¹ Oo, we bi tewani ka kei niyo Yawudaawai tong? Wii bi karan kuwoi tong? ² Ka we maa, ti koko ding! Ka toom, shinui Yawudaawa ye Yamma po kuuni minaan jooro bi paaro te yei weeno Yamma. ³ Pene ma peddiju maa kum kan lishaarim paa? Mal fokju ta liyani tomon fokno Yamma in yooro we waani ya? ⁴ A kaa we tem, koo la-wiiu, kpaaliyo ding mo Yamma yooni mo an yen kulli, la niyo in yooni an shaba. Kaa ye ballii ya, "longku in peni, paarokoi yen kulli, kan ke ta yek bangno koo nong, ye ke maa wannai ya shiire." ⁵ Pene ma kenni dob mu kama maa ta shuklo dobno Yamma ti kudamum, kamai ta teu wen? Kama ta tewani kama ya Yammai mo an shaanam ye shii ma shiiro mu kama ya? (Ne ti yai paaro kaa ye la niyo ding ti ya.) ⁶ Kulli a kaa tem! koo la-wiiu! Maa kaa we te, Yamma ta shiiro ku bukii ka yee? ⁷ Ma kenni kullino maa ta li kullino Yamma in peru kudam kping, in shiworo we shokro Yamma, Oo, longku wen we foottu wende ma ta shiirono ti ku ye ya nei mo an shasshalawi ya? ⁸ Maa kaa te, kamai ta sha toom ka ya shek longku in shiworo koko po we diya kunngu maa? Peddi memmei yei ti yuumu ding paaroti shikmu, shinui in tewi ya min ti tewi kaa te. Ta kelmo ma mee kaa ye yuwaa dob-dob in yuun ti shinui. ⁹ Oo, ka yee? Kama Yawudaawa, kama yeka dogi memmei ya? Onngoo! koo la-wiiu! kama fuwaa po shukani kama ya niyo Yawudaawa kan moi niyo Yawudaawam, shin ding ku jal me an kelnye, birang shin ding ti ta gun kumen shasshalau. ¹⁰ Kaa ye ballii ya, "A doo manni niyoi ye dobum, a doo we koo dokum. ¹¹ A doo manni niyoi ye penaam, A doo niyo an gassho biino Yammam. ¹² Shin ding shiga ta bi ti Yamma. shinui shigaju mei a doo shuran kwi foki dokum. A doo niyoi ye ti ya diyo kunngum, onngoo, koo dok." ¹³ "Goorokju kaa awan fok duwo. Dakju shigaro shari dokko," Paaro ta fokju kaa dak piire shammam." ¹⁴ "Ta fokju kemii ka shaami kan kuwak-kuwak." ¹⁵ "Shooju ti daulo ku waraa der dom. ¹⁶ Piree shinui yikka ding, bara daklani kan taa-shilibi. ¹⁷ Memme shurme shinui a peno do koko kuttan shaarim." ¹⁸ "A doo shewo Yamma ti adoojum koo la-wiiu." ¹⁹ Wende kama penaa wee shoroi teka, ti tewii ti me ti ta gunto. Tene yuwaaro kaa tei longku in beelo me an yippo do, birang in li ku-buk ti ta gun kelmono Yamma. ²⁰ Kaa ye adoo mo ta diyani yaa diya moi kan kelnyo ti toomno Yamma ka longku jooro yiu bi we shoro tekam. Wee shoroi ti yai te, tei in shukilla ya ti niyo shasshalauni. ²¹ Pene wende shuklaa mu kama koko po we diya dobno Yamma. Diya dob te a ti wei shik shorom, kaa ye shubet ta fokno Muuja kan yuyyan balila me an-pigra shinui jimraa shii. ²² Diya dob te ye ti piree kan Yamma, ti we tei ti bi lishaari ti taano Yeesho Kiriti ti me ding me an kumani. A doo kaalim. ²³ Longku koo nong yuwaa shasshalau, birang koo nong in kaano fooro shokranno Yamma. ²⁴ Pene ti bi kunngu ye Yamma yuwaa ti koo nong, koo nong in we diya yei daklo wem ti toomno Yamma ti bi paaranku ye Kiriti Yeesho yuwaa. ²⁵ Yamma shunna Yeesho mo shiwani we shuwa po-paaro ye ta shar shasshalaumu kama, longku ti piree kan domni ta fuddo shasshalau memme ti bi lishaariju. Yamma yuwaa kaa we tei longku shii in shuklo diya dobni, longku ti ta ker shaarini ye shii waka dooni ka shasshalau ye yuyyaa milam. ²⁶ Kaa te Yamma in shukilla ti ta koddi te ya shii po kuuni shii moi an diya dob, birang shii ti li ding mo kunnga kan Yeesho in we diya moi daklo wem ti toomno Yamma. ²⁷ Oo, ti ku wen ye kama ta ya roomoi? A doo wem! Longku wen waka roomoi? Ti ku jooro shoro ya? Onngoo, pene bara ti ku lishaari teere. ²⁸ Longku min weyaa ti bi lishaari ye, ti we diya moi daklo we ti toomno Yammam, a longku yiu bi kumen shorom. ²⁹ Nang Yammai we Yawudaawa shin dokju ya? Duma shii a Yamma mei Yawudaawam ya? Kulli, shii Yamma mei Yawudaawam birang. ³⁰ Ma, kulli, Yamma maa dok, shii ta shiiro karan-kuwoi ti bi lishaari, kan kenni karan-kuwoi ti piree kan lishaari. ³¹ Nang kama waka shoroi ti bi lishaari ya? Koo la-wiiu! kan ye kaa teere, kama ti ku peenai biiroi.