¹ Linga lughano buli lo u Baba atupile uswe, ukuti twitiziwe bana ba Chala, sona ichi chocho uswe tuli. Pachifukwa ichi, ichisu chitatumenye uswe, chifukwa chitakamumanya umwene. ² Baghaniwa, po ulu twebana ba Chala, sona vichili vita vumbuliwe mo uswe inthi twize tubele. Tumenye ukuti nanthi u Kilisitu aboneka, tuzukuba ngati weyuyo, pakuti tuzukumulinga ngati mo abelire. ³ Wensi yo ali nulusubilo mu mwache akwiswefya mwene ngati mo umwene abelire muswepu. ⁴ Wensi yo akunanga imbibi akunangila ululaghilo, pakuti ukunanga kukukanana ni ndaghilo. ⁵ Mumenye ukuti u Kilisitu akavumbuliwa ukuti asende imbibi, sona mumwache mute imbibi. ⁶ Nayumo yo ali mu mwache angabukilila nu kunanga. Nayumo yo akubukilila nukunanga amubweni umwene pamo nukumumanya yuyo. ⁷ Bana, mutakaleke nayumo abatangilire pakubasobezya. Mwene yo akubomba ubugholosu mu gholosu, ngati mo u Kilisitu abelire mu gholosu. ⁸ Wensi yo akunanga imbibi afumite kwa satana, pakuti usatana akananga ukufuma pa bwandilo. Pachifukwa ichi u Mwana wa Chala akavumbuliwa, ukuti anange imbombo zya satana. ⁹ Wensi yo apapiwe ukufuma kwa Chala atakubukilira pa kunanga, chifukwa imbeyu ya Chala yikwikalilira mu mwache. Atangabukililira pa kunanga chifukwa akapapiwa mwa Chala. ¹⁰ pa ichi abana ba Chala sona nabana ba satana bavumbuliwe: Wensi yo atakubomba cho chabugholosu atafumite kwa Chala, pamo weyuyo yo atamughanite uwamwabo. ¹¹ Pakuti agha ghogho makani ghomukivwa pa bwandilo: tubaghile tughane weka nu yunji. ¹² Tutakabe ngati we kayini, yo akafuma ku bubibi sona akakoma uwamwabo. Choni cho akamukoma? chifukwa imbombo zyache zikaba zibibi uwamwabo zikaba zigholosu. ¹³ Mutakabe ba kuswigha, ba wamwitu, nanthi ichisu chibabengite umwe. ¹⁴ Tumenye ukuti twenda mubufwe ukuya ku bumi, chifukwa tughanite aba wamwitu. Wensi yo atakuba nu lughano akwikalilira mu bufwe. ¹⁵ Wensi yo abengite uwamwabo wakukoma. Mumenye ukuti nayumo uwa kukomayo ali nu bumi bwa bwile na bwile bo bupeghiwe mu mwache. ¹⁶ Pa ichi tumenye ulughano, chifukwa U Kilisitu akabika ubumi bwache pansi chifukwa cha uswe. Nuswe tubike ubumi bwitu pansi mubwikazi mu ba wamwitu. ¹⁷ Lori wensi yo ali nu katundu wa chisu, akulinga aba wamwabo bo bali muvwakulondiwa, sona akwighalila umoyo wache uwachisa ukufuma mu mwache, ichisa cha Chala chingikalilila bulibuli mu mwache? ¹⁸ Bana bane, za manye tughane mu mazyu na mu lulimi, lori mu mbombo na mu bwanalori. ¹⁹ Momu ichi motukumanya ukuti tufumite mu bwanalori, sona tukusimikizya imyoyo yitu pa nthanzi papache. ²⁰ Pakuti nanthi imyoyo yitu yitusulite uswe, U Chala mukulu ukulusya imyoyo yitu, sona amenye ivinthu vyonsi. ²¹ Baghaniwa, pala imyoyo yitu yitatusulite uswe, tuli nu bujinvu panthanzi pa Chala. ²² Chonsi cho tukulenga tuzukupokela ukufuma ku kwache, chifukwa tukusunga amalaghano ghache sona nukubomba ivinthu vyakuhobosya panthanzi pache. ²³ Ulu lo lulaghilo: lo tubaghile ukusubila mwi zina lya Mwana wache Yesu Kilisitu nukughana weka nu yunji, ngati mo akatupela uswe ilaghano. ²⁴ Wensi yo akusunga indaghilo akwikala mu mwache, sona u Chala akwikala mu mwache, pa ichi tumenye ukuti akwikala mu mwitu, ukwendela mu muzimu gho yuyo akatupa uswe.