¹ Baghaniwa, mo twabela na malaghano agha, za twiswefye swebene ku buchafu bwa ku mubili nubwa ku muzimu. Zanga tulonde ubuswepu mukoghopa u Chala. ² Mutupe amalo! Tutamunangile nayumo. Tutamubengite nayumo pamo ukusendelapo ulusako payumo. ³ Nthanena chino ukuti mbasusye umwe. Pakuti nenite kale ku kwinu ukuti muli kale mu myoyo yitu, mwakuti tufwile poka sona tube nu bumi poka. ⁴ Indi nu lusubilo ulukulu mu mwinu, sona nukubusila ulukulu mu mwinu. Nizwile nubufwase. Indi nu lusekelo ulukulu mu vyakupinga vyonsi. ⁵ Bo twiza ku Makedonia, imibili yitu yitakatuzyapo. Mu malo mwache, tukatamiwa monsi umo ni vyongo kunzi sona nu bogha mukasi. ⁶ Loli u Chala , yo akuhobosya bo bakwichefya, akatuhobosya uswe nukwiza kwa Tayitasi. ⁷ Kutakaba kwiza kwache kwene ko u Chala akatuhobosya. Vikaba sona vyo u Tayitasi akapokela ukufuma ku kwinu. Akatubuzya uswe ukukonkelezya ku kwinu ukukulu, ichitima chinu, sona nu kwendelezya kwinu pa une. Po nkahoboka nkani ukupululila. ⁸ Napo pope ukalata wane akabakalalizya, nthakubabwapo.Loli nkababwa nichi bo nalinga pakuti ukalata wane abakalalizya , napo kakaba kabalilo kanandi. ⁹ Ulu nkuhobaka te chifukwa chakuti mukaba ni lyoyo, loli pakuti ubukalale bwinu bukababika umwe kukupinduka. Mukenda muchitma cha kwa Chala, po mutakatamiwa nachimo chifukwa chitu. ¹⁰ Pakuti ichitima chamwa Chala chikiza nu lupinduko bo bukamalizya ubupoki bwasita kwilamwa. Ichitima cha chisu, napo buli chikwiza nimfwa. ¹¹ Lolela ukulondiwa kwa chitima ichikulu cho u Chala abikite mu mwinu. Chinthu buli ichikulu ichabumalilo mu mwinu cho chikusimikizya ukuti mukaba mwe biza bwaka. Bubavu buli ubukulu bo mukaba nabo, ubogha bwinu, nu bwighane ukulinga ukuti ubwanaloli bibombiwe pa pinu! Mu vyonsi vyo mwasimikizya mwebene ukuti mwe biza bwaka. ¹² Napapo nkabasimbila umwe, ntakabasimbila chifukwa cha yo akubomba akabibi, pamo chifukwa nayo akatamiwa nu bubibi,, loli ukuti ubwiza bwinu bobuzutukonka uswe bukwenela ukumanyikwa ku kwinu pamaso gha Chala. ¹³ Chifukwa cha chino ukuti tuchintchiziwe. Pakongelezya apa ukuhoboka kwitu, sona tukusekelela hee chifukwa cha Tayitasi nu kuhobaka kwache, pakuti umuzimu wache ghukanyokela mumalo na mu mwebonsi. ¹⁴ Nanthi nkitunvya nacho ichinthu chimo ku kwache chifukwa chinu, nthakakoziwa insoni. Loli umwakulekana numwe mubwanaloli ukwitunvya kwitu kwa Tayitasi ku kusimikiziwa ukuba kwa bwanaloli. ¹⁵ Loli ukukonkelezya kwache ku kwinu kukulu bo akukumbukila ukwivwila kwinu umwe mwe bonsi, mo mukamupokelela nu bogha sona nu kutetema. ¹⁶ Nkuhoboka chifukwa indi nu lusubilo lonsi mu mwinu