kuyenda kumbuto yakuchemeriwa, "Mbuto yabade," yomwe mchi Heberi imbachemeriwa" Gologota." ¹⁸ Adamumanika Yesu popo, apo pabodzi na iye wanthu pomwe awiri, wina uku wina uku, Yesu pakati. ¹⁹ Pilato adanemba pomwe chizindikiro mkuchiikha pamtandapo. Pamwepo chikhadanembiwa: YESU WA KU NAZARETI, MFUMU YA AYUDA. ²⁰ Azinji mwa Ayuda adalewenga chizindikirochi thangwe mbuto ndiyo Yesu adamanikiwayi ikhali pafupi na muyi. Chizindikirochi chidanembiwa mchi Heberi, mchi Roma na mchi Herene. ²¹ Kinangoka akulu wa ansembe wa Ayuda adati kuna Pilato, "Nampodi kunemba, 'Mfumu ya Ayuda,' soma, 'Umweyu adati, "Ndine Mfumu ya Ayuda,"'" ²² Pilato adatawira, "Bzomwe ndanembabzi ndanemba basi." ²³ Pomwe achikunda adamumanika Yesu, adatenga bzakubvala bzache achibzidedza mbuto zinayi, chibodzi aliyense; na malaya pomwe. Tsapano malayayo yakhalibe msono, mabodzi na mabodzi kuchokera padzaulu. ²⁴ Ndiye adati okha okha, "Nampodi tiyang'ambe, soma mbatiye timenye njuga tione yamkhala yambani," Ibzi bzidachitika kuti manemba yakwanirisiwe ndiyo yadati, "Amdzagawana bzakubvala bzangu okha okha achidzamenya njuga pala chakubvala changu."Ibzi ndibzodi achikunda adachita. ²⁵ Tsapano wakuima pambali pa mtanda wa Yesu akhali mayi wache, nana wao wa mayi wache, Mariya mai wache wa Kleopa, na Mariya Magadalene. ²⁶ Pomwe Yesu adaona mayi wache na wakupfunza ndiye akhamukonda ataima pafupi, adati kuna mayi wache, "Mkaziwe, ona, mwanako!" ²⁷ Kinangoka adati kuna wakupfunzayo, "Ona, mayi wako!" Kuchokera nthawe yoyo wakupfunzayo adatakula mayiyo kuyenda naye letu kumuyi kwache. ²⁸ Bzitamala ibzi, pakudziwa kuti chirichense chamala nakuti manemba yakwanirisiwa, Yesu adati, "Ndikubva nyota." ²⁹ Chakutengera chakudzala na vinyu wakusasa chidaikhiwa popo, ndiye adabvwika chibvenje chakudzala na vinyu wakusasa pa phesi la hisope achidzusa mkumubzatika pakamwa pache. ³⁰ Pomwe Yesu adamwa vinyu wakusasayo, iye adati, "Bzamala." Iye adatsulimisa msolo wache achipereka mzimu wache. ³¹ Kinangoka Ayuda, thangwe ikhali nsiku yakukonzekera, kuti matupiyo yangadakhala lini popo nsiku ya Sabata (thangwe Sabata ikhali makamaka yakufunikira), adakumbira Pilato kutchola miyendo yawo mkuyabulusa. ³² Kinangoka achikunda adabwera kudzatchola miyendo ya munthu wakutoma na ya wachiwiri omwe akhadamanikwa pabodzi na Yesu. ³³ Pomwe adafika pa Yesu, adaona kuti iye khadafa kale, ndiye alibe kutchola miyendo yache. ³⁴ Tsono, m'bodzi wa achikunda adapsonda mbali yache na psimo, apo kamkulumize mulopa na madzi bzidabula. ³⁵ Omwe adaona ibzi wachitira umboni, apo umboni bwachebo m'bwachadidi. Akudziwa kuti bzidalewa iye m'bwachadidi Pala kuti imwe mukhulupirirembo. ³⁶ Thangwera bzinthu ibzi bzidachitika kufuna kukwanirisa manemba, "Neye libodzi la mafupa yache limdzatcholewa lini," ³⁷ Pomwe, mafala inango yambati, "Iwo amdzamubzokola iye omwe wapsondewayo." ³⁸ Bzitamala bzinthu ibzi, Yosefe wa ku Arimateya, nakuti akhali wakupfunza wa Yesu (soma mwakanonono kugopa Ayuda)' adakumbira Pilato penu angatengembo thupi la Yesu. Pilato adamubvumiza. Ndiye Yosefe adabwera achitakula thupi la Yesu. ³⁹ Nicodemo adabwerambo, ule ndiye pakutoma adabwera kuna Yesu usiku. Adabweresa chisanganizo cha mure na aloe, pafupi fupi miyezo dzana libodzi. ⁴⁰ Ndiye iwo adatenga thupi la Yesu achilitsedengera na nguwo zabafuta na bzakununtchira, kuteweza ukhaliri mtemo wa Ayuda pakufuchira matupi. ⁴¹ Tsapano pambuto ndipo adakhomewera pale pakhana munda; apo mmundamo mukhana gwinza la tsampanopa lakuti palibe munthu akhadaikhiwa kale. ⁴² Thangwe ikhali nsiku yakukonzekera ya Ayuda apo nakuti gwinzalo likhali pafupi, iwo adamugonesa Yesu momo.