¹ Na tenepo, nakuti lonjezano lakupita mu mpumo wache likubvumiziwa basi kuima, mbatigopeni, kuti wina waimwe angaoneke ninga adaliperewera. ² Nakuti kuna ife yalalikiwa mafala yabwino ninga iwombo. Soma mafala yoyo yalibe kupindulira wale omwe alibe kutsudzuka mchikhulupiriro mwa wale ndiwo adayabvera. ³ Nakuti ife omwe takhulupirira tinipita mu mpumoyo, ninga ndimo adalewera iye, ''Ninga ndimo ndalumbirira mu ukali bwangu, Iwo amdzapita lini mu mpumo wangu.'' Neye achikhala kuti, mabasa yache yadamaliziwa kuchokera pa maziko ya dziko lapansi. ⁴ Nakuti walewa pinango bza nsiku ya chinomwe: ''Apo mulungu adapuma pansiku ya chinomwe kumabasa yache yensene.'' ⁵ Apo pomwe munkhaniyi iye adati, ''Iwo amdzapita lini mu mpumo wangu.'' ⁶ Nithangwerache tsono, kwasala kuti winango akapite ku mpumo, na wale ndiwo kalekale mafala yabwino yatalalikiwa kuna iwo alibe kupita thangwera kusaya kubvera. ⁷ Tsono Mulungu adaikha pomwe nsiku ina, kuichemera ''Lero,'' pomwe adasewera kudzera kuna Davide patapita nthawe ikulu mmafala ndiyo ndayabva kale: Lero penu munibva mafala yache, nampodi kuumisa mitima yanu.'' ⁸ Nakuti penu Yoswa akhadawapa mpumo, Mulungu angadasewera lini pomwe bza nsiku inango. ⁹ Tsapano wasalira mpumo wa Sabata wa kuna wanthu wa Mulungu. ¹⁰ Nakuti iye wakukapita mu mpumo wache wa Mulungu wapuma pomwe mu bzakuchita bzache, ningambo Mulungu adachitira bza iye. ¹¹ Nithangwerache mbatikhale wakukhumba kudzapita mu mpumo umweyo, kuti winango nampodi adzagwe mu kusaya kubvera ndiko iwo adachita. ¹² Nakuti mafala ya Mulungu yana moyo ya kuchita chita na yakuthwa kuposa dipa lakuthwa kwense kwense. Yambapsonda ate kwakugawira moyo na mzimu, na mumfundo na mmafuta ya mmafupa, apo yambakwanisa kuzindikira bzakukumbuka na bzakulinga bza mtima. ¹³ Palibe chinthu chakuchita kulengiwa chimbabisala pamaso pa Mulungu, soma chirichense chiri padecha na pakuonekera pamaso ya ndiye timfunika kumbachita naye. ¹⁴ Nithangwerache, nakuti tinaye mkulu wa ansembe mkulutsa ndiye wapita mdzaulu, Yesu Mwana wa Mulungu, mbatiye tiphatisise chitawiro chathu. ¹⁵ Nakuti tiribe mkulu wansembe omwe angabve lini nsisi na bzakulefuka bzathu. Soma, tinaye omwe munjira zense wayezeriwa ninga ndimo tiriri, kupambula kuti alibe bzakuphonya. ¹⁶ Mbatiye tsono tiyende mwakulimbika mtima kukadera yachifumu yachifundo, kuti tikatambire nsisi na kugumana chifundo chakutithandiza munthawe ndiyo tasaya.