¹ Na ufulu bwa Khilistu adatisandusa ife kuhala wa ufulu. Imani bzakulimba, thangwe, nampodi kumangiwa pomwe tsinga zaunyabasa. ² Nyang'anani, ine, Paulo, ndikulewa kuna imwe kuti penu imwe mubvuma mwekha kugwatiwa, Khilisitu mudzapinula lini naye chinthu chili chense. ³ Ine ndikuchita pomwe umboni kuti munthu aliyense wakubvuma yekha gwatiwe iye namangawa yakuchita malamulo yense. ⁴ Imwe mwabzi lekanisa na Khilistu, imwe omwe mudayesiwa wakulungama na lamulo; imwe muniyesiwa lini pomwe wa chisomo. ⁵ Nakuti ife kudzera mea mzimu, na chikhulupiliro, tikudikira chitawirizo cha chilungamo. ⁶ Nakuti mwa Yesu Khilistu pinango wakugwatiwa pinango wakusaya kugwatiwa bzilibe basa, soma chikhulupiliro chabasa kudzera mwachikondi. ⁷ Imwe mudathamanga bzabwino. Mbani omwe adakuletsani imwe kuti musaye kubvera bzachadidi? ⁸ Kukopa kumweku kukuchokeralini kuna iye omwe adakuchemerani! ⁹ Chakufufumisa pang'ono chimbafufumisa mnsuwa wense. ¹⁰ Ine ndikukhulupilira imwe mwa Mbuya kuti mudzakhalalini nawo mtima winango wakukumbuka bzakusiyana. Soma iye omwe ankuzunzani imwe iye adzamva kuwawa pa tsiku lachiyeruzo, kulikwense komwe iye ali. ¹¹ Adzinza, penu ine ninilalikira bza mgwatiwe, ine nidzazunzikiranyi? Nankhani yomweyi pomwepo nidzaipidwa na mtanda omwe umdzachosiwa. ¹² Ninga iwo omwe adakugwesani imwe, ine ndikufuna iwo adzabzigwate okha! ¹³ Nakuti imwe adakuchemerani mwa ufulu, adzinza. Soma nampodi kuphatisa basa ufulu bwanu ninga chakuthandizira ku thupi; pinango, nachikondi chitirani winango. ¹⁴ Nakuti chilamulo chense chidakwanisiwa na mafala: "Umbakonde mwanzako ninga umbabzikondera iwepo wekha." ¹⁵ Soma penu munilumana na kudyana winango na mwanzache, nyang'anani kuti nampodi kudzongana winango na mwanzache. ¹⁶ Soma ine ndikulewa, fambani na mzimu soma nampodi kunyamula bzilakolako bza thupi. ¹⁷ Nakuti bzilakolako bza thupi bzimbagazana na mzimu, na bzilakolako bza mzimu bzimbagazana na thupi. Na thangwe lomweli chilichense, imwe mungachitelini bzinthu bzomwe imwe munfuna. ¹⁸ Soma penu mzimu ankutsogolerani imwe, ndimwelini wakubvera lamulo. ¹⁹ Tsopano mabasa ya thupi yambawoneka: uputa, bzakuipa, kukhumba bzakunyansa, ²⁰ kupembedza mafano, nyanga, kuipidwa, kuchita ndewu, kununkhidwa, kubva chiya, bzakulewana, kufuna bzakuipa, kugawanikana, ²¹ njiru, kuledzera, kusenzeka na kumwa, na bzinthu ninga ibzi. Ine ndikukuzani, ninga ndidakuuzani kale pakuyamba, kuti omwe ndiwo ambachita bzinthu ibzi amdzapitalini mu ufumu bwa Mulungu. ²² Soma bzipatso bza Mzimu ndicho chikondi, kuseka, mtendere, kuleza mtima, chifundo, kuchita bzabwino, chikhulupiliro, ²³ kupfatsa, kubzilambiza wekha; mukagazana na bzinthu bzimwebzi palibe lamulo. ²⁴ Iwo omwe ali mwa Yesu Khilistu adamanikiwa na thupi na bzakukhumba bzache na bzilakolako bzache. ²⁵ Penu ife tinikhala na moyo mwa Mzimu, lekani ife tifambe na Mzimu. ²⁶ Nampodi kuti tikhale wakubzikuza, wakugazana winango na mwanzache, nampodi kukhala na njiru winango na mwanzache.