¹ Longkuuno te, ke mo an gee kelnyono mondok, ke kan manni koko po yippo dom, koo kei nong. Longkuuno te, koddi ye ke ti geen kelnyono mondok ke ti yai kelmo ti kuuko, longku kelnyo ye ke ti geen mondok kan te, teerei tei ye ke ti ya. ² Min penaa kelmono Yamma dob-dob ti ku me ti yuyyo ween shurme te. ³ Pene nyimmo te, ke niyo, gee ke po kuuko ke ti ya kelnye ye ke ti geen memme kan te! ke ti nyimmina ke ta shiyako ti kira kelmono Yamma ya? ⁴ Koo ke ti begii gbe kunnguno Yamma, kan ker shaari ni, kan ye shii a ti ya dawal den ti shikom ya? Duma, kei peno kunnguno Yamma ti yerikoi ka we waraa for-fok maa? ⁵ Pene ka longku bang-ku ye ti ya kan bang poshaari ye ke kan te, ke ti gali ti kuukei kelmono Yamma ye ta dang kuuko darang denno Yamma, ta koddi ye ta shuklon kelmo te ye ti ku kpang poshaarino Yamma. ⁶ Yamma ta minani ti koo nong kaa ye koo nong yuwaan shuranni. ⁷ Ka me ti gassho shokran kan illo kan kerang yei ti fim. Tenei me yuwaa shuran kunngu ti ta ker shaari, teerei shinui me Yamma ta minin we shik shuranju ka kerang po-ding. ⁸ Pene kaa she me an leu kuuju, mei ti min gba ti kullim bara ti shek, ta maan ti shinui ka den kan gban-ta- gongo. ⁹ Ka turmo kan taa shilibi ta gee kuuno koo nong ye ti ya shek, ka toomii ti Yawudaawa, kan ka bii ti mei Yawudaawam. ¹⁰ Pene ding mo yuwaa shuran yen kpang, ta we shokran kan gba kan kuttan shaari, ka toomii ti Yawudaawa kan ka bii ti mei Yawudaawam. ¹¹ Longku Yamma a mo an kaalim. ¹² Me an shasshalau ding yei peno shubetno ye ti fokno Muujam, shinui ta koon shwal a gale kan shoroim, pene me ding me yuwaa shasshalau kan penan shoroi, ta yuun kelmo ti shinui kaa ye shoro tekan. ¹³ Longku a bara yaaro shoro ye memme ta yooju me an kpang poshaari ti toomno Yammam, pene bara me an min gba ti shoro teerei ye ta tewani ya shinui me an kpang poshaari. ¹⁴ Longku mei Yawudaawam, me shinui a kan shorom, kama ye kaa tei, manni koddii shinui ti ya wee shoroi kunnga ya mo yu, dangan ye poshaariju minaan. Tenei shuklaa ya shinui mei kan shorom, shigaju shoro po kuuju. ¹⁵ Shuranju shuklaa ya ka jimro ti ku we te, longku nyimmojui ti we shinui kan kelnyo manni kodii, ti manni koddii a ti we shinui kan kelnyom. ¹⁶ Longkuuno te, kaa ye Shinnyi Yen Tomoni ye ne ti yuun kaawii ye ti tewi, ta yooro kaa te Darang ye Yamma ti piree kan Kiriti Yeesho ye ta shiiron we ding ye lattii ti ta nyimmo memme. ¹⁷ Oo, ke ye ke teka ka kei niyo Yawudaawa paa? Ke sheraako ti ku shubet ta fokno Muuja, birang ken ti ya diila ka diya shakkiko kan Yamma, ¹⁸ ken ti tewi ka ke penaa nyimmono Yamma, birang ke kan penan we ti ku shoro ye ke po shakin wee dob-dob. ¹⁹ Ke kan penani ye kei an toom me an fugum, aaro ti me dii ti ta dil, ²⁰ mo an limmo ti me dili, birang an shubet ti me nyimmoju kaa we shibo, ke penaa birang ti ta shoroi ke kan penani kping kan dob-dob kulli, nang tene taaka diyo kerangkoi ka yee? ²¹ Oo, ke mo an shuppo memme, ke ti shuppo kuuko sheekom ya? Ke mo an ya kaawi ye yaa mo wessho ya jirii, ke ti ya jiri maa? ²² Ke mo ti tewi ya mo wessho shomaki, ke ti ya shomak maa? Ke mo an kura we-kuma-we, ke ti ya jiri ti ta mina yowo maa? ²³ Ke mo an dallam ka shubet ta fokno Muuja, kei daklo shommono Yamma ti bi yiu bi ya shubetni maa? ²⁴ Kaa ye ballii, "Longkuuma Yawudaawa ye ti ya paaro bek ti shik shommono Yamma ti shakki mei Yawudaawam." ²⁵ Ma kei ti min gbai ti shoroi, karan-kuwo poshaariko kan we biiro. Pene ma bang kumo maa wee ke ti ya, ta yooro kaa kei kar-kuwokom. ²⁶ An te maa guni, mei kar-kuwojum maa ti ya maa wee shoro teka ya mo yu, Yamma a ta shar shinui kaa me karaa-kuwoju maa? ²⁷ Mei kar-kuwoju ti ta lo-shikum pene shinui in ti ya wee shoro kunnga ya mo yu, shinui ta yuuko kelmo, ke mo ke kan shoro balli-ballii, mo karaa-kuwoni birang, ar wende ken ti au shooko ta ku shorono Yamma! ²⁸ Longku niyo Yawudaawa yen kulli a niyo yei niyo Yawudaawa kaa ye she lo-shik bara waanim, birang kar-kuwo yen kpangi a kaa she lo-shik yei she karan lakatum. ²⁹ Onngoo, niyo yei niyo Yawudaawa yen kullii niyo Yawudaawa ti poshaari, birang karan-kuwo yen kullii karan poshaari, kaa te, wee shoom yuwaa, a ti bi shoro ye ballaam. Peen niyo te, ti beero kuunii Yamma, a la niyo dingum.