¹ Wensi yo akusubila ukuti u Yesu we Kilisitu apapiwe ukufuma kwa Chala, sona wensi yo amughanite u Baba sona aghanite nu mwana wakupapiwa mu mwache. ² Umu momo tukumanyila ukuti tumughanite umwana wa Chala: nanthi twamughana u Chala nukusunga indaghilo zyache. ³ pakuti ulu lolughano lwa Chala: ukuti tusunge indaghilo zyache. sona indaghilo zyache zitang'wamite. ⁴ Pakuti wensi apapiwe ukufuma kwa Chala akupota ichisu. sona ubu bobuhobosu ukuti apota ichisu, nu lusubilo lwitu. ⁵ We wenu yo angapota ichisu? yuyo yo akusubila ukuti u Yesu we Mwana wa Chala. ⁶ Uyu weyuyo yo akiza ukwendela mu minzi na mwa daba: U Yesu Kilisitu. atakiza ukwendela mu minzi mwene awe, lori ukwendela mu minzi sona na mwa daba. Umuzimu ghogho ghukusimikizya chifukwa umuzimu ghoghobwanalori. ⁷ Pakuti vili vitatu vyo vikusimikizya: ⁸ umuzimi, aminzi, sona nu daba. Ivinthu vitatu ivi vili palwivwano. ⁹ nanthi tukupokela insimikizyo ukufuma ku banthu, ulusikizyo lwa Chala lukulu. Pakuti ulu lolusimikizyo lwa Chala lulo akasimikizya ukuyana nu Mwana wache. ¹⁰ Wensi yo akusubila mwa Mwana wa Chala ali nulusimikizyo ulwache umwenencho. Wensi yo nanthi atakusubila u Chala ipangite mwene ukuba mu myansi, chifukwa atasubile ulusimikizyo lo u Chala abpelekite ukuyana nu Mwanawache. ¹¹ Sona ulusimikizyo lo ulu: U Chala atupile uswe ubumi bwa bwile na bwile, sona ubumi ubu buli mwa Mwanawache. ¹² Wensi yo ali nu Mwana ali nu bumi. Wensi yo atenu Mwana wa Chala ate nu bumi. ¹³ Mbasimbile umwe ivinthu ivi ukuti mu manye pakuti muli nu bimi bwa bwile na bwile_kwa umwe yo akusubila mwizina lya Mwana wa Chala. ¹⁴ Po sona, ulu lolusubilo lotulinalo panthanzi papache, ukuti nanthi tukulenga chimo ukuyana nu bwighane bwache, akutwivwa uswe. ¹⁵ Po sona, nanthi twamanya ukuti akutwivwa uswe_chonsi cho tungamulenga nyuyo_tukumanya ukuti tulinacho chonsi cho twamulengayuyo. ¹⁶ Nanthi wensi yo amulinga uwa wamwabo abomba imbibi yo yitakuleta imfwa, abaghile ipute, po u Chala azukumupa ubumi. Nkunena ku bonsi bo imbibi zyabo zitakuleta imfwa. Muli imbibi zyozikuleta imfwa; Nthakunena ukuti ipute chifukwa cha ivyo. ¹⁷ Vyonsi ivisita bugholosu zyo mbibi, lori pali imbibi zyo zitakuleta imfwa. ^{18 19} Tumenye ukuti wensi yo apapiwe ukufuma kwa Chala atakunanga. Lori wensi yo apapiwe ukufuma kwa Chala akwisunga mwene, sona umubibi atanga munanga. Tumenye ukuti tufumite kwa Chala, sona tumenye ukuti ichisu chonsi chighonite mu maka gha mubibi yula. ²⁰ Lori tumenye ukuti u Mwana wa Chala akiza nukutupa uswe ubumanyi ukuti tumumanye wenu wa bwanalori. Po sona, tuli nu mwache yuyo wa bwanalori, mu Mwana wache Yesu Kilisitu, Uyunyi weyo we Chala wa bwanalori sona bumi bwa bwile na bwile. ²¹ Bana, ifumyako mwebene ku vifwani.