¹ Mafala aya ngakukhulupirika: Penu wina anikhumba basa lakunyang'anira, wakhumba basa lakudeka. ² Tsono wakunyang'anira akhale na mbiri yabwino. Akhale mamuna wamkazi m'bodzi. Akhale wakubzikoya, wakubzilambiza, wakulongosoka, na wakukonda kuchezesa alendo. Wakukwanisa kupfunzisa. ³ Nampodi akhale wakumbaledzera, sikuti wakumbapoka, soma akhale, wakuderekha, wamtendere. Nampodi akhale wakukonda kobiri. ⁴ Akhale wakumbatonga bwino muyi wache, apo awonesese kuti wana wache ambamubvera na kumulemekeza munjira iriyense. ⁵ Thangwe penu munthu amtaza kudziwa kutonga pamuyi pache, amdzakoya tani mpingo wa Mulungu? ⁶ Nampodi akhale wakutembenuka kumene, pala nampodi akhale na madumwa apo angagwe mukutsimuliwa ninga Satana. ⁷ Akhale pomwe na mbiri yabwino kuna wale wakunja, pala kuti nampodi agwe mmanyazi na mmatchera wa Satana. ⁸ Ndendende pomwe, atumiki akhale wakulemekezeka, wakusaya kumbasewera pawiri. Nampodi ambamwe vinyu ayai kukhala wa mingululi. ⁹ Wakukhala na chinsinsi cha chikhulupiriro na chikumbumtima cha chadidi. ¹⁰ Iwo pomwe atome ayezeriwa, apo tsapano atumikire bwino nakuti zjai alibe mathangwe. ¹¹ Mtenepo pomwe, na akazawo akhale wakulemekezeka, wakusaya kumbasasata, soma wakubzikoya na wakukhulupirika mu bzense. ¹² Atumiki akhale amuna wamkazi m'bodzi. Wakutonga bwino wana wao na iwo mnyumba zaiwo okha. ¹³ Nakuti iwo angatumukira bwino am'bzitengera okha mbiri yabwino na kulimbika kukulu mwa chikhulupiriro cha mwa Mkhirisitu Yesu. ¹⁴ Pomwe ndikunemba ibzi kuna iwe, ndikudikhira kubwera kuna iwe tsampanopa. ¹⁵ Soma penu nimchedwa, ndikunembatu kuna iwe pala ubakadziwe kufambisa wekha m'banja la Mulungu, lomwe ni mpingo wa Mulungu wamoyo, nsandamira na chakujirikira cha chadidi. ¹⁶ Tensene pakutawiriza kuti chinsinsi chakuchitira Mulungu mchikulu: ''Iye omwe adaonekera kuthupi adayezeriwa wakulungama mu Mzimu, adaoneka na anjero, chidalalikiwa kuna wamitundu, wakukhulupiriwa mdziko lapansi, na wakutambiriwa mu ulemerero.''