¹ Apo tsapano, mbatiye tileke bzachiyambi cha mafala ya Mkhirisitu tipitirire kulewa bza kukula msinkhu. Nampodi kuikha pomwe maziko ya kutembenuka mtima kusiyana nayo mabasa yakufa na ya chikhulupiriro cha mwa Mulungu, ² ayai maziko ya kupfunzisa bza ubatizo, kubzatika manja na kumuka kwa anyamuya, na chiweruziro chakusaya kumala. ³ Timdzachita pomwe bzobzi angatibvuma Mulungu. ⁴ Nakuti m'bzakukwanisika lini pomwe kuna wale omwe akhadabvunikiriwa, omwe adalawidza mpfupo yakudzaulu, achitambirana nawo Mzimu wakuchena, ⁵ na ndiwo adalawidza mafala yache yabwino na mphamvu ya nthawe irimkubwera, ⁶ soma iwo pomwe adagwa mchisochero----mpakusaya kukwanisika kuwabwezeresa pomwe ku chilapo. Ichi nithangwera kuti adabzimanikira pomwe okha Mwana wa Mulungu, nakumuchitisa manyazi padecha. ⁷ Nakuti mataka ndiyo yambamwa mvula pafupi pafupi, yachibala chipatso chakufunikira kuna ndiwo adaphata basa pa matakayo---aya ni mataka ndiyo yambatambira mdaliso kuchoka kuna Mulungu. ⁸ Soma yangabala minga na mitungwi, zjai njapezipezi apo yali pafupi kutembereriwa. Chimaliziro chache chiri mkutenthiwa. ⁹ Soma takopeka na bzinthu bzabwino bza imwe, wakukondeka, bzinthu bza chipulumuso, napo kuti tikusewera tenepayu. ¹⁰ Nakuti Mulungu alilini wakusaya kulungama. Iye amdzayebwa lini mabasa yanu na chikondi ndicho mudaonesa ku dzina lache, thangwe mudatumikira wanthu wache wakuchena mtima, apo mukuwatumikira basi. ¹¹ Tikukhumbisisa kuti aliyense wa imwe awonese kuchita kamangumangu kamweka ate kumapeto, kuti chidikiriro chanu chikhale chaicho. ¹² Uku mkuti nampodi mubve utofu, soma wakuterezera wa iwo omwe na chikhulupiriro na kugwa mtima apite mmalonjezano. ¹³ Thangwe ndipo Mulungu adalonjezana naye Abulahamu, adalumbirira pa iye yekha, nakuti angadalumbirira lini wina mkulumbo kuposa iye. ¹⁴ Iye adati, ''Nimdzakudalisa iwe na kukupa dzinza lizinjisa.'' ¹⁵ Munjira yoyi, Abulahamu adatambira ndibzo bzidalonjeziwa atadikhirira mwakupirira. ¹⁶ Nakuti wanthu ambalumbirira wina mkulu kuposa iwo. Pamapeto pa kupokana kwao, lumbiro limbamalizira kupherezera. ¹⁷ Pomwe Mulungu adaganiza kuonesa bwino bwino kuna wakupita wa lonjezano la kusaya kusinthika kwa chakulinga chache, adalijirikira na chilumbiro. ¹⁸ Iye adachita ichi kuti na bzinthu bziwiri bzakusaya kusinthika---bzomwe m'bzakusaya kukwanisika pala Mulungu kunama---ife, omwe tathawira kwinango, timdzakhala na chilimbikiso chikulu kuphatisisa chidikiriro chakuikhika pamaso pathu. ¹⁹ Tinacho ichi ninga chikhotcherero na chakumangira chakudalirika cha moyo, chilimbikiso chakupita mkati kati kutseri kwa chakumpsinkha, ²⁰ ndiko Yesu, omwe adatoma kuyenda, wapita mwemo m'buto mwa ife. Iye wakhala mkulu wa ansembe wakunthawe yakusaya kumala ninga mwa dongosolo la Melikizedeke.