¹ Ni thangwerache tikufunika titchenkhe kwene kwene kundibzo timbabva, pala kuti nampodi tithawane nabzo. ² Nakuti penu mafala ndiyo yadaseweriwa na anjero yadziwika kuti ngakukhazikika, na chakuphonyeka ichi chense chakusaya kubvera chatambira mpfupo yakubwezera yakulungama, ³ tingathawe tani tsono penu tinilamba chipulumuso chikulu? Ichi mchipulumuso ndicho chidatoma kuseweriwa na Mbuya pakuchitira umboni kuna ife pala iwo wakuchibva. ⁴ Panthawe yokhayokhayo Mulungu adaichitira umboni na bzizindikiro, bzakudabwisa, na mphamvu za moda na moda, na kugawira mpfupo za Mzimu Wakuchena malingana na chifuniro chache. ⁵ Nakuti alibe kugonjesera anjero dziko likubweralo, lomwe tikulewali. ⁶ Soma wina adachitira umboni kwinango, kulewa kuti, ''Munthu mchiyani, kuti mumkumbukire iye? Ayai mwana wa munthu, kuti mucheze naye iye? ⁷ Mudamchepsa munthu pang'ono na anjero; mudamubvazika korona wa ulemerero na ulemu. ⁸ Mudagonjesa bzensene pansi pa nzayo zache.'' Thangwe mkwa iye ndiko Mulungu adagonjesera bzinthu bzense. Alibe kusiya chinthu chakusaya kugonjesiwa kuna iye. Soma tsapano apa tiribe kuona bzense kugonjera kuna iye. ⁹ Soma tikuona iye omwe adamchepsa pang'ono na anjero kwa kanthawe kakuchepa, Yesu, wakubvazikiwa korona wa ulemerero na ulemu thangwera kubonera kwache na imfa, pala kuti na chifundo cha Mulungu akalawidze imfa thangwera aliyense. ¹⁰ Nakuti kudamukomera Mulungu, thangwe chirichense chiripo pala iye na thangwera iye, kubweresa wana azinji ku ulemerero. Bzikhali bwino kuna iye kukonza mtsogoleri wakutoma wa chipulumuso chawo wakudzala kudzera mkubonera kwache. ¹¹ Nakuti iye wakuchena na ule wakuchenesiwa wensene akuchokera mwa m'bodzi. Thangwera ichi iye alibe manyazi kuwachemera abale. ¹² Iye ambati, ''Nimdzalalikira dzina lanu kuna abale wangu, nimdzaimba bza imwe kuchokera mkati mwa thimu lawanthu.'' ¹³ Apo pomwe, ''Nimdzamukhulupirira iye.'' Apo pomwe. ''Onani, ndiri pano na wana ndiwo Mulungu wandipa ine.'' ¹⁴ Mnthangwerache, nakuti wana ndiwo nyama na mulopa, adagawana bzinthu bzobzo munjira ibodzi bodziyo, pala kuti kudzera mu imfa akadzonge ndiye ana mphamvu yakuimfa, iye ni, mdyerekezi. ¹⁵ Ibzi bzikhali tenepo kuti akatsudzule wense ndiwo mkudzera mkugopa kwa imfa adakhala miyoyo yao yensene atamangiwa ukapolo. ¹⁶ Mchadidi letu ni anjero lini ndiwo iye ambawathandiza, soma mbumba ya Abulahamu.

¹⁷ Ndiye bzikhali bzakufunika kuti iye akhale ninga abale wache munjira zense, pala kuti akhale mkulu wa ansembe wachifundo na wakukhulupirika mwakuphatizana na bzinthu bza Mulungu, kuti apereke malipiro ya bzakuipa bza wanthu. ¹⁸ Thangwe Yesu mwenekachiro adabonera achiyezeriwa, ambakwanisa kuthandizambo iwo ndiwo aniyezeriwa.