¹ Nakuti mkulu wansembe aliyense wakusankhuliwa pakati pa wanthu, ambaikhiwa kuphatira basa wanthu mubzinthu bza Mulungu, kuti apereke mpfupo na nsembe kubodzi za bzakuphonya. ² Wakukwanisa kuchita chifundo kuna wale wakusaya kudziwa na wakunyengeziwa, thangwe iye ana bzakulefuka. ³ Thangwera bzobzi, amfunika pomwe kumbapereka nsembe ya bzakuphonya bzache chaibzo, ninga ndimo ambachitira na bzakuphonya bza wanthu. ⁴ Palibe munthu ambabzitengera ulemerero bzaiye yekha. Soma, iye omwe anichemeriwa na Mulungu, ninga ndimo Aloni akhaliri. ⁵ Ndendendembo, Mkhirisitu alibe kubzitengera ulemetrero bzayekha kubziikha mkulu wa ansembe. Soma, omwe adalewalewa na iye adati, ''Ndiwe Mwanangu; lero ndasanduka Babako.'' ⁶ Bziri ninga ndimo ambalewera pomwe mbuto zinango, ''Ndiwe wansembe wa nthawe zense litamala dongosolo la Melikizedeki.'' ⁷ Munsiku za thupi lache, Mkhirisitu adapereka mapemphero na makumbiro kubodzi na mafala yakukuwa na misozi kuna Mulungu, iye wakukwanisa kumupulumusa ku imfa, apo adamubvera thangwera moyo wache wakugopa Mulungu. ⁸ Napo kuti akhali Mwana, adapfunzira kubvera thangwera bzomwe adabva nabzo kuwawa. ⁹ Adakonzewa mpulumira achikhala, wa aliyense omwe adabvera iye, thangwera chipulumuso chakusaya kumala. ¹⁰ Iye adasankhuliwa na Mulungu ninga mkulu wa ansembe litamala dongosolo la Melikizedeke. ¹¹ Tina bzizinji bzakulewa bza Yesu, soma m'bzakutinesa kufokotoza nakuti kubva kwanu kudagontha. ¹² Nakuti napo nthawe zino mumfunika kukhala apfunzisi, mukufunika kuti winango akupfunzisenimbo bzakutoma bza chiyambidwe cha mafala ya Mulungu. Mukufunika mkaka sikuti chakudya chakulimba! ¹³ Nakuti aliyense wakutondo kumbamwa mkaka okha ali chizerewezi cha mafala ya chilungamo, thangwe akadali mwana mng'ono. ¹⁴ Soma chakudya chakulimba mcha wanthu akulu misinkhu. Awa ndiwo wale omwe thangwera kukula kwao adazoloweresa kubvesesa kuti asiyanise bzabwino na bzakuipa.