¹ Adzinza wangu, nampodi azinjife tikhale apfunzisi, pakuti mukudziwa kuti omwe tikhala apfunzisi ndife tidzaweruziwa kwenekwene. ² Nakuti tense timbapsoma munjira zizinji. Soma penu winango ambapsomalini na mafala, omweyo ni munthu wabwino, omwe angakwanise kumanga pomwe thupi lache. ³ Tsapano penu tiniikha bzakuphatira kumulomo kwa bulu kuti ambatibvere ifepano, ife tingakwanise kupotoloza thupi lache lense. ⁴ Dziwani pomwe kuti chombo cha m'madzi, neye bzikulubzikulu ndipo bzimbafambisiwa na mphepo ya mphamvu, soma zimbatembenuziwa na kachingwe kang'onong'ono kuyenda kulikwense ndiko nyakufambisayo alikufuna. ⁵ Munjira imweyi, lilime nkachiwalo kang'ono, soma limbabzikuzira bzinthu bzizinji. Nyang'anani kamoto kang'ono tani soma kambagasa thengo likulu. ⁶ Lilime ni moto, bzakuipa bza dziko bzidaikhiwa pa bziwalo bzathu. lilime limbapsipisa thupi lense, limbagasa moto mafambidwe ya moyo, ndipo lidzatenthiwa na gehena. ⁷ Nakuti mtundu uliwense wanyama za mthengo, mbalame, na bzakukwawa, nabzakulengiwa bzanyanja bzimba zerewera nakuzeleweziwa na wanthu. ⁸ Soma palibe munthu ndiye adalizelewera lilime. Ilo lidaipa, lidadzala nandulu yakupha. ⁹ Na lilime limbanamatira Mbuya na Baba, nalo khalokhalo timbatembelera nalo wanthu, omwe adakonziwa nchifaniziro cha Mulungu. ¹⁰ Pamulomo popa pambachoka bzabwino napomwe thembelero. Adzinza wangu, bzinthu bzimwebzi nampodi bzimbachitike. ^{11 12} Kodi lowe angachose madzi yakutapila na yakuwawa pa una bubodzi? Adzinza wangu, kodi muti wa mkuyu, ungabare zitona? Pinango tiligu, angabare mnkhuyu? Bzingachitikelini kuti madzi ya munyu yangachose madzi yabwino. ¹³ Mbani omwe ana mzeru na kubvesesa pakati pa imwepo? Lekani munthu omweyo awonese moyo wabwino na mabasa yache ya nzeru za umunthu. ¹⁴ Soma penu muna kaduka kakuwawa na bzakulewana mu mtimamo, nampodi kubzitambira ndipo nampodi kuchita gunkha kugazana na chadidi. ¹⁵ Nzeru zimwezi m'zakuchokalini kudzaulu. Soma, m'zapadziko lapansi pano, zakusaya mzimu, za bziwanda. ¹⁶ Nakuti pambuto ndipo pana mnsanje na bzakulewana popo pambakhala chisokonezo ndipo chakuipa chilichense chimbachitika. ¹⁷ Soma nzeru zachoka kudzaulu zimbakhala zakuchena, zimbakhala za mtendere_nachikondi, zafovolo, zakubvera, zakudzala na chifundo, na bzipaso bzabwino bzakusaya kusankhulana na bzakusaya kubzikomedwesa. ¹⁸ Soma bzakubala bza chadidi bzibzaliwa mu mtendere kuna iwo ndiye anichita mtendere.