¹ Mthangwerache, pakutoma, ndikukumbira kuti kukumbira kwangu kwakubzichepesa, mapemphero, bzakukumbira, na kupereka kutenda bzichitike kuna wanthu wensene ² kuna mafumu na wensene wale ana mphamvu zakutonga, pala kuti tikhale mumtendere na moyo waphee mwa kulemekeza Mulungu na kulemekeza wensene. ³ Ichi mchabwino na chakutambiriwa pamaso pa Mulungu Mpulumusi wathu. ⁴ Iye akufuna kuti wanthu wensene akapulumuke nakufika pakuzindikira chadidi. ⁵ Nakuti pana Mulungu m'bodzi, apo na mkhotchererii m'bodzi wa Mulungu na wanthu, munthuyo ndiye Mkhirisitu Yesu. ⁶ Adabzipereka yekha ninga chakulombolela kuna wensene, ninga mboni panthawe yache. ⁷ Nathangwe limweri ndidasankhuliwa mulaliki na mtumwi----ndikulewa chadidi, ndikunama lini----nakukhala pomwe mpfunzisi wa Wachikunja mchikhulupiriro na mchadidi. ⁸ Mthangwerache, ndikufuna amunawo mbuto zensene kuti apemphere nakukwiza manja yakuchena seye kukalipa ayai kuchita makani. ⁹ Ndendende pomwe, na akazi abzibvazike bzakubvala bzakudekera, mwakumbabva manyazi na kubziletsa, sikuti kuikha tsisi lakupakasa ayai oro ayai ngale ngale ayai bzakubvala bzakuumira, ¹⁰ soma bzomwe m'bzakuthemera pala akazi wakutawira kulemekeza Mulungu na mabasa yabwino. ¹¹ Mkazi apfunzire kukhala wachete, mkubvera kwensene. ¹² Nimbabvumiza lini mkazi apfunzise ayai kutonga mamuna, soma kukhala mwakunyamala. ¹³ Nakuti Adamu adalengiwa pakutoma, kinangoka Hava. ¹⁴ Adam alibe kunyengeziwa. soma mkazi adanyengeziwa achipita mukuphonya. ¹⁵ Soma, amdzapulumusiwa kudzera mwa kubala wana, penu iwo ampitiriza mchikhulupiriro na chikondi na chicheneso pabodzi na kubzilambiza.