¹ Adzinza wangu, nampodi kukhala na chikhulupiliro kuna Mbuya wathu Yesu Khistu, Mbuya wa ulemelero, na kunyang`ana maonekedwe ya munthu. <sup>2</sup> Kumbukani kuti munthu winango wapita m`tchalitchi mwanu wabvala mphete za golide na bzakubvala bzabwino, wapita pomwe winango nyakusauka wa bzakubvala bzamansanza. ³ Mukanyang`ana nyakubvala bwino ule mumbalewa, "Bwerani mukhale apa mbuto yabwino,'' soma mumbalewa kuna nyakusaka ule, "Iwe ima uko'' ayayi ''Khala pansi pa mpando wanguyi,'' <sup>4</sup> kodi mukuweruzana lini mwekhamwekha? Kodi mulibe kukhala anyakuweruza wakukumbuka bzakuipa? <sup>5</sup> Bverani, adzinza wangu wakukondeka, kodi Mulungu alibe kusankhula anyakusauka wa dziko la pansi kuhkhala anyakudala mwa chikhulupiliro na kukhala wakupita m`nyumba ya ufumu ndiyo adailonjeza kuna iwo ndiwo ambam`funa iye? <sup>6</sup> Soma imwe mumbanyoza anyakusauka! Kodi mbanyakudala lini ndiwo ambakuboneresani? Kodi ndiwolini omwe ambakuyendesani ku mbuto za mphamvu za umangi? <sup>7</sup> Kodi ndiwolini omwe ambanyoza dzina lanu labwino lomwe mumbacheriwa nalo? <sup>8</sup> Soma, penu mum`chita, mukwanise lamulo ninga ndimo bzidanembidwira, ''Kuti umukonde mwanzako ninga umbabzikondera iwepo," iwembo uchite bzibodzi bodzibzo. ⁹ Soma penu mumbanyang`ana kudala kwache, mukuphonya, ndipo mudzagaziwa na lamulo ninga wakuphonya. <sup>10</sup> Pakuti munthu angakwanise malamulo yense, soma angaphonyana na libodzi, waphonyana na yense. <sup>11</sup> Thangwe omwe adalewa kuti, "Nampodi kuchita chigololo," ngumweyo pomwe omwe adalewa kuti, "Nampodi kupha." Penu umchita lini chigololo, soma unipha, ukhala wakuphonyera lamulo. <sup>12</sup> Sewerani terepoyo ndipo chitani telepoyo ninga wanthu ndiwo adzaweruziwa na lamulo la ufulu. <sup>13</sup> Nakututi chiweruzo chidzakhala chakusaya chifundo kuna wale omwe alibe kuonesa chifundo. Chifundo chimbabzitamandira kugazana na chiweruzo. <sup>14</sup> Adzinza wangu, kodi phindu nchiyani, munthu winango akalewa kuti anacho chikhulupiliro, soma alibe mabasa yache? Kodi chikhulupiliro chimwechi chingamupulumuse? <sup>15</sup> Kumbukani kuti mchimwene pinango nana alibe bzakubvala bzabwino ndipo akusaya chakudya cha nsiku ibodzi. <sup>16</sup> Yezezani kuti m`bodzi wa imwepo akulewa kuna iwo kuti, ''Ndokoni na mtendere, mukafunike, ndipo mukakhute." Soma mulibe kuwapasa bzinthu ndibzo akubzisaya pa thupi lawo, phindu nchiyani? ¹⁷ Munjira imweyi chikhulupiliro pachokha chasaya mabasa yache, mchakufa. ¹⁸ Soma winango akalewa kuti, "Iwe unacho chikhulupiliro, soma ine ndinayo mabasa" Ndiwonese chikhulupiliro chako chakusaya mabasacho, inembo ndikuonese chikhulupiliro changu na mabasa yache. ¹⁹ Iwe ukakhulupilira kuti Mulungu alipo bodzi basi; unichita bwino. Soma neye bziwanda bzimbakhulupilira telepoyo, ndipo bzimbanjenjemera. ²⁰ Bzilema imwe, mukufuna kudziwa, kuti chikhulupiliro chakusaya mabasa chilibe basa? (Mabukhu inango yakalekale yadanemba kuti, ukufuna kudziwa, chilema iwe, kuti chikhulupiliro chakusaya mabasa nchakufa? ²¹ Neye Abrahamu m`beleki wathu alibe kuoneka wakulungama na mabasa yache panthawe ndiyo adapereka mwanache Isaki pa guwa la nsembe? ²² Mudaona kuti chikhulupiliro chidaphata basa pabodzi na mabasa yache ndipo na mabasa yamweya chikhulupiliro chache chidakwanisika. ²³ Ndipo manemba yadakwanisika yomwe yambalewa kuti, "Abrahamu adakhulupilira Mulungu, ndipo adawelengiwa kuna iye ninga wachadidi," ndipo akhachemelewa kuti ni mwanzache wa Mulungu. ²⁴ Muniona kuti bzidachitika thangwe la mabasa kuti munthu akhale nyakulungama, neye kuti na chikhulupiliro chokha. ²⁵ Munjira ninga imweyi pomwe, Rahabi puta ule alibe kukhala wakulungama na mabasa panthawe ndiyo adawatambira anyamithenga ndipo achiwayendesa na njira inango? ²⁶ Nakuti thupi lakusaya mzimu ndakufa, napomwe chikhulupiliro chakusaya mabasa mchakufa.