¹ Tsapano machibese ya nsiku yakutoma ya Sumana, kukana mdima, Mariya Magadalene adabwera pagwinzapo mkuona chimwala chitagwinyiwa kuchoka pagzinzapo. ² Ndiye adathamanga kubwera kuna Simoni Petulo na kuna wakupfunza winango ndiwo Yesu akhawakonda, apo adati kuna iwo, "Adamuchosa Mbuya pagwinza pale, apo tikudziwa lini ndiko akamuikha." ³ Kinangoka Petulo na wakupfunza winango adabula, apo akhayenda pa gwinzapo. ⁴ Wense awiri adathamangira pabodzi, apo wakupfunza winangoyo adathamanga kamkulumize patsogolo pa Petulo mkutoma kukafika ndiye pagwinzapo. ⁵ Kinangoka kukotama adaona nguwo zabafuta, zitatandika momo, soma iye alibe kupita mkatimo. ⁶ Simoni Petulo adakafika pambuyo pa iye achipita mkati mwa gwinzalo. Adaona nguwo zabafuta zitatandika momo ⁷ na nguwo ndiyo ikhali kumsolo kwache. Ikhalibe kutandika pabodzi na nguwo za bafutazo soma ikhadafunya pambuto payokhambo. ⁸ Kinangoka wakupfunza winangoyo, omwe adatoma kukafika pagwinza ule, adapitambo mkatimo, apo adaona achikhulupirira. ⁹ Thangwe ate kufika nthawe zozo akhanati basi kudziwa manemba kuti iye amdzalamuka kuna anyamuya. ¹⁰ Ndiye wakupfunza wale adabwerera pomwe kumuyi. ¹¹ Soma Mariya akhadaima panja pa gwinzalo kumbalira. Pomwe akhalira, akhadakotamira mgwinzamo. ¹² Iye adaona anjero awiri atabvala bzichena atakhala pansi, winango kumisolo, na winango kunzayo kwa pale ndipo akhadagonesa thupi la Yesu. ¹³ Iwo adati kuna iye, "Mkaziwe, msabwanyi ukulira?" Iye adati kuna iwo, "Thangwe adachosa Mbuyangu, apo ndikudziwa lini ndiko akamuikha." ¹⁴ Pomwe iye adalewa ibzi, adazungunuka achiona Yesu ataima popo, soma alibe kudziwa kuti akhali Yesu. ¹⁵ Yesu adati kuna iye, "Mkaziwe, msabwanyi ukulira? Ukupsaga mbani?" Iye akhakumbuka kuti akhali wammunda, apo adati kuna iye, "Mbuya, penu mwamutenga ndimwe, ndiuzeni ndiko mwamuikha, apo ndikamutenge." ¹⁶ Yesu adati kuna iye, "Mariya." Mariya adazungunuka achiti kuna iye mchi Heberi, "Rabboni" (ndiye kulewa kuti "M'pfunzisi"). ¹⁷ Yesu adati kuna iye, "Nampodi kundiphata, thangwe ndikanati kuyenda kudzaulu kuna Baba, soma ndoko kuna abale wangu ukawauze kuti niyenda kudzaulu kuna Babangu na Babanu, na Mulungu wangu na Mulungu wanu." ¹⁸ Mariya Magadalene adabwera kudzauza wakupfunzira, "Ndamuona Mbuya," nakuti iye akhadalewa ibzi kuna mkaziyo. ¹⁹ Maulo ya nsiku yoyo, nsiku yakutoma ya Sumana, misuwo ikhali chitsekere ndiko kukhakhala wakupfunzirako thangwera kugopa Ayuda, Yesu adabwera achidzaima pakati pawo achiti kuna iwo, "Mtendere kuna mwe." ²⁰ Atamala kulewa ibzi, adawaonesa manja yache na mbabvu zache. Wakupfunza adasekera pomwe adaona Mbuya. ²¹ Yesu adalewa pomwe kuna iwo, "Mtendere kuna imwe. Ninga ndimo Baba wanditumira, ndendende ndikukutumanimbo." ²² Pomwe Yesu akhadalewa ichi, adawapumira achiti kuna iwo, "Tambirani Mzimu Wakuchena. ²³ Bzakuphonya bza aliyense mum'bzilekererabzo, bzinilekereriwa; bzakuipa bza aliyense mum'bzikoyabzo, bzinikoyeka." ²⁴ Tomaji, m'bodzi wa khumi na awiri wale, wakuchemeriwa Didimo, akhali lini nawo ndipo Yesu adabwera. ²⁵ Wakupfunza winango pambuyo pache adati kuna iye, "Ife tamuona Mbuya." Iye adati kuna iwo, "Pokha pokha nditaona mmanja mwache mbonje za perego, nakubzatika boko langu mu mbabvu zache, ndiye nimkhulupirira bwino." ²⁶ Patapita nsiku zisere wakupfunza wache akhali mkati pomwe, apo Tomaji akhali nawo. Yesu adabwera nthawe ndizo misuwo ikhadafunga, achiima pampikiti pawo, achiti, "Mtendere kuna imwe." ²⁷ Kinangoka iye adati kuna Tomaji, "Fika pano na boko lakolo ubzatike mumbabvu zanguzi. Nampodi kumbakhala wakusaya kukhulupirira,soma mbakhulupirira." ²⁸ Tomaji adatawira achiti kuna iye, "Mbuyangu na Mulungu wangu." ²⁹ Yesu adati kuna iye, "Zjai thangwera kuti wandiona ine, ndiye wakhulupirira. Wakudalisika ni wale akhanati kuona, na kukhulupirira." ³⁰ Tsapano Yesu adachita bzizindikiro bzina bzizinji pamaso pa wakupfunza, bzizindikiro bzakuti bzikhanati kunembiwa kale m'bukhuli, ³¹ soma ibzi bzanembiwa pala mukhulupirire kuti Yesudi ni Mkhirisitu, Mwana wa Mulungu, apo kuti kukhulupirira, mungadakhala na moyo mudzina lache.