¹ Longkuuno te, kaa ye shiiraamu kama ti bi lishaari, kama kan kuttan shaari ti piree kan Fo-minamu kama Yeesho kiriti. ² Ti piree kan shii kama weyaa ri ta kunngu te ye kama diin ti tai ti bi lishaarimu kama. Birang kaman ti ya beere longku kama liyaa shaari, ya kama ta yoomu me an diya gale ti ta shokranno Yamma. ³ A bara kaa tem, ar kama ta ya beere ti ta taa shilibmu kama, longku kama penaa taa shilibti waru ka kurmani, ⁴ kurmani ti waru ka nyimmon kpang, nyimmon kpang birang ti waru ka lishaari. ⁵ Lishaari te a ta yooro we waanim koo la-wiiu, longku Yamma ti ukkurumu kama lewanni ti poshaarimu kama ti piree kan shoomni Yen kpang ye Yamma minnamu kama. ⁶ Longku ta dob-dob koddi, ta koddi ye kamai ta dum shau kuumu kamam, kiriti in muri longkuumu kama, kama mei kan peen nyimmono Yammam. ⁷ Ta ya shilib mondok in muri ka longku niyo ye kan diya dob. Pene kergum mondok ta dum ya bang poshaari, in muri longku niyo ye kan nyimmon kpang. ⁸ Pene Yamma in shukmu kama gbe lewanni, longku tida kamai me an shasshalau, kiriti in muri longkuumu kama. ⁹ Oo, kaa ye kama weyaa diyo mei kan kelnyom ti toomno Yamma ti bi domno kiriti, pene kaa ye wende, ai ta dum marmu kama ti fok denno Yamma ti piree kan kiriti. ¹⁰ Oo, kaa ye koddi ye milam kamai me an kenne kan Yamma ye limmaa shakkimu kama kan Yamma kan muro Laani, pene dogii wende ye shigan mun kama me an jeereno Yamma, ta marmu kama ka diyo Lai duma. ¹¹ Nang kookaro ti fokno tei, birang min ti ya beere longku wee Yamma yuwaa ti piree kan Fo-mina Yeesho kiriti, mo ye ti piree kan shii ye limmaa shakkimu kama kan Yamma. ¹² Shasshalau riina ku-buk ti shik niyo dok, shasshalau te in yeeru muro. Kaa te muro in yooro we la niyon ding d’ing, longku koo nong yuwaa shasshalau. ¹³ Ye tidan in tang min shoroi, shasshalau ti ku-buk. Pene a ti maaro shasshalau ti piree a doo shorom. ¹⁴ Kama ye kaa tei, muro in ya gub ti Ku memme ding we yinna ti ta koddino Adamu we war koddino Muuja, ye tei in ya kumen ti Ku shasshalauju me yei we teelo ta Ku shoro kaa ye sheeno Adamu diyaanum. Adamu tei temono mondok ye ta waru ka kunnguno Yamma. ¹⁵ Pene kunnguno Yamma ye minnai ti no ta warui dokro kping kan kelnyono Adamu. Gee shasshalau niyo dok te, yeena muro ti Ku memme gbe. Pene kunnguno Yamma yuwaaro gbe, ye kunngunii ye yuwaai ti bi kpang niyo dok te, ye yaa Yeesho kiriti, tei yeena gbong kpang ti memme gbe. ¹⁶ Kulli kunnguno Yamma dokro ta tei kan shasshalau niyo dok te. Longku kelmo ye yinna bi kelnyo dok te, tei kelnye muro, pene kunngu ye Yamma minnai, tei yeenamu kama kelmo moi kan kelnyem ti toomnii kaa ye kama yuwaa shasshalau gbe. ¹⁷ Ti bi shasshalau niyo dok, yei Adamu, muro in ya gub ti kuuno koo nong, pene ya gub te a weenan dogum ye maa tengnga ka niyo dok, yei Yeesho kiriti ye wannan. Ti piree kan shii ye kama yikkan kpangno Yamma gbe kan kunnguni ta diya dob ti toomni. Ti piree kan shii kama ta ya gub ti ta diyo. ¹⁸ Longkuuno te, kaaye kelnye niyo dok yeena kelmo muro ti kuuno koo nong, kaa te birang, yaan diya dob ye niyo dok yuwaa in waruka kpang ti koo nong, teerei we diya moi kan kelnyem ti toomno Yamma birang kan kerangin fo. ¹⁹ Kaa ye memme gbe yuwaaju me an shasshalau ti bi kenni murku niyo dok, kaa te birang memme gbe ta yooju me an diya dob ti piree kan murku niyo dok. ²⁰ Wee liyaa in riiru ka shoro tei longku kelnyo in peru peewe. pene koddi ye shasshalau tokka shaariro, nang kpangno Yamma ti yek tokko shaariro. ²¹ Teerei, kaa ye shasshalau yuwaa gub ti kuunii ti bi muro, kaa te birang kunnguno Yamma ti ku ya gubnii wende ti piree kan diya dob, in ti warin mun kama po we kerang po-ding ti piree kan Yeesho kiriti Fo-minamu kama.