¹ Tsono Mzimu ukulewa mwakulewesesa kuti munthawe yakumaliza wina amdzataya chikhulupiriro achidzapumpsika na mizimu yakusocheresa na mapfunziro ya bziwanda ² na maonekedwe yakunyengeza ya iwo wakusewera bzakunamawo, chikumbumtima chao chimdzapumpswika. ³ Amdzalambiza wanthu kukhala na mabanja na kawalambiza bzakudya bzomwe Mulungu adabzilenga pala wachikhulupiriro na wakuzindikira chadidi kuti abzitambire mwakutenda kwao. ⁴ Nakuti chakulengiwa na Mulungu chirichense mchabwino, apo palibe kachinthu kakuthemera kutayika kakuti kadatambiriwa mwakutenda ndiko kanilambiwako. ⁵ Nakuti kambachenesiwa na mafala ya Mulungu na pemphero. ⁶ Penu unikumbusa abale bzinthu ibzi, umdzakhala mtumiki wabwino wa Yesu Mkhirisitu. Wakuleredwa mmafala yachikhulupiriro na malangizo yabwino ndiyo udayatewera. ⁷ Soma lamba nkhani zapezi pezi zakukondewa na akazi wakukalamba. Soma, bzizereweze kuchita chinamato. ⁸ Thangwe chizerewezi cha thupi chimbaphindula pang'ono, soma chinamato chimbaphindula mu bzense. Popeza chimbakhala nalo lonjezano la moyo uno na ndiwo ukubwera. ⁹ Mafalaya ngakukhulupirika na yakuthemera kutambiriwa mwakudzala. ¹⁰ Nakuti nithangwe lache timbaphata basa na kuyezeza. Nakuti chidikiriro chathu tiri nacho pa Mulungu wamoyo, omwe ni mpulumusi wa wanthu wensene, maka maka wa anyakukhulupirira. ¹¹ Langiza wanthu uchiwapfunzisa bzobzi. ¹² Wina nampodi apepuse umwana bwako, soma ukhale chitewezo kuna iwo wakukhulupirira mmafala, mmafambidwe, mchikondi, mchikhulupiriro, na mkuchena mtima. ¹³ Ate ndidzabwere ine, uwanze kulewenga, kuchenjeza, na kulangiza. ¹⁴ Nampodi kumpswinkha mphatso ndiyo iri mwa iwe, yomwe idaperekiwa mwa iwe kudzera muuneneri, na kubzatika manja kwa akulu. ¹⁵ Tchenkha bwio ibzi. Khala mwa ibzi, pala kuti kupitiriza kwako kukhale umboni kuna wanthu wensene. ¹⁶ Bzinyang'anisire wekha na chipfunzisocho. Pitiriza mu ibzi. Nakuti pakuchita tenepoyo, umdzabzipulumusa iwe wekha na iwo wakukutetekera iwe