¹ Ukubomba poka nawe, tukubabuzya ukuti mutakapokele ichisa cha Chala pabwaka. ² Pakuti akunena, ''Mutubalilo utwiza nkhivwa ku kwinu, sona mwisiku lya kupokiwa nkhabavwa umwe.'' Lolela, ilelo lisiku lya kupokiwa. ³ Mutakalete imphizya nayimo ku nthanzi kwa munthu aliwensi ukuti ubulumbilili bwitu butakasusiwe. ⁴ Mu malo mwache, tusimikizye swebene mu mbombo zitu zyonsi, ukuti swe ba mbombo ba Chala. Swe bambombo bache mukujimba ukukulu, munthamyo, muvyakughoma, ivyakupinga, ⁵ ukumiwa,ukupinyiwa, muvyongo mumbombo zya kubababa, mukuleka ukughona utulo ubusiku, ninzala, ⁶ mubuswepu, mukamanyile, mukufwasa, mubololo, mu Muzimu ughuswepu, mu lughano lwa bwanaloli. ⁷ Swe bambombo bache mwuzwi lya bwanaloli, mu maka gha Chala. Tuli ni chilwilo cha bugholosu ku nyobe iya ndyelo niya mongo. ⁸ Tukubomba mu buchindamu na mukunyala, mu kwiyisya nu kwiputa. Tukususiwa ukuti swe ba myansi sona swe ba bwanaloli. ⁹ Tukubomba ngati te swe bakumanyikwa inga po tumanyikizwe akiza hee. Tukubomba ngati tufwile sona---linga!---loli tuchili swe ba bumi. Tukubomba ngati bakulangiwa mu kabombele kitu loli tutasuliwe ku bufwe. ¹⁰ Tukubomba ngati ba chitima, loli tukuba bakuhoboka akabalilo konsi. Tukubomba ngati bapina, loli tukulenga abinji ukuba bakabi. Tukubomba ngati tute nako nakamo sona po tuli navyo vyonsi. ¹¹ Tunenite ubwanaloli bonsi ku kwinu umwe, ba Kolinti, imyoyo yitu yighukite nkani. ¹² Mutakufyenyeleziwa nuswe, loli mukwifyenyelezya mwebene mu myoyo yinu. ¹³ Ulu mukuchenjania ukwiza---nkunena ngati ku bana--mwighule mwebene pa bukulu numwe. ¹⁴ Mutakapinyiwe poka nabo batasubila. Pakuti kukolelana buli ko buliko ubugholosu bulinabo mu bunanzi? Pakuti vyo abapokiwa bakubomba ubwelu buli ni chisi? ¹⁵ Ka lwivwano buli lo u Kilisitu angaba nabo pa Beliyali? Pamo chakugabana buli cho uwakusubila angagabana nu musita kusubila? ¹⁶ Sona lwivwano buli lo lulipo pakasi pa tempeli lya vifwani? Pakuti swe tempeli lya Chala umumi, ngati mo u Chala akanenela: ''Nkuzukwikala mu mwabo sona nkuzukwenda mu mwabo. Nkuzukuba ne Chala wabo, sona bazukuba banthu bane.'' ¹⁷ Polelo, '' fumamo mukasi mumwabo, sona usyembukepo,'' akanena umwene. Mutakakole ichinthu ichibibi, po nkuzukubapokela umwe. ¹⁸ Nkuzukuba ne tata ku kwinu, sona mukuzukuba bana bane mwe basungu,'' anena u Mwene uwa maka ghonsi.