¹ Wensene omwe ali pa ngwete ya ukapolo atenge kuti ambuyayo mbakuthemera kuwapa ulemu bwensene. Achite ibzi kuti dzina la Mulungu na chipfunziso chache nampodi bzitambire makiriyado. ² Akapolo omwe ana ambuya wao wakukhulupirira nampodi kuwapepusa thangwe zjai mbubale bwawo. Soma, apitirize kuwatumikira basi. Nakuti wakupindulawo mbakukhulupirira na kukondeka. Upfunzise na kuchenjeza ibzi. ³ Penu winango anipfunzisa chipfunziso chakunama chakusaya kuphatizana na mafala ya chadidi ya Mbuya wathu Yesu mkhirisitu na cha umulungu, ⁴ umweyo zjai akubzithusa apo akubvesesa lini chinthu. Wayalukira pa mabvunzo na makani ya mafala kumene kumbachokera njiru, ndeu, bza makiriyado, bzakuganizirana bzakuipa, ⁵ na kupokana pakati pa wanthu omwe ana mitima ya chinyengo. Iwo ataya chadidi apo akuyesa kuti chinamato ni njira yakuphatira kobiri zizinji. ⁶ Tsapano chinamato pabodzi na kuderekha kumbapindulisa kukulu, ⁷ nakuti tiribe kutakula chinthu pakupita mdziko lapansi, apo pakubula pano pomwe tingatenge lini chinthu. ⁸ Soma, mbatiye tikhutisiwe na chakudya na kubvala. ⁹ Tsapano iwo wakufuna kukhala wavida ambagwera mmayezero, na mmatchera. Ambagwa m'bzikhumbo bzizinjitsa bzakupusa na bzakupwetekesa, na bzinango bzomwe bzimbamiza wanthu mchidzongeko na mchitayiko. ¹⁰ Nakuti chikondi chapa kobiri ni muzi wa bzakuipa bzense. Wanthu wina wakuchikhumba adasochera achitaya chikhulupiriro, achibziphaya na bzakuwawa bzizinji. ¹¹ Soma iwe, munthu wa Mulungu, thawa ibzi. Psaga chilungamo, chinamato, chikhulupiriro, chikondi, chipiriro na chipfatso. ¹² Menya nkhondo yabwino ya chikhulupiriro. Phata moyo wakusaya kumala ndiwo adakuchemerera, na omwe udatawira chitawiro chabwino pamaso pamboni zizinji. ¹³ Ndikukutonga ibzi pamaso pa Mulungu, omwe ampapa moyo bzinthu bzense, na pamaso pa Mkhirisitu Yesu, omwe adachitira umboni chitawiro chabwino pamaso pa Pontiyo Pilato, ¹⁴ kukoya chitongicho chakusaya mbalawande ayai chirema kufikira maonekero ya Mbuya wathu Yesu Mkhirisitu. ¹⁵ Mulungu amdzazimbulira maonekedwe ya Mkhirisitu nthawe yabwino----Mulungu, wakudalisika Wakutonga yekhayo, Mfumu yakutonga na Mbuya wakutonga. ¹⁶ Omwe iye yekha ali nawo moyo wakusaya kumala omwe ambakhala mkubvunika kwakusaya kufikika. Palibe munthu ambamuona ayai angakwanise kumuona. Kuna iye kukhale ulemu na mphamvu yakusaya kumala. Amen. ¹⁷ Langizani wavida mdziko lino nampodi ambasamwe nakuti pomwe nampodi ambathembe vida, yomwe imdziwika lini kukhala kwache, soma, akhulupirire mwa Mulungu. Iye ambapereka kuna ife vida chaiyo pala tidekedwe nayo. ¹⁸ Awuzeni kuchita bzabwino, adale na mabasa yabwino, ambasekere kupasa wina na kumbabverana. ¹⁹ Munjira ninga yoyi amdzabzigwezekera okha maziko yakukoma kunthawe ikubwerayi, pala kuti akaphate moyo chaiwoiwo. ²⁰ Timoteo, tchenkha ndicho chidapasiwa kuna iwe. Lamba bzakusewera bzapezipezi na bzakusaya msolo na maganizo yakunyosa baludya bzomwe mwakunama ambati ndiko kudziwa. ²¹ Wanthu winango ambabzitawira bzobzi apo asochera mchikhulupiriro. Chisomo mbachikhale nawe.