¹ Baghaniwa, mutakasubalire umuzimu ghonsi. mumalo mwache, muyezye umuzimu ukulinga ukuti ghufumite kwa Chala, chifukwa abaghonela abamyansi baba binji mu chisu. ² Pa ichi muzukumanya umuzimu wa Chala_ umuzimu ghonsi gho ghukwitikizya ukuti ukuti U Yesu Kilisitu izite mu mubili afumile kwa Chala, ³ sona umuzimu ghonsi gho ghutakwitikizya ukuti u Yesu atafumite kwa Chala, Ughu ghomuzimu wa chikana kilisitu, gho mukivwa ukuti ghukwiza, po ulu ghuli kale mu chisu. ⁴ Mufumite kwa Chala, bana, sona abapota, chifukwa yo ali mumwinu mukulu ukulusya yo ali mu chisu. ⁵ Ba fumite mu chisu; polero vyo bakunena vikufuma mu chisu, po ni chisu chikubivwa. ⁶ Tufumite kwa Chala. Wensi yo amumenye u Chala akwivwa ku kwitu, Wensi yo atafumite kwa Chala atakutwivwa uswe. pa ichi tughumenye umuzimu wa bwanalori nu muzimu wa bumyansi. ⁷ Baghaniwa, za tughane weka nuyunji, pakuti ulughano lufumite kwa Chala, sona wensi yo aghaniwe apapiwe ukufuma kwa Chala sona amumenye u Chala. ⁸ Umunthu yo atakubomba ulughano atamumenye u Chala, pakuti u Chala lolughano. ⁹ Chifukwa cha lughano lwa Chala lukavumbuliwa pakasi pitu, ukuti u Chala atumite u mwana wache mwene ku chisu ukuti tube nu bumi mu mwache. ¹⁰ mu ichi muli ulughano, noti ukuti tukamughana u Chala, lori ukuti akatughana uswe, sona nukuti akatuma u Mwana wache ukuba mupoki wa mbibi zitu. ¹¹ Baghaniwa, Nanthi u Chala atughanite uswe bunonye, nuswe po tughanane weka nu yunji. ¹² Nayumo yo amubwenipo u Chala. Nanthi tukughana weka nu yunji, u Chala akwikala mu mwitu, sona ulughano lwache lwakufikapo mu uswe. ¹³ Pa ichi tukumanya ukuti tukwikalilira mu mwache sona yuyo mu mwitu, chifukwa atupileko ghumo umuzimu wache. ¹⁴ Po sona, tulingite nukusimikizya ukuti u Baba atumite u Mwana wache ukuba mupoki wa chisu. ¹⁵ Wensi yo akwitika ukuti u Yesu we Mwana wa Chala, U Chala akwikala mu mwache sonayuyo mwa Chala. ¹⁶ Po sona , tumanyikwizwe nukusubila mu lughano lo u Chala ali nalo mwa uswe. U Chala lolughano, sona wensi yo akwikala mu lughanoulu akwikalilira mwa Chala, U Chala akwikala mu mwache. ¹⁷ Chifukwa cha ichi, ulughano ulu lwaba lwa kufikapo pakasi pitu, ukuti twize tube nu lusubilo pisiku lya kulongiwa, chifukwa cha mo abelile, ngati mo vibelire mu chisu. ¹⁸ Mute ubogha mu lughano. mumalo mwache, ulughano lwa kufikapo lukufumyamo ubogha, ubogha buzukubombiwa poka nukulangika. Lori wensi we ali nubogha atapangiwe mwakufikapo mu lufhano. ¹⁹ Tumughanite chifukwa u Chala akanda tasi atughana uswe. ²⁰ Nanthi yumo anganena, ''Mughanite u Chala'' lori amubengite uwa mwabo, bo akutamantha. Pakuti wensi yo atamughanite uwa mwabo, yuyo yo amunangile, atangamughana u Chala, yuyo yo atamubwenipo. ²¹ Po sona ulu lolughano lotulinalo ukufuma ku kwache: Wensi yo amughanite abaghile sona ukumughana uwa mwabo yuyo.