¹ Nakuterepoyo, abale wakuchena mtima, mukutambirana nayo machemeredwe ya kudzaulu. Kumbukani bza Yesu , mtumwi na mkulu wa ansembe wa chitawiro chathu. ² Iye akhali wakukhulupirika kuna Mulungu, omwe adamuikha, ninga Mose ndimo akhaliri wakukhulupirika mu bzensene mnyumba ya Mulungu. ³ Nakuti Yesu akhadatengiwa wakuthemera ulemerero bukulu kuposambo Mose, nakuti nyakumanga nyumba ambalemekeziwa kuposa nyumba chaiyoyo. ⁴ Nakuti nyumba iriyense ina omwe adaimanga, soma ambamanga bzensene ni Mulungu. ⁵ Nakuti Mose akhali nyabasa wakukhulupirika mnyumba yense ya Mulungu, nyakumbachitira umboni bza ndibzo bzimdzaseweriwa mtsogolo, ⁶ Soma mkhirisitu ngwakukhulupirika ninga Mwana omwe ngwakukoya nyumba yache ya Mulungu. Ndife nyumba yache penu tiniphatisa kulimbika mtima na kubzithemba kwa chidikirirocho. ⁷ Mtenepo, ninga unilewera Mzimu Wakuchena: Lero, penu mumdzabva mafala yache ⁸ nampodi kuumisa mitima yanu ninga mwakuukira, mu nthawe ya mayezero mchipululu. ⁹ Ichi chikhali ndipo abereki wanu adandiukira pa kundiyezera ine, ataona bzichito bzangu ¹⁰ kwa magole makumi manayi. Nithangwerache ndidakalipa nawo mbwado umweule. Ndidati, 'Akhambasochera mmitima yawo. Akanati k,udziwa njira zangu.' ¹¹ Ninga ndidalumbirira mu ukali bwangu: 'Amdzapita lini mu mpumo wangu.''' ¹² Khalani tcheru, abale, kuti nampodi waimwe awoneke na mtima wakusaya kukhulupirira, mtima wakuchungunuka kumbali na Mulungu wamoyo. ¹³ Soma limbikisanani mwekha mwekha nsiku na nsiku, na pomwe pamchemeriwa ''lero'' kuti nampodi waimwe awumisiwe na chenjerero la chakuphonya. ¹⁴ Nakuti takhala wakutambirana wa Mkhirisitu penu tiniphatisisa kubzithemba kwathu mwa iye kuyambira pakutoma ate kumamaliziro. ¹⁵ Bza ibzi bzalewiwa kuti, ''Lero, penu munibva mafala yache, nampodi kulimbisa mitima yanu, ninga mwakuukira.'' ¹⁶ Mbani ndiwo adabva mafala ya Mulungu achikalipa mtima? Mbale lini ndiwo adabula mu Iguputo na Mose? ¹⁷ Adandunduma na mbani magole makumi manayi? Kodi si na wale ndiwo adaphonya, ndiwo matupi yawo yadagwa mchipululu? ¹⁸ Kodi iye adalumbirira mbani kuti amdzapita lini mu mpumo wache, penu mkwaiwo lini omwe adasaya kubvera iye? ¹⁹ Taona kuti alibe kukwanisa kupita mu mpumo wache thangwera kusaya kukhulupirira.