¹ Oo, kamai ta tem wen ti kuuno Ibiraayi, shiimu kama ti ta lo-shikii? Penaai wen ti ku paaro lishaarii? ² Ma Ibiraayi maa weyaa diya moi kan daklan-wem ti toomno Yamma, ti bi shuran niyo kan po wee ta yuun roomo kan te ta shii nang, pene a ti toomno Yammam. ³ Ballan paaro Yamma teka ya, "Longku Ibiraayi liyaa shaari kan Yamma, nang Yamma in maaro tenei diya dob ti piree kan shi." ⁴ Wende shi mo ti ya shuran, wee ti anngon shii, pene kaa wee ta yiu-bi. ⁵ Pene niyo yei shereni ti ku shurannim, pene in shereni ti kuuno Yamma ye shii ti li moi kan peen poshaarino Yammam shinui in we diya mei daklo wem ti piree kan shim, ta shar lishaari niyoi tei kaa diya dobni. ⁶ Tenei we Dauda nyimmaa ye yuwaa paaro ti ku kpang ye yuwaa ti niyo ye Yamma teka ya shii mo an diya dob. ⁷ Shii in tewi ya, "Me kan kpang ti kuujui me fuddaan shasshalau karijju, kan me mo teklaan shasshalauni. ⁸ Mo kan kpang ti kuuni niyo ye Fo-mina maaro kelnyonim." ⁹ Kpang tenei taakai me karaa kuwoju waani ya, nangii kan me wau shuuro mei kar kuwojum ya? Wee min ti tewii te, "Gee Ibiraayi ye maaraa lishaarinii diya dob." ¹⁰ Oo, dumai ta koddi nan shire ye teka ya shii mo an diya dobi? Ye tidai kar kuwonim ya, nangii ka bi karan kuwoni ya? Ai, aka bim, penei ye tidai kar kuwonim. ¹¹ Nang Ibiraayi in kar kuwonii, tenei in yooro teman jimro ti ku diya dob ye shii kan te, ta lishaarini, we tangna ti koddi ye shii an wau shuuro moi kar kuwonim. Longkuuno te, Ibiraayi in yooni fo me an lishaari kan Yamma, me sharaa shinui yaa me an diyo dob, kaa ye shinui a kar kuwojum. ¹² Kaa tei Ibiraayi in shiwoni fowi ti me karaa kuwoju, mei a bara karan kuwoi waani ye shinui kan tem, Pene birang shinui in ti yiu bi dangan pi peen lishaari ye Ibiraayi kan te ye tidai kar kuwoniim. ¹³ Deewanku te ye yuwaa ti Ibiraayi kan po-peenni ya ta tappo ku-buk, pene a ti bi shoro ye yuwaan ti shiim, nang bara diya dob te ye ti we ti bi lishaari. ¹⁴ Ma me an yiu bi shoro maa me ta tappo ku ku-buk, ai, lishaari niyo ta yooroi we waani, birang deewankuuno Yamma shigoro we waani. ¹⁵ Longkuuno te, deewankui wannai ti bi lishaari, longku piree a doo shorom, a doo ye po yuun murkum. ¹⁶ Longkuuno te, deewanku sheerii ti ku lishaari te, Tenei longku in deero ti ku kunnguno Yamma, birang in pee bi ti po peenno Ibiraayi ding, a ti me ti ta gun shoro ku jaljum, pene kan me ding ti kumi kan kulli, kaa ye Ibiraayi yuwaan. Ibiraayii fomu kama ding. ¹⁷ Kaa ye ballii ya, "Ne liyaako ken shiwogo fowi buk po-buk gbe," Kaa ye peekan bi deewanku te ti toomno Yamma, mo Ibiraayi kunnga kan shii, mo shii birang ti min kerang ti me murooju. Birang shii mo kan kumen ye ta yeeru wee a yoojum in yooju. ¹⁸ Kaa ye li-shaarino Ibiraayi kaa shigaro we waani, ding kaa tei shii in sha toom ka li-shaari, in ti kumi nang in yooni fowi buk po-buk gbe. ¹⁹ Ta koddi teere, Ibiraayi kan pelle sheno shig dok, pene shii a yooni duulan ta lishaarim, kama ye shii ti geena bangni kuugero longku kooro, birang kan Sharattu ye kookaro ti fok koddi ye tei ta dum pattani. ²⁰ Pene ka longku deewankuuno Yamma, Ibiraayi a yooni lakkidik ti ta kenni lishaarim. Kan ye kaa teerei, shiiknii in peero ti ta li-shaari kan kum-pinno Yamma. ²¹ Shii in deeni ti ta keman pee bi ya Yamma ta dum kem deewankuuni. ²² Longkuuno tenei in maaron ti shii kaa diya dob ti piree kan shi. ²³ Pene paaro te ye ti tewi ya, "in maaro lishaarii diyo dob ti piree kan shii," a longkuuni shii dokni ye ballaam. ²⁴ Pene ballaa we tei longkuumu kama, kama sheemu, ye Yamma ta maaro mu kamai me an diyo dob, kama ye kama kunnga kan mo shokraa Yeesho Fo-minamu kama ti ta duwo. ²⁵ Tenei mo minaa shii ka longku shasshalaumu kama kan in shokirra ka we shiiro mu kama.