¹ Bzitamala bzinthu ibzi Yesu adabzidziwisa pomwe yekha kuna wakupfunza wache panyanza ya Tiberiyo. Umu ndimo iye adabzidziwisira yekha: ² Simoni Petulo akhali pabodzi na Tomaji wakuchemeriwa Didimo, Natanieri waku Kana mu Galileya, wana wa Zebedayo, na wakupfunzira winango wa Yesu. ³ Simoni Petulo adati kuna iwo, "Ndikuyenda kukapha nsomba." Iwo adati kuna iye, "Ife, tinibwera namwembo." Adayenda achikapita mumwadiya, soma alibe kupha chinthu usiku bwense. ⁴ Tsapano, pomwe machibesebese yakhadakwana kale, Yesu adaima pagombe, soma wakupfunza alibe kudziwa kuti akhali Yesu. ⁵ Ndiye Yesu adati kuna iwo, "Wanamwe, kodi muna chinthu kuti mkudya?" Iwo adamutawira iye, "Neye." ⁶ Iye adati kuna iwo, "Thusani makoka yanu mbali yakumadidi kwa mwadiya wanu, apo mumdzazigumana." Ndiye adathusadi makoka yawo apo alibe kukwanisa kuyapfuwa thangwera kuwanda kwa nsomba. ⁷ Tsapano wakupfunza ndiwo akhamkonda Yesu adati kuna Petulo, "Ni Mbuya." Pomwe Simoni Petulo adabva kuti akhali Yesu, adabzibvazika malaya mnthupi thangwe (nakuti akhali wakusaya kubvala), achibzithusa mnyanza. ⁸ Wakupfunza winangowo adabwera mumwadiya (thangwe akhali lini kutali na gombe, pafupi fupi ma cubiti madzana mawiri kunja), apo akhapfuwa makoka yakudzala na nsomba. ⁹ Pomwe adabula kunja kumataka. adaona moto wa masimbe popo na kansomba katabzatikiwa popo na mkate. ¹⁰ Yesu adati kuna iwo, "Bweresani zina mwansomba mwapha tsampanopazo." ¹¹ Simoni Petulo kinangoka adayenda kukanula khokalo kunja, lakudzala na nsomba zikulu zikulu, 153 za izo, soma na zizinji pomwe, khokalo liribe kuphadzuka. ¹² Yesu adati kuna iwo. "Bwerani mudzadye matabitchu." Palibe neye wakupfunza m'bodzi adayezera kubvunza, "Ndimwe mbani?" Adadziwa akhali Mbuya. ¹³ Yesu adabwera, kutenga mkate, achiwapa iwo, na nsomba pomwe. ¹⁴ Aka kakhali kachitatu Yesu kubzidziwisa yekha kuna wakupfunza atalamuka kuna anyamuya. ¹⁵ Iwo atamala kudya matabitchu, Yesu adati kuna Simoni Petulo, "Simoni mwana wa Yohani, umbandikonda kuposa awa?" Petulo adati kuna iye, "Inde Mbuya, mukudziwa nimbakukondani ine." Yesu adati kuna iye, "Dyesa wana wangu wamabirawa." ¹⁶ Adati pomwe kuna iye kachiwiri, "Simoni mwana wa Yohani, umbandikonda?" Petulo adati kuna iye, "Inde Mbuya, mukudziwa kuti nimbakukondani." Yesu adati kuna iye, "Usa mabira yanguya." ¹⁷ Adati kuna iye kachitatu, "Simoni mwana wa Yohani ine umbandikonda ?" Simoni adaphatiwa na nsisi thangwe Yesu adalewa kachitatu, "Umbandikonda kodi?" Adati kuna iye, "Mbuya, mukudziwa bzense, ¹⁸ mukudziwa nimbakukondani." Yesu adati kuna iye, "Dyesa mabira yangu. Indetu, indetu, ndikulewa kuna iwe, pomwe ukhali mnyamata, ukhabzimangira wekha mchiuno mkumbafamba kulikwense ukhafunako, soma pomwe wakulapa, umdzafuthula manja yako, apo munthu winango amdzakumangira mchiuno achimbadzayenda nawe ndiko umfuna lini kuyenda." ¹⁹ Tsapano Yesu adasewera ibzi kufuna kulatiza ni moda wanyi wakafedwe ndiwo Petulo angadzalemekeze nawo Mulungu. Atamala kulewa ibzi, adati kuna Petulo, "Nditewere ine." ²⁰ Petulo adazungunuka achiona wakupfunza ndiye Yesu akhamukonda akuwatewera,ule ndiye akhadayadzamira kumbali kukhadakhala Yesu pakulalira ndiye akhadalewa kuti, "Mbuya, mbani amdzakuperekaniyo?" ²¹ Petulo adamuona iye kinangoka achiti kuna Yesu, "Mbuya, munthu umweyu amdzachita chani?" ²² Yesu adati kuna iye, "Penu nimfuna kuti iye akhale ate ine kubwera, iwepo unabzo basa lanyi?" Nditewere ine." ²³ Ndiye mafalaya yadabveka pakati pa abalewo, kuti wakupfunza umweyo amdzafa lini. Chensecho Yesu alibe kulewa kuna Petulo kuti wakupfunza winango amdzafa lini, soma, "Penu nimfuna kuti iye akhale ate ine kubwera, iwepo unabzo basa lanyi?" ²⁴ Uyu ngwakupfunza ndiye ambachitira umboni bwa bzinthu ibzi, na ndiye adanemba bzobzi, apo tikudziwa kuti umboni bwachebu m'bachadidi. ²⁵ Pana bzinthu pomwe bzinango bzizinjitsa ndibzo Yesu adachita. Chingadakhala chirichense chidanembiwa, nimganiza kuti neye dziko lapansi palokha lingadakwanisa lini kukhala na mbuto ya mabukhu ndiyo yangadanembiwayo.