¹ Adzinza, penu winango wa imwe aphatiwa nako kuphonya kwakuti, imwe omwe muna mzimu mumubweze na mzimu wakupfatsa. Nakubzi nyang'anisisa mwekkha, kuti imwe nampodi kuyeziwa. ² Munyamulirane bza kutaza mwanzanu, kuti mukwanise malamulo ya Khilistu. ³ Soma penu winango anikumbuka ninga iye anachinthu pomwe iye alibe chinthu, iye ali kubzinamiza yekha. ⁴ Aliyense abziyeze yekha na basa lache, kinangoko iye adzabzikuza yekhayekha neye thangwe la winango. ⁵ Nakuti aliyense adzatakula mtolo wache. ⁶ Iye omwe ambaapfunzisa mafala akhale wakucheza bzinthu bza bwinino na omwe aniwa pfunzisa. ⁷ Nampodi kunyengeziwa. Mulungu ambanyoziwa lini, soma chomwe munthu wabzala, chomwecho iye adzanyamula. ⁸ Nakuti iye omwe abzala mbewu yache na thupi, na thupi adzatuta bzakungeka. Iye omwe abzala mbewu na Mzimu, na mzimu adzatutamoyo wakusaya kumala. ⁹ Tiyendeni tisamale nakuchita bza bwino ,nakuti pa nthawe yache ife tidzatuta bzakukolola, penu ife tini neta lini. ¹⁰ Penu ife tinichita ninga tina nthawe, tiyendeni tichitire wanthu wense bzakukoma, makamaka kuna wale omwe tinawo nyumba ibodzi mwa chikhulupilo. ¹¹ Nyang'anani bzakunemba bzikulubzikulu bzomwe ine ndanemba kuna imwe na boko langu. ¹² Iwo omwe amfuna kuoneka ninga wabwino kuthupi amkungingimizani imwe kumgwatisa. Akuchita bzobzi kuti angakule na mtanda wa Khilistu. ¹³ Nakuti wale omwe adagwatisa okha anisunga lina lamulo, soma iwo akufuna imwepo mugwatise kuti iwo abzikuze na thupi lanu. ¹⁴ Soma ine nibzikuza lini kupambula na mtanda wa Mbuya Yesu Khilistu,kudzera mwa iye dziko lapansi lidamanikiwira ine, na ine kuna dziko lapansi. ¹⁵ Nakuti penu ni mgwatiwe ulibe basa penu mkusaya kugwatiwa kulibe pomwe basa, soma kulengiwa pomwe papsa ndiko kuni lewengiwa. ¹⁶ Kuna wense omwe ambafamba achitewera chilangizo chochi, mtendere na chifundo bzikhale na iwo, bzikhale pomwe napa Isarayeri wa Mulungu. ¹⁷ Kuyambira tsapano ine palibe munthu ndiye andinesa, nakuti tsapano ine m'thupi mwangu ndatakula bzizindikiro bza Yesu. ¹⁸ Chisomo cha Mbuya wathu Yesu Khilistu chikhale na msimu wanu, adzinza. Ameni.