¹ Bana, Une ndipakusimba ivinthu ivi ku kwinu ukuti mutakanange. Lori nanthi yumo akunanga, tuli numulandu kwa Tata, Yesu Kilisitu, weyo mwene wa bwanalori. ² Yo wakuhobokela imbibi zitu, sona ku zitu zyene awe, po nakuchisu chonsi. ³ Tukumanya ukuti twiza pakumanya umwene, nanthi tukusunga indaghilo zyache. ⁴ Wensi yo akuti '' Une mumenye U Chala'' lori atakusunga indaghilo zyache mu myansi, sona ubwanalori bute mu mwache. ⁵ Lori wensi yo akusunga amazyu ghache, nalori mumwache muli ulughano lwa kufikapo mwa Chala. pa ichi tukumanya ukuti tuli mu mwache: ⁶ wensi yo akunena ukuti ali mwa Chala yuyo mwene endenge ngati mo akwendela. ⁷ Baghaniwa, Une nthakubasimbila ululaghilo ulupya umwe, lori ululaghilo ulukulu lo mukaba nalo ukufuma pa bwandilo. Ululaghilo ulukulu gho mazyu gho mukivwa. ⁸ Po buli Une nchili kubasimbila umwe ululaghilo ulupya, lo lwa bwanalori mwa Kilisitu sona na mumwinu, chifukwa ichisi chikupululira sona ubwelu bwa bwanalori bubalite kale. ⁹ Wensi yo akuti ali mubuswepu lori amubengite uwamwabo achili ali mu chisi mpaka nulu. ¹⁰ Wensi yo amughanite uwamwabo akwikala mu buswepu sona pate ukwipunula mumwache. ¹¹ Lori wensi yo amubengite uwamwabo ali mu chisi sona akwenda mu chisi; atakumanya ko akuya chifukwa ichisi chighalire amaso ghache. ¹² Nkhusimba ku kwinu, bana, chifukwa imbibi zinu zihobokeliwe chifukwa cha lizina lwache, ¹³ Nkhusimba ku kwinu, ba Tata, chifukwa mumumenye yu weyuyo ukufuma pa bwandilo. Nlhusimba ku umwe, banyamata, chifukwa mwapota ivibibi vyonsi. Nkhusimba ku kwinu, bana, chifukwa mumumenye U Baba. ¹⁴ Nkhusimba ku umwe, bapapi, chifukwa mumumenye yo weyuyo ukufuma pa bwandilo. Nkhusimba ku umwe, banyamata, chifukwa muli namaka, sona namazyu gha Chala ghasyalikile mu mwinu, sona mwapota ivibibi vyonsi. ¹⁵ Mutakayighane insi ni vinthu vyonsi vyo vili munsi. Nanthi wensi yo aghanite ichisu, ulughano lwa Bbaba lute mu mwache. ¹⁶ Pakuti vyonsi vyo vili mu chisu_ichinyonywa cha mubili, chinyonywa cha maso, sona nukwitunvya kwa bumi_vitafumitye kwa Baba lori vifumite mu chisu. ¹⁷ I chisu ni vinyonywa vyache vikubuka. Lori wensi yo akubomba ubwighane bwa Chala azukwikala bwila na bwila. ¹⁸ Bana, kabalilo ka bumalilo. ngati mo mukwivwila ukuti abakana Kilisitu bakwiza, ulu abakana Kilisitu abinji biza. Pa ivi tukumanya ukuti aka kabalilo ka bumalilo kafika. ¹⁹ Bakafumako ku kwitu, lori batakafuma ku kwitu. Pakuti nanthi bakaba bakufuma ku kwitu ngali bakabapoka nuswe. Lori bobafuma kunzi, chila bakalangizya ukuti batakafuma ku kwitu. ²⁰ Lori mukapakaziwa ukufuma ku muswepu, sona mwebonsi muzimenye. ²¹ Une nthakabasimbila umwe chifukwa mutamenye ubwanalori, lori pakuti mwabumanya pate ubumyansi nabumo ukufuma ku bwanalori. ²² Wewenu yo mu myansi lori yuyo yo akukana ukuti Yesu we Kilisitu? Umunthu uyo mukana Kilisitu, pakuti akukana u Baba nu Mwana. ²³ Nayumo yo akukana u Mwana ali nu Baba. Wensi yo akumwitika u Mwana ali nu Baba. ²⁴ Ngati ku kwinu Za vyo mwivwile ukufuma pa bwandilo vibe mu mwinu. pakuti nanthi vyo mwivwile vikala mu mwinu, numwe muzukwikala mwa Mwana sona na mwa Baba. ²⁵ Ili lyo laghizyo lyo akatupa uswe_mu bumi bwa bwila. ²⁶ Nasimba vyonsi ivi kukwinu chifukwa cha bo bangiza babasobezye ²⁷ Po ku umwe, ukupakaziwa ko mukapokela ukufuma ku kwache kwikale mu mwinu, sona temulonde nayumo ukuti aba manyiswe umwe. Lori ukuyana nukupakaziwa kumanyisizye wensi sona kwa bwanalori sona te bumyansi, sona ngati mo kukabuziwa kukwinu, kwikale mumwinu. ²⁸ Po ulu, bana, mwikale mu mwache ukuti nanthi azukuboneka twize tube bajimvu sona manye tukakoziwe insoni panthanzi pache pisiku lyo azukwiza. ²⁹ Nanthi mumenye ukuti wabwanalori, umwe muzimenye ukuti wensi yo akubomba ivya bwanalori apapiwe ukufuma ku kwache.