¹ Nampodi kutsimula mumthu mkulu. Soma, umudandaulire ninga ni babako. Maswaka ninga abale, ² akazi akulu ninga azimai, na akazi ang'ono ninga azinana, m'kuchena mtima kwensene. ³ Lemekezani akazi wamasiye, wamasiye chayiwoiwo. ⁴ Soma penu wamasiyeyo ana wana ayai azukulu, atome iwo kupfunzira kuchitira ulemu wam'banja mwao. Nakubwezela kuna abereki thangwe ichi m'chakudeka pamaso pa Mulungu. ⁵ Soma iye omwe ni wamasiye chaiyeiye, wasiyiwa yekha, waikha chikhulupiliro chache mwa Mulungu nakupitiriza kubzipereka mwanyongo na mmanamato usiku na masikati, ⁶ soma mkazi wakukhala mwakubzikomedwesa ngwakusaika napo iye ana moyo. ⁷ Alangizeni pomwe iwo bzobzi, kuti akhale wakusaya thangwe. ⁸ Soma penu winango anithandiza lini abale wache makamaka wale wapabanja pache chaiwo, iye walamba chikhulupiliro apo aniyipa kuposa wakusaya kukhulupilira. ⁹ Nampodi kumulewengela wamasiye omwe akanati kufikiza magole makumi matanthatu, angakhala mkazi wamwamuna m'bodzi. ¹⁰ Iye a khale wa mbiri ya kuchita bzichito bzabwino, penu wafuwa wana ayai watambila bwino alendo, ayai wasambisa nzayo za wanthu wakuchena mtima wa Mulungu, ayai wathandiza wakutsautsika ayai penu adatewezadi mabasa yensene yabwino. ¹¹ Soma wamasiye ang'ono ang'ono, alambeni kuwanemba pa mndandanda. Nakuti pomwe aniyamba kubva bzilakolako bza kuthupi anichitira Mkhirisitu makiriyado, angafuna kuloodwa. ¹² Ndendende pomwe pakukhala nacho chakugaza thangwe adataya chikhulupiriro chawo chakutoma. ¹³ Panthawe ibodzibodziyo, ambapfunzira pomwe kukhala wautofu apo ambafamba nyumba na nyumba. Ambakhala lini na utofu bokha, soma ambasewera pomwe bzapezipezi achichita bzinango na bzinango, kusewera bzinthu bzomwe akuthemera lini kusewera. ¹⁴ Mthangwerache ndikufuna aloodwe wamasiye ang'ono ang'ono, abale wana, ayeruze nyumba, apo nampodi kupasa mpata muwengi kutisasatira. ¹⁵ Nakuti winango adayamba kupambuka kutewera Satana. ¹⁶ Penu mkazi winango wakukhulupirira ali nawombo akazi wamasiye, iye awathandize, pala kuti mpingo nampodi ukhale pa mpanipani, kuti ukwanisembo kuthandiza wamasiye chaiwo. ¹⁷ Akulu wakutonga bwino mbakuthemera kupasiwa ulemu buzinji, makamaka wale wakuchita mafala na chipfunziso. ¹⁸ Nakuti manemba yambati, ''Nampodi kufunga kukamwa kwa ng'ombe ndiyo ikupuntha tirigu'' nakuti ''Nyabasa ngwakuthemera kutambira malipiro yache.'' ¹⁹ Nampodi kutambira mirandu yakuguma munthu mkulu pokha pokha pakhale mboni ziwiri ayai zitatu. ²⁰ Tsimulirani wakuphonya padecha pala kuti winango akhale na mantha. ²¹ Ndikukutonga chaibzo iwe , pamaso pa Mulungu na pa Mkhirisitu Yesu na anjelo wakusankhuliwa, kukoya bzitongi bzimwebzo mwakusaya tsankhulo, nampodi kuchita bzinthu mwatsankhulo. ²² Nampodi kukulumiza kubzatika manja pa munthu. Nampodi kuphatizana nabzo bzakuipa bzamunthu winango. Ukhale wakubzikoya wekha mwakuchena. ²³ Uleke kumwa madzi yokha. Mwalo mwache, umwe pomwe vinyu pankiti thangwera bvuto la mmimba na kudwala kwako kwa pafupi pafupi. ²⁴ Bzakuphonya bza wanthu winango bzimbadziwika padecha, apo iwo ambayenda nabzo kukatongiwa. Soma bzakuphonya bzinango bzimbabwera pambuyo pache. ²⁵ Ndendende pomwe, mabasa inango yabwino yambadziwika padecha, soma inango yangabisike lini.